اشىلۋ سالتاناتىندا العاش بولىپ ءسوز العان قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا فورۋمعا قاتىسۋشىلارعا پرەزيدەنت نۇرسۇلتان نازارباەۆتىڭ قۇتتىقتاۋ حاتىن وقىپ بەردى. ونىڭ ايتۋىنشا, پرەزيدەنت مەديا فورۋم تەك جۋرناليستىك ورتادا ەمەس, جاھاندىق پروبلەماتيكانى شەشۋ جولىندا دا تابىستى جۇمىس اتقارىپ كەلەتىنىن جازعان.
""الەم درامالىق وزگەرىستەردى باسىنان وتكەرىپ جاتقان قازىرگى زامانعى جاعدايدا وسىنداي ديالوگ الاڭدارىنىڭ قاجەتتىلىگى ارتىپ كەلەدى. الەمدىك كونتەكستە باسقا كوزقاراستارعا قۇرمەتپەن قارايتىن تەك اشىق ديالوگ قانا ميلليونداعان ادامداردىڭ وزەكتى پروبلەمالارىن شەشۋ ءۇشىن جاھاندىق سەنىمدى قالپىنا كەلتىرۋ باعدارى بولادى. بۇقارالىق اقپارات قۇرالدارى وسى پروتسەستىڭ كوشباسشىسى بولۋى ءتيىس جانە ءوزىنىڭ كۇش-جىگەرىن جاڭا كەدەرگىلەردى قويۋعا ەمەس, كەرىسىنشە, حالىقتار مەن ەلدەردى بىرىكتىرۋگە شوعىرلاندىرۋى كەرەك. الەم جاڭا اقپاراتتىق ورتانى قالىپتاستىرۋ داۋىرىنە اياق باستى. ءبىز سەرىكتەستىك پەن ءبىلىم الماسۋدى ىنتالاندىرۋى ءۇشىن قولىمىزدان كەلگەنشە ارەكەت ەتۋىمىز قاجەت", - دەپ اتاپ وتىلگەن مەملەكەت باسشىسىنىڭ سوزىندە.
پرەزيدەنت 15 جىلدىڭ ىشىندە ەۋرازيا مەديا فورۋمى لايىقتى بەدەلگە يە بولعانىن جەتكىزدى. "سونىمەن قاتار الداعى الەۋمەتتىك جانە تەحنولوگيالىق وزگەرىستەرگە دايىندىق تۇراقتى دامۋدىڭ ايقىنداۋشى فاكتورى بولادى. وسىعان بايلانىستى فورۋمنىڭ كۇن تارتىبىنە تەحنولوگيالىق ءتارتىپتىڭ وزگەرۋىندە نەگىزگى باعىتى رەتىندە "جاسىل" ەكونوميكا ماسەلەلەرىنىڭ ەنگىزىلۋى سيمۆولدىق مانگە يە. بۇل ءوز كەزەگىندە, استانادا ءوتىپ جاتقان ەكسپو-2017 كورمەسىنىڭ تاقىرىبىنا ۇندەس", - دەپ اتاپ وتكەن ەلباسى.
ەستەرىڭىزگە سالا كەتسەك, ەامف 2002 جىلى داريعا نازارباەۆانىڭ باستاماسىمەن بەيساياسي ءارى كوممەرتسيالىق ەمەس ۇيىم رەتىندە قۇرىلدى. فورۋم باتىس پەن شىعىستى تولعاندىراتىن كوكەيكەستى ماسەلەلەردى اشىق تالقىلاۋعا باعىتتالعان. اتالعان ءىس-شارا جىل سايىن الەمنىڭ 60-تان استام مەملەكەتىنەن حالىقارالىق جانە قازاقستاندىق باق وكىلدەرىن, ساياساتكەرلەر مەن ساراپشىلارىن ءبىر الاڭعا جيناپ كەلەدى. XIV ەۋرازيالىق مەديا فورۋمنىڭ كۇن تارتىبىندە "بولاشاقتىڭ ەنەرگياسى", "جاڭا الەمدىك ءتارتىپ", "ازيا "ەكونويمكالىق كەرەمەت" قۇپياسى", "سيريا داعدارىسى", "تسيفرلىق رەۆوليۋتسيا" تاقىرىپتارى تالقىلانباق. فورۋمعا تۇركيانىڭ ەكس-پرەزيدەنتى ابدۋللا گۇل, ەۋروپالىق كوميسسيانىڭ ەكس-پرەزيدەنتى جوزە مانۋەل بارروزۋ, «Russia Today» تەلەارناسىنىڭ جۇرگىزۋشىسى سوفيكو شەۆاردنادزە, «The Futures Agency» باسشىسى (شۆەيتساريا) گەرد لەونارد, CNN تەلەكومپانياسىنىڭ ۆيتسە-پرەزيدەنتى ( ۇلىبريتانيا) گرەگ بەيچمان, نوبەل سىيلىعىنىڭ لاۋرەاتى رادجەندرا پاچاۋري, اقش-تىڭ بۇۇ-داعى بۇرىنعى ەلشىسى بيلل ريچاردسون, قازاقستان تاراپىنان اقپارات جانە كوممۋنيكاتسيالار ءمينيسترى داۋرەن اباەۆ, "استانا" حالىقارالىق قارجى ورتالىعىنىڭ باسشىسى قايرات كەلىمبەتوۆ, سىرتقى ىستەر ءمينيسترى قايرات ءابدىراحمانوۆ جانە باسقا دا بەلگىلى ساياساتكەرلەر مەن ساراپشىلار قاتىسۋدا.
گۇلنۇر قۋانىشبەكقىزى,
"ەگەمەن قازاقستان"
سۋرەتتەردى تۇسىرگەن ورىنباي بالمۇرات,
"ەگەمەن قازاقستان"