قىزىلوردا وبلىسىندا قازاقستاننىڭ گاز سالاسى ءۇشىن اسا ماڭىزدى شارا بولدى. قۋاتتى ءارى زاماناۋي بۇل نىساننىڭ سالىنۋىن ماماندار تەڭدەسسىز وقيعا دەپ باعالاپ وتىر. ويتكەنى, وڭتۇستىكتىڭ گاز پروبلەماسى شەشىلۋىمەن قاتار استانا مەن ەلىمىزدىڭ سولتۇستىك وبلىستارىن دا گازبەن جابدىقتايتىن نىسان سالىندى. ستراتەگيالىق ماڭىزدى «قاراوزەك» كومپرەسسورلىق ستانساسىنىڭ اشىلۋى وبلىس اكىمى قىرىمبەك كوشەرباەۆ, «قازمۇنايگاز» ۇك اق پەن ۇلتتىق وپەراتور «قازترانسگاز» كومپانياسىنىڭ باسشىلىعىنىڭ قاتىسۋىمەن سالتاناتتى تۇردە پايدالانۋعا بەرىلدى. وڭتۇستىكتىڭ گاز قاجەتتىلىگىن تولىق شەشىپ, ەكسپورتتىق الەۋەتتى ارتتىرعان بۇل جوبا كوپتەن ايتىلىپ جۇرگەن سولتۇستىك وڭىرلەردى گازداندىرۋعا مۇمكىندىك بەرمەك. – بولاشاقتا ەلوردانى گازداندىرۋ جۇمىسى قاسيەتتى سىر ەلىنىڭ جەرىنەن باستاۋ الادى. ەلباسىنىڭ قولداۋىمەن باستالعان ءىرى ستراتەگيالىق ماڭىزى بار «بەينەۋ – بوزوي – شىمكەنت» ماگيسترالدى گاز قۇبىرى بىزگە زور مۇمكىندىك بەردى. وبلىس اۋماعىنان وتەتىن 846 شاقىرىمدىق گاز قۇبىرى قىزىلوردا وبلىسىن گازداندىرۋعا جول اشتى. بۇل – مەملەكەت باسشىسىنىڭ بىزگە جاساعان تىكەلەي قامقورلىعى. ستانسانىڭ ىسكە قوسىلۋى – گاز سالاسى قىزمەتكەرلەرىنىڭ استانا كۇنىنە جاساعان زور سىيى, – دەدى ايماق باسشىسى. بۇل جوبا ءبىزدىڭ رەسپۋبليكانىڭ عانا ەمەس, بۇكىل ەۋرازيالىق كونتينەنتتىڭ ترانزيتتىك الەۋەتىن ارتتىرادى دەسەك, ارتىق ايتقاندىق ەمەس. مەملەكەت باسشىسىنىڭ گازداندىرۋ كولەمىن ۇلعايتۋ, ەنەرگيا رەسۋرستارىن تاسىمالداۋدى ءارتاراپتاندىرۋ جونىندەگى تاپسىرماسىن «قازترانسگاز» كومپانياسى جوسپارلى تۇردە جۇزەگە اسىرىپ كەلەدى. جانە كوپشىلىك ونىڭ يگىلىگىن كورىپ وتىر. بۇگىندە وتاندىق گاز تاسىمالداۋ سالاسى ناعىز تەحنيكالىق رەۆوليۋتسيانى باستان وتكەرىپ جاتىر. وسى جىلدىڭ العاشقى جارتىسىندا قازاقستاندا گاز ينفراقۇرىلىمىنىڭ جوعارى تەحنولوگيالىق ەكى نىسانى سالىندى. ولار – اقتوبە وبلىسىنداعى «بوزوي» مەن قىزىلوردا وبلىسىنداعى «قاراوزەك» كومپرەسسورلىق ستانسالارى. ەكى جوبانى دا ەلدى وتاندىق گازبەن قامتاماسىز ەتۋدى, ستراتەگيالىق «بەينەۋ – بوزوي – شىمكەنت» ماگيسترالدى گاز قۇبىرىنىڭ تاسىمالداۋ مۇمكىندىگىن ارتتىرۋدى ماقسات ەتكەن ۇلتتىق وپەراتور – «قازترانسگاز» كومپانياسى جۇزەگە اسىردى. جوعارى تەحنيكالىق كۇردەلىلىگىنە قاراماستان, «قاراوزەك» ستانساسى مەرزىمىنەن جارتى جىل بۇرىن ىسكە قوسىلىپ وتىر. بۇل «قازترانسگازدىڭ» كومپانيا رەزەرۆىندەگى گاز ايدايتىن قوندىرعىلاردى پايدالانۋى ەسەبىنەن مۇمكىن بولدى. ءسويتىپ, مەملەكەتتىڭ ميللياردتاعان قاراجاتى, قىرۋار ۋاقىتى ۇنەمدەلدى. سالتاناتتى جيىندا «قازمۇنايگاز» ۇك اق ۆيتسە-پرەزيدەنتى قايرات شارىپباەۆ «قاراوزەك» جانە «بوزوي» كومپرەسسورلىق ستانسالارىنسىز قازاقستاندىق گازدى قىتايعا تاسىمالداۋ جانە ەلدىڭ وڭتۇستىگىندەگى ەنەرگەتيكالىق قاۋىپسىزدىكتى قامتاماسىز ەتۋ مۇمكىن ەمەس ەكەنىن جەتكىزدى. وسىنى تۇسىنە وتىرىپ, مەملەكەت باسشىسى «بەينەۋ – بوزوي – شىمكەنت» ماگيسترالدىق گاز قۇبىرىن سالۋدى تاپسىردى. ۋاقىت كورسەتكەنىندەي, بۇل دەر كەزىندەگى شەشىم بولدى. تاياۋ ارادا عانا ءبىز قىتايمەن جىلىنا 5 ملرد تەكشە مەتر وتاندىق گاز ەكسپورتى تۋرالى مەموراندۋمعا قول قويدىق» – دەپ اتاپ ءوتتى. ستانسانىڭ نەگىزگى ەلەمەنتى – جۇمىستىڭ ەڭ كۇردەلى رەجىمىنە ارنالعان «Solar Turbines» امەريكالىق كومپانياسىنىڭ جوعارى تەحنولوگيالارى نەگىزىندە ازىرلەنگەن گازتۋربينالىق قوندىرعىلار. بارلىق ءۇش اگرەگاتتى پايدالانعان كەزدە كومپرەسسورلىق ستانسانىڭ ونىمدىلىگى تاۋلىگىنە 43,5 ملن تەكشە مەترگە جەتەدى. گاز ايداۋشى اگرەگاتتاردى ىسكە قوسقاننان كەيىن قوناقتار كومپرەسسورلىق ستانسانى ارالاپ, جۇمىسىمەن تانىستى.
نازەركە سانيازوۆا, جۋرناليست
قىزىلوردا وبلىسى