ساعات 18:06-دا ەكسپو-نىڭ ءتورت وتكىزۋ بەكەتىنە ورناتىلعان بەينەباقىلاۋ كامەرالارى مەن ەسەپتەۋىشتەر «استانا ەكسپو-2017» كورمەسىنە كەلگەن ميلليونىنشى كەلۋشىنى تىركەدى. ول 27 جاستاعى استانا تۇرعىنى گۇلجيھان جاڭابەرگەنوۆا. كورمەگە گۇلجيھان جالعىز كەلمەپتى. باقىتتى بيلەت يەسىمەن بىرگە كورمەگە كۇيەۋى جانە ءۇش جاسار قىزى كەلگەن.
«مەن استانانىڭ №76 مەكتەپ-ليتسەيىندە ماتەماتيكا ءپانىنىڭ مۇعالىمى بولىپ جۇمىس ىستەيمىن. مۇندا ەكىنشى رەت كەلىپ تۇرمىن, العاشقى كەلۋىمدە «نۇر الەم» پاۆيلونىنا كىرە الماپ ەدىم. قازىر ءبىرىنشى كەزەكتە قازاقستان پاۆيلونىنا بارامىز. شىنىمدى ايتسام, مۇنداي ساتتىلىكتى ەش كۇتپەدىم, ءتىپتى كەلۋشىلەردى سانايتىنىن دا بىلمەدىم», - دەيدى گۇلجيھان جاڭابەرگەنوۆا.
قۇرمەتتى قوناقتى قۇتتىقتاۋ ءۇشىن ەكسپو-2017 مەديا-ورتالىعىنا «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ كەلدى. ۇلتتىق كومپانيا باسشىسى ميلليونىنشى كەلۋشىنى قۇتتىقتاپ, ەستەلىك سىيلىقتار جانە كورمە مەن ديۋ سولەي تسيركىنىڭ كەشىنە بيلەت تابىستادى. ءوزىنىڭ قۇتتىقتاۋ سوزىندە احمەتجان ەسىموۆ كورمەگە دەگەن قىزىعۋشىلىقتىڭ كۇن سايىن ارتىپ كەلە جاتقانىن اتاپ ءوتتى.
«بارلىعى ءبىز جوسپارلاعانداي ءوتىپ جاتىر. بۇگىنگى ميلليونىنشى كەلۋشى ءبىز ءۇشىن جاقسى كورسەتكىش. ەكسپو-2017 كورمەسىنىڭ بارلىق كەزەڭىنە 2 ميلليون ادام كەلەدى دەپ بولجاپ ەدىك. بىراق, ءبىر ايدان كەيىن-اق, قۇرمەتتى قوناعىمىزدى قۇتتىقتاپ تۇرمىز. مۇنداي اۋقىمدى ۇلتتىق جوبا وتكەندە, ەڭ الدىمەن قازاقستاندىقتارعا ۇناي ما, بۇل جوبانى قابىلداي ما دەپ ويلانامىز. كورمەنى جىلى قابىلداعاندارىڭىز ءۇشىن قۋانىشتىمىز», - دەدى احمەتجان ەسىموۆ.
ەستەرىڭىزگە سالا كەتەيىك, كورمەنىڭ تىركەۋ قۇجاتتاماسىندا ەكسپو-2017-گە 2 ميلليون ادام كەلەدى جانە كورمە نىساندارىندا جالپى سانى 5 ميلليونعا جۋىق كەلۋشى تىركەلەدى دەپ جوسپارلانعان ەدى. ال, حالىقارالىق پاۆيلونداردى ارالاعان كەلۋشىلەردىڭ سانىن قوسساق, 10 شىلدەدەگى كورسەتكىشكە سايكەس, 5 960 212 ادام تىركەلگەن. كورمە كەشەنىندەگى نەگىزگى نىساندارعا جۇرتشىلىق 834 579 رەت كەلگەن. بۇل رەتتە 303 007 ادام تاماشالاعان «نۇر الەم» پاۆيلونى كوش باستاپ تۇر. ەسەپتەپ كورسەك, بارلىق كەلۋشىلەردىڭ شامامەن130 مىڭى نەمەسە 14 پايىزى شەتەلدىك قوناقتار.
ءبىر اي ىشىندە كورمەنى 160 مىڭ ادام جەڭىلدىكتەر قاراستىرىلعان تاريفپەن تاماشالاعان. ولار – مەكتەپ وقۋشىلارى, زەينەتكەرلەر مەن ستۋدەنتتەر. سونداي-اق, 6 جاسقا دەيىنگى بۇلدىرشىندەر, ۇوس قاتىسۋشىلارى مەن ولارعا تەڭەلگەن تۇلعالار جانە مۇمكىندىگى شەكتەۋلى جاندار.
ايتا كەتەيىك, كورمە اۋماعىندا وسى ۋاقىت ىشىندە 1031 مادەني جانە ىسكەرلىك شارا وتكىزىلگەن, سونداي-اق, مەملەكەت باسشىلارىنىڭ, مينيسترلەر مەن حالىقارالىق پاۆيلون كوميسسارلارىنىڭ قاتىسۋىمەن 84 حاتتامالىق شارا ۇيىمداستىرىلعان.