«قازاقستان – نيدەرلاندىنىڭ حالىقارالىق قاۋىپسىزدىك ماسەلەلەرى جونىندەگى اسا ماڭىزدى سەرىكتەسى. ەكسپو-2017 كورمەسى جاسىل ەنەرگەتيكا تاقىرىبىنا ارنالىپ وتىرعانى بەلگىلى. ءبىز بىرلەسە كۇش جۇمىلدىرا وتىرىپ, وسى سالادا وزىق شەشىمدەردى تاباتىنىمىزعا سەنىمدىمىن», – دەپ اتاپ ءوتتى مينيستر ءوز سوزىندە. سونىمەن قاتار, نيدەرلاندىنىڭ ۇلتتىق كۇنىنە ورايلاستىرىلعان باستى شارا Holland Innovation Challenge اتتى ەكولوگيالىق بايقاۋىنىڭ قورىتىندىسىن جاريالاۋ بولاتىن. نيدەرلاندىنىڭ ەكسپو-2017 كورمەسىنە قاتىسۋى اياسىندا ۇيىمداستىرىلعان بۇل جاستار جوباسىن تولىعىمەن ەلدىڭ سىرتقى ىستەر مينيسترلىگى قارجىلاندىرعانىن ايتا كەتكەن ءجون. 2016 جىلدىڭ قازان ايىنان باستاپ 6 كوماندا ەكسپو-2017 تاقىرىبى اياسىندا 4 نيدەرلاندىلىق كومپانياعا ارناپ جاڭا بيزنەس-تۇجىرىمدامالار دايىنداۋ ماقساتىندا جۇمىس جۇرگىزگەن بولاتىن. ءار كوماندا قۇرامىندا ەكى قازاقستاندىق جانە ەكى نيدەرلاندىلىق ستۋدەنت بىرلەسە جۇمىس اتقارعانىن اتاپ ءوتۋ قاجەت. قازاقستان تاراپىنان نارحوز ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتىنىڭ ستۋدەنتتەرى, ال نيدەرلاندى تاراپىنان ۆاگەنينگەن ۋنيۆەرسيتەتىنىڭ (Wageningen), ۋترەحت ۋنيۆەرسيتەتىنىڭ (Utrecht university) جانە گرونينگەن ۋنيۆەرسيتەتىنىڭ (Groningen university) ستۋدەنتتەرى قاتىستى. جوبا نيدەرلاندتىڭ كاسىپكەرلىكتى قولداۋ جونىندەگى اگەنتتىگىمەن (RVO) بىرلەسە وتىرىپ جۇزەگە اسىرىلدى. نيدەرلاند ەكونوميكا ءمينيسترى حەنك كامپ جەڭىمپاز كومانداعا جۇلدەنى تابىستاپ, قازىلار القاسىنىڭ تاڭداۋىنا بايلانىستى پىكىرىن ءبىلدىردى. «قازىلار القاسى Aquamotion كومانداسىنىڭ جۇمىسىن بىرنەشە سەبەپتەرگە بايلانىستى تاڭدادى: بىرىنشىدەن, كوماندانىڭ يدەياسى اسا وزەكتى ءارى ەكسپو-2017 تاقىرىبىنا سايكەس كەلەدى; ەكىنشىدەن, ولاردىڭ ۇسىنعان تۇجىرىمداماسى يننوۆاتسيالىق جوباعا جاتادى, ولار دۇرىس شەشىمدى تابۋ ءۇشىن تالاي ماسەلەلەردى زەرتتەپ شىعۋى كەرەك بولدى; ۇشىنشىدەن, كوتەرىلگەن ماسەلە, ياعني تازا اۋىز سۋىنا قول جەتكىزۋ – الەۋمەتتىك ماڭىزعا يە بولعاندىقتان, قوعام مەن ەل ازاماتتارى ءۇشىن اسا قاجەت. سول سەبەپتى ءبىز بايقاۋ جۇلدەسىن وسى كومانداعا تابىستاۋدى ۇيعاردىق», – دەپ اتاپ ءوتتى مينيستر.
ايدار ورىسباەۆ, «ەگەمەن قازاقستان»