سالتاناتتى جيىن قىزمەتتىك مىندەتىن اتقارۋ كەزىندە قازا تاپقان پوليتسەيلەردىڭ ەسكەرتكىشىنە گۇل شوقتارىن قويۋمەن اشىلدى. ءار جىلداردا قانشاما پوليتسيا قىزمەتكەرى قاندىقول قىلمىسكەرلەردىڭ قولىنان قازا تاپتى. 2008 جىلى پوليتسەي قايرات جۇمابەكوۆ بالالاردى قۇتقارۋ ءۇشىن ءوز عۇمىرىن قيعان بولاتىن. جالعان دۇنيەمەن قوش ايتىسقان ءتارتىپ ساقشىلارىنا اسپانعا ءۇش مارتە وق اتىپ, ءبىر مينۋت ۇنسىزدىك جاريالاۋ ارقىلى قۇرمەت كورسەتىلدى.
«بيىل ءبىز كوپتەگەن جۇمىستاردى اتقاردىق. بىرنەشە قالالار مەن اۋدانداردا ىشكى ىستەر ورگاندارىنىڭ قىزمەتكەرلەرىنە ارنالعان مەموريالدىق تاقتالار مەن اسكەري داڭق مۇراجايلارى اشىلدى. مەن ءوز اتىمنان اتقارۋشى ورگاندار مەن دەپۋتاتتىق كورپۋسقا كورسەتكەن قولداۋلارى ءۇشىن زور العىس بىلدىرگىم كەلەدى. مەرەكە قارساڭىندا وبلىس اكىمى 103 ماشينانىڭ كىلتىن تابىستادى» – دەدى قاراعاندى وبلىسى ءىىد باستىعى مەرگەنباي جاپپاروۆ ءوز سوزىندە. ءسوز سوڭىندا ول قاراعاندى وبلىسى ءىىد جەكە قۇرامى قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ءۇشىن بارلىق كۇش-جىگەرىن سالاتىنىن تىلگە تيەك ەتتى.
ميراس اسان, «ەگەمەن قازاقستان»