بىلىمدەرىن لايىقتى قورعاۋدا
«اتىراۋدا بيىل مەكتەپ بىتىرگەن 4516 تۇلەكتىڭ 70 پايىزى ۇبت تاپسىرۋعا ءوتىنىش بەردى. تالاپكەرلەردىڭ العاشقى لەگى حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە, اتىراۋ مۇناي جانە گاز ۋنيۆەرسيتەتىندە جانە ماقات اۋدانىنىڭ دوسسور كەنتىندە بىلىمدەرىن ساراپقا سالدى. «ۇبت-نى ۇيىمداستىرۋ اياسىندا 9 تەست وتكىزۋ بولىمشەسى جۇمىس ىستەيدى. ەكەۋى – وبلىس ورتالىعىندا, جەتەۋى – اۋىلدىق ەلدى مەكەندەردە. تەست وتكىزۋدىڭ ادىلدىگىن قامتاماسىز ەتۋ ماقساتىندا عيماراتتار ءتيىستى تەحنيكالىق قۇرالدارمەن تولىق قامتىلدى. سىناق تاپسىرۋدىڭ العاشقى كۇنىنە 1128 مەكتەپ تۇلەگى قاتىستى. بيىل وبلىستا 97 وقۋشى «التىن بەلگى», 81 وقۋشى «ۇزدىك اتتەستات» يەگەرى اتاندى. ولاردىڭ ءبارى دە ءوز بىلىمدەرىن لايىقتى قورعاپ شىعادى دەگەن سەنىمدەمىز», دەيدى وبلىستىق ءبىلىم بەرۋ باسقارماسىنىڭ باسشىسى نۇرساۋلە سايلاۋوۆا. ۇبت ورتالىعىنىڭ №30 فيليال جەتەكشىسى ايناگۇل دۇيسەكەنوۆانىڭ ايتۋىنشا, تۇلەكتەردىڭ سىناق تاپسىرۋ بارىسىن ءبىلىم جانە عىلىم مينيسترلىگىنەن كەلگەن ارنايى وكىلدەر مەن مەملەكەتتىك كوميسسيا مۇشەلەرى باقىلايدى. العاشقى لەكتىڭ قورىتىندىسى بويىنشا ەڭ جوعارى بالدى اتىراۋ قازاق-تۇرىك ليتسەيىنىڭ وقۋشىسى نۇرجان شىڭعىس جينادى. 128 سۇراقتىڭ دۇرىس شەشىمىن تاپقان ول ءبىلىم سىناعىنا تياناقتى دايىندالعانىن ايتادى. مۇنايلى ايماقتا ۇبت 21-26 ماۋسىم ارالىعىندا وتەدى. اتىراۋدان – باقىتگۇل باباش
جوعارى كورسەتكىش, جاقسى كوڭىل كۇي
جامبىل وبلىسىندا ۇلتتىق بىرىڭعاي تەستىلەۋگە قاتىسۋشىلار 7 پۋنكت بويىنشا ەمتيحان تاپسىردى. ياعني, العاشقى كۇنى 2190 بالا ۇلتتىق بىرىڭعاي تەستىلەۋگە قاتىسىپ, ناتيجەسىندە 442 ءبىتىرۋشى 100-دەن جوعارى بالل الدى. سونداي-اق, 21 ماۋسىم كۇنى دە تەستىلەۋدەن 713 ءبىتىرۋشى وتكەن بولسا, 130 بالانىڭ 100-دەن اسا بالل جيناعانى بەلگىلى بولدى. ەكى كۇندىك ناتيجە بويىنشا وبلىستا جالپى 2903 تۇلەك ۇبت تاپسىرىپ, بارلىعى 572 ءبىتىرۋشى جۇزدەن جوعارى بالل يەلەندى. وبلىستىق ءبىلىم باسقارماسىنىڭ باس مامانى جاننا قالىباەۆا تەستىلەۋگە وبلىستاعى مەكتەپ بىتىرۋشىلەردىڭ 70 پايىزىنىڭ قاتىسقانىن, سەبەبى ۇلتتىق بىرىڭعاي تەستىلەۋدى جوعارى وقۋ ورنىنا باراتىندار عانا تاپسىراتىنىن ايتتى. بۇل كۇنى مىڭداعان تۇلەكتەردىڭ ءبىلىم دارەجەسى ايقىندالدى. ەكى كۇندىك قورىتىندى بويىنشا ەكى وقۋشىنىڭ ۇزدىك ءبىلىم كورسەتكەنىن دە ايتا كەتۋ كەرەك. مەجەلى بالل بيىل 140 ەكەنىن ەسكەرسەك, سوعان جەتەقابىل كورسەتكىش يەلەنگەن بىتىرۋشىلەر وڭىردەگى ءبىلىم باسەكەسىنىڭ جوعارى كورسەتكىشى مەن ناقتى ناتيجەسىنە ۇلەس قوستى. جامبىل اۋدانى بەساعاش اۋىلى اباي اتىنداعى ورتا مەكتەپتىڭ تۇلەگى اقبوتا شادىحان 134 بالل السا, تاراز قالاسىنداعى №49 مەكتەپ-گيمنازيانىڭ ءبىتىرۋشىسى سىمبات ءسۇيىرحانوۆا 133 بالل دەڭگەيىندە ءبىلىمىن دالەلدەپ شىقتى. تەستىلەۋ جۇمىستارى وڭىردە 25 ماۋسىمعا دەيىن جالعاسادى. قالعان كۇندەردە دە جۇزدەن جۇيرىك شىققان بىتىرۋشىلەردىڭ كورىنۋى ابدەن مۇمكىن. بۇگىندە 134 بالل الىپ وتىرعان اقبوتانىڭ ارمانى اسقاق. بەساعاش اۋىلىندا وقىپ, سوندا مەكتەپ بىتىرگەن ول ءبىر جىل بويى مەكتەپتەن تىس تاراز قالاسىنداعى «دوستىق» ءبىلىم بەرۋ ورتالىعىندا ءبىلىمىن جەتىلدىرگەن ەكەن. سونداي-اق, جاس تۇلەك ەلباسى جولداۋىندا ايتىلعان ءبىلىم سالاسىنا دا ايتۋلى ۇلەس قوسۋدى ءوزىنىڭ ماقساتى سانايدى. «بالا كۇنىمنەن وتاندىق مەديتسينانى دامىتۋ جولىندا ەڭبەك ەتۋدى ارماندادىم. سونىڭ ىشىندە حيرۋرگيا سالاسى مەنى ەرەكشە قىزىقتىردى. ەندى قاراعاندى قالاسىنداعى مەديتسينا اكادەمياسىنا وقۋعا ءتۇسىپ, ءبىلىمىمدى ء ارى قاراي دامىتسام دەيمىن. تاعى ءبىر ايتا كەتەرلىگى, بيىلعى ۇلتتىق بىرىڭعاي تەستىلەۋ جىلداعىدان وزگەشە بولدى. سەبەبى, ءاربىر تۇلەكتىڭ ەكىنشى ماماندىق تاڭداۋىنا مۇمكىندىگى بار. بۇل دا جاستاردىڭ ءبىلىم باسەكەسىندە ءوز جولىن تابۋىنا سەپتىگىن تيگىزەدى», دەيدى ا.شادىحان. تارازدان – حاميت ەسامان
136 بالل جينادى
شىعىس قازاقستاندا ۇبت 20-24 ماۋسىم ارالىعىنا جوسپارلانعان. وبلىستىق ءبىلىم باسقارماسىنىڭ ۇسىنعان مالىمەتتەرىنە جۇگىنسەك, بيىل وڭىردە 8989 وقۋشى مەكتەپ ءبىتىرىپ, ونىڭ 7000-عا جۋىعى ۇبت تاپسىرۋعا تىلەك بىلدىرگەن كورىنەدى. «وبلىس بويىنشا 20-22 ماۋسىم ارالىعىندا 3858 مەكتەپ ءبىتىرۋشى ۇبت-عا قاتىستى. 20-21 ماۋسىم كۇندەرى جالپى سانى 2106 وقۋشى (قازاق تىلىندە – 1102, ورىس تىلىندە – 1004) تەست تاپسىردى. بۇگىن 3 مىڭنان استام, ەرتەڭ 420 وقۋشى سىناقتان وتەدى دەپ جوسپارلانعان», دەيدى وبلىستىق ءبىلىم باسقارماسىنىڭ مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باس مامانى ءراۋيا حالەنوۆا. ۇبت تاپسىرىلعان ءۇش كۇندەگى ەڭ جوعارى بالل وسكەمەن قالاسىنداعى دارىندى بالالارعا ارنالعان مامانداندىرىلعان وبلىستىق مەكتەپ-ليتسەي-ينتەرناتىنىڭ تۇلەگى ريزا بوكەيحانوۆانىڭ ەنشىسىندە – 136 بالل. اتالعان ءبىلىم ورداسىنىڭ ديرەكتورى ايگۇل ابدۋلدينا شاكىرتىنىڭ بيولوگيا ءپانىن تاڭداعانىن, سەمەي مەن استانا قالاسىنداعى مەديتسينالىق اكادەميانىڭ بىرىنە وقۋعا تۇسپەك ويى بار ەكەنىن ايتتى. ۇبت وبلىس ورتالىعىنداعى ەكى جوعارى وقۋ ورنىندا وتكىزىلىپ جاتىر. وڭىردەگى ۇلتتىق بىرىڭعاي تەستىلەۋ ورتالىعىنىڭ جەتەكشىسى سايراش يسكاكوۆا س.امانجولوۆ اتىنداعى شقمۋ-دە 21 ماۋسىمداعى العاشقى لەكتەگى تەستىلەۋ سىناعىنىڭ ءساتتى وتكەنىن, بۇل كۇنى 501 وقۋشى تەست تاپسىرعانىن جەتكىزدى. وسكەمەننەن – ازامات قاسىم