ونىڭ ايتۋىنشا, سوڭعى 7 جىلدىڭ ىشىندە اۋە كولىگىمەن ترانزيتتىك جولاۋشىلار اعىنى شامامەن 20 ەسەگە ارتقان: 2010 جىلى 20 مىڭ ادامنان 2016 جىلى 478 مىڭ ادامعا دەيىن ءوسىم بايقالعان.
جەڭىس قاسىمبەك «Primeminister.kz» ءجۋرناليستىنىڭ ازاماتتىق اۆياتسياداعى ءترانزيتتى دامىتۋ تۋرالى سۇراعىنا جاۋاپ بەرە وتىرىپ, اۆياتسيالىق ترانزيت قازاقستان ەكونوميكاسىنىڭ ماڭىزدى قۇرامداس بولىكتەرىنىڭ ءبىرى بولىپ تابىلاتىنىن اتاپ ءوتتى. سەبەبى, ءاربىر ترانزيتتىك جولاۋشى قازاقستاندا شامامەن 600 دوللار قالدىرادى.
«ەگەر بارلىق كولىك شىعىندارىن الىپ تاستايتىن بولساق, ترانزيتتىك جولاۋشى ەلىمىزدە جارتى تاۋلىك نەمەسە تاۋلىك ۋاقىت بولاتىن بولسا, قازاقستاندا كەم دەگەندە 200-250 دوللار قالدىرادى», - دەدى مينيستر.
قازاقستاننىڭ اۋە كەڭىستىگى ارقىلى وتەتىن ترانزيتتىك ۇشۋ كولەمى جىل سايىن 6-7%-عا ارتىپ جاتىر. قازاقستان ارقىلى وتەتىن جولاۋشىلار اعىنى نەگىزىنەن مىنا باعىتتاردا: قىتايدان ەۋروپاعا, رەسەيگە جانە تۇركياعا, ەۋروپا مەن ءۇندىستان, وشا اراسىندا, ۋكراينا مەن وزبەكستان اراسىندا, قىرعىزستان مەن وڭتۇستىك كورەيا, ەۋروپادان وڭتۇستىك-شىعىس ازيا ارالىعىندا بايقالادى.
«بيىل شەت مەملەكەتتەردىڭ 130 مىڭعا جۋىق اۋە كولىگى قازاقستان ارقىلى ۇشادى دەپ كۇتۋدەمىز. قازاقستان ارقىلى اۋە ءترانزيتىن جۇرگىزۋدىڭ تارتىمدىلىعىن ارتتىرۋ ءۇشىن مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا 2017 جىلدىڭ سوڭىنا دەيىن 600 مىڭ ترانزيتتىك اۋە جولاۋشىلارىن, ال 2020 جىلعا دەيىن شامامەن 1,6 ملن ادامدى تاسىمالداۋ كوزدەلگەن», - دەدى ج. قاسىمبەك.
اتالعان كورسەتكىشتەرگە قول جەتكىزۋ ءۇشىن پيلوتتىق رەجيمدە ەكسپو-2017 كورمەسىن وتكىزۋ كەزىندە قازاقستاندىق اۋە كومپانيالارىمەن استانا جانە الماتى اۋەجايلارى ارقىلى كەلەتىن قحر ازاماتتارى ءۇشىن 72 ساعاتتىق ۆيزاسىز رەجيم ەنگىزىلگەن. ەلىمىزگە ۇشۋدىڭ تارتىمدىلىعىن ارتتىرۋعا ەىدۇ, ەو ەلدەرىنە, ءباا, مالايزيا, سينگاپۋر رەسپۋبليكاسى مەن موناكو كورولدىگىنىڭ (بارلىعى 45 ەل) ازاماتتارىنا ۆيزاسىز رەجيمنىڭ ەنگىزىلۋى ەلەۋلى ىقپالىن تيگىزەتىن بولادى.
ەكسپو كەزىندە استانادا اشىق اسپان رەجيمىنىڭ ەنگىزىلۋى وڭ سەپتىگىن تيگىزىپ جاتىر – حالىقارالىق باعىتتاردىڭ جيىلىگى ارتتى. مىسالعا, ۇشاقتار پەكين مەن لوندونعا كۇن سايىن ۇشا باستادى. سوڭعى ايدا 9 جاڭا باعدار اشىلدى.
«وڭ وزگەرىستەر بار. ءبىز وسى نارىقتا ۇلكەن ترانزيتتىك ەل رەتىندە لايىقتى ورنىمىزدى الامىز دەپ ەسەپتەيمىز», - دەدى ج. قاسىمبەك.