قۇرىلتايدىڭ اشىلۋ سالتاناتىندا ءسوز سويلەگەن ەلباسى قۇرىلتاي الەمنىڭ تۇكپىر-تۇكپىرىندە تۇراتىن ەتنيكالىق قازاقتاردىڭ كەزدەسۋى مەن ديالوگ الاڭىنا اينالعانىن اتاپ ءوتتى.
"مەن دۇنيەجۇزى قازاقتارىنىڭ قۇرىلتايىنا قاتىسۋشىلاردىڭ بارلىعىنا "قوش كەلدىڭىزدەر!" دەيمىن. بۇل حالىقارالىق شاراعا 350-دەن استام دەلەگات قاتىسۋدا. ولاردىڭ بارلىعى قازىر قايدا تۇراتىنىنا قاراماستان, ولاردىڭ تاريحي وتانى - قازاقستان. قايدا جۇرسە دە قازاقتىڭ تاريحي وتانى بىرەۋ عانا. بۇگىنگى قۇرىلتايعا جاس بۋىن دا كەلدى. بۇل ولاردىڭ ءوز تامىرىن ۇمىتپاعانىن كورسەتەدى. ول ءۇشىن اتا-انالارىنا العىس بىلدىرەمىن. ولار تۋعان جەرمەن بايلانىستى نىعايتىپ, ءداستۇرى مەن ءتىلدى ۇمىتپاۋ ءۇشىن قولدارىنان كەلگەنىن ىستەۋدە", دەدى پرەزيدەنت.
ەلباسى قۇرىلتايدى "بولاشاقتىڭ ەنەرگياسى" تاقىرىبىمەن ءوتىپ جاتقان كورمەمەن تۇسپا-تۇس كەلگەنىن اتاپ ءوتتى.
ء«بىز ادەيى وسىلاي ورايلاستىردىق. سەبەبى بۇل قازاقستاننىڭ مەرەيىن اسىرىپ, كۇللى الەمنىڭ نازارىن اۋداراتىن ۇلكەن شارا بولىپ وتىر. ءبىز باۋىرلارىمىزدى اتاجۇرتىنىڭ بۇگىنگى كەلبەتىن كورىپ, مارقايسىن, وي ءتۇيسىن دەپ سىزدەردى ەكسپو-عا وراي شاقىردىق. مىناۋ بار بولعانى ون بەس جىلدىڭ ىشىندە بوي كوتەرىپ, دۇنيەنى تاڭداندىراتىن ەلوردامىز», - دەدى نۇرسۇلتان نازارباەۆ.
قۇرىلتاي بارىسىندا مەملەكەت باسشىسىنىڭ "بولاشاققا باعدار: رۋحاني جاڭعىرۋ" ماقالاسىندا ايتىلعان يدەيالارى تالقىلانادى دەپ جوسپارلانۋدا. سونىمەن قاتار قۇرىلتاي اياسىندا ۇلتتىق اكادەميالىق كىتاپحانادا بەلگىلى ءدىنتانۋشى-عالىمنىڭ 100 جىلدىعىنا ارنالعان «حاليفا التاي جانە تاريحتىڭ ورالۋى» اتتى حالىقارالىق عىلىمي-تاجىريبەلىك كونفەرەنتسيا وتەدى. ءدىن ىستەرى جانە ازاماتتىق قوعام, ءبىلىم جانە عىلىم, اقپارات جانە كوممۋنيكاتسيالار, مادەنيەت جانە سپورت, دەنساۋلىق ساقتاۋ مينيسترلىكتەرى قۇرىلتايدىڭ شەتەلدىك قوناقتارىمەن «دوڭگەلەك ۇستەل» وتىرىسىن ۇيىمداستىرۋدى جوسپارلاۋدا. سونىمەن قاتار قۇرىلتاي دەلەگاتتارى مەن قوناقتارى «ەكسپو-2017» حالىقارالىق كورمەسىمەن تانىسىپ, ەتنواۋىلدى ارالايدى جانە «استانا وپەرا» تەاترىندا ۇلتتىق مۋزىكامىزدىڭ التىن قورىنا ەنگەن ەۆگەني برۋسيلوۆسكيدىڭ «قىز جىبەك» وپەراسىن تاماشالايتىن بولادى. قۇرىلتاي جۇمىسىنا بارلىعى 750 دەلەگات پەن قوناق قاتىسۋدا. ونىڭ 350-ءى الەمنىڭ 39 ەلىنەن كەلدى. دۇنيەجۇزى قازاقتارى قۇرىلتايىنىڭ ءباسپاسوز ورتالىعىندا 150 وتاندىق جانە شەتەلدىك باق وكىلدەرى اقپارات تاراتۋدا.
ەستەرىڭىزگە سالا كەتسەك, دۇنيەجۇزى قازاقتارى قۇرىلتايى 1992 جىلدان بەرى وتكىزىلىپ كەلەدى.
گۇلنۇر قۋانىشبەكقىزى,
سۋرەتتى تۇسىرگەن ەرلان وماروۆ,
"ەگەمەن قازاقستان"