القالى باسقوسۋدى «قىزىلجار-اقپارات» جشس-ءنىڭ ديرەكتورى-باس رەداكتورى جاراسباي سۇلەيمەنوۆ جۇرگىزىپ وتىردى. ول كىرىسپە سوزىندە جۇرتشىلىق اراسىندا ۇلكەن سەرپىلىس تۋدىرعان ماقالا قوعامدا جان-جاقتى تالقىلانىپ, كەڭ قولداۋ تاپقانىن, ەندىگى ماقسات وندا قويىلعان تالاپتاردى جۇزەگە اسىرۋدىڭ تەتىكتەرىن جان-جاقتى قاراستىرۋدىڭ ماڭىزدىلىعىن اتاپ ءوتىپ, العاشقى ءسوزدى «ۇركەر» جۋرنالىنىڭ باس رەداكتورى, حالىقارالىق «الاش», «سوروس-قازاقستان» سىيلىقتارىنىڭ لاۋرەاتى قۋاندىق تۇمەنبايعا بەردى. بەلگىلى جازۋشى قىزىلجاردىڭ قۇيقالى توپىراعىنان ماعجان, ءسابيت, عابيت, يۆان شۋحوۆ, سافۋان شايمەردەنوۆ سەكىلدى قارىمدى قالامگەردىڭ ءوسىپ-ونگەنىن, ولاردىڭ كەلەر ۇرپاققا اماناتتاعان مول مۇرالارى قۇندىلىعىن ەشقاشان جوعالتپايتىنىن ايتا كەلىپ, پرەزيدەنتتىڭ «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس» دەنەن پايىمدارىنا جۇرتشىلىق نازارىن اۋداردى. رۋحاني جاڭعىرۋ بۇگىن باستالىپ, ەرتەڭ اياقتالاتىن جۇمىس ەمەس. ونى ساياسي, ەكونوميكالىق دامۋىمىزبەن ساباقتاستىرۋ ءۇشىن,ەڭ الدىمەن, ءار قازاقستاندىقتىڭ بويىندا ءبىرتۇتاس ۇلت بولۋ يدەياسىن قالىپتاستىرۋىمىز كەرەك. بۇل ورايدا, جاس بۋىن تاربيەسى ەرەكشە ورىن الادى. ماقالادا «جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت. سەبەبى, قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى» دەلىنگەن. سانا-سەزىمىمىز بەن دۇنيەتانىمىمىزعا ابدەن ءسىڭىپ قالعان تاپتاۋرىن قاعيدالاردان ارىلۋدىڭ بىردەن-ءبىر جولى – ساناداعى سىلكىنىس. ول وزدىگىنەن كەلمەيدى. زامان اعىمىنا يكەمدەلە وتىرىپ, جاڭا ءداۋىردىڭ جاعىمدى جاقتارىن بويعا ءسىڭىرۋ – الداعى باستى مىندەت وسى. ودان ءارى قالامگەر ءوز سوزىندە تاياۋ جىلدارداعى مىندەتتەردىڭ ىشىنەن قازاق ءتىلىن بىرىندەپ لاتىن الىپبيىنە كوشىرۋدىڭ قادامدارىن قازىرگى زامانعى تەحنولوگيالىق دامۋ ماسەلەلەرىمەن, الەمدىك تاجىريبەلەرمەن بايلانىستىرىپ, مۇقيات دايىندىقتار بازاسى جاسالعانىن ايتتى. «پروستور» جۋرنالى باس رەداكتورىنىڭ ورىنباسارى, اۋدارماشى ليۋبوۆ شاشكوۆا ساناداعى سىلكىنىستى يدەلوگيالىق جاعىنان قامتاماسىز ەتۋ, ۇلتتىق بولمىستىڭ وزەگىن ساقتاۋ, سالت-داستۇرلەردى, ۇلتتىق رۋحىمىزدى بايىتۋ ماسەلەلەرىن ءوز سوزىنە ارقاۋ ەتتى. «قازاقستانداعى 100 جاڭا ەسىم» جوباسىنىڭ ءمان-ماعىناسىن اشىپ كورسەتىپ, دايەكتى مىسالدار كەلتىردى. تاۋەلسىزدىك جىلناماسى ناقتى ادامداردان, سان قيلى تاعدىرلاردان, جاسامپاز ەڭبەكتەن قۇرالادى. ونداي تۇلعالار ەلىمىزدە از ەمەس. ونىڭ وڭىرلىك نۇسقالارى دا جاسالىپ جاتسا, جاستارىمىزعا ۇلگى بولار ەدى. جيىندا وبلىستىق قازاقستان حالقى اسسامبلەياسىنىڭ حاتشىلىق مەڭگەرۋشىسى نايل ساليموۆ, «لاد» سلاۆيان قوعامىنىڭ جەتەكشىسى الەكساندر كۋرلەنيا, قازاقستان جازۋشىلار وداعىنىڭ مۇشەسى, جۋرناليست-پۋبليتسيست زەينوللا اكىمجانوۆ, جەرگىلىكتى اقىن ۆاسيلي كونوپلەۆ تاعى باسقالارى ەلباسى ۇسىنعان باعدارلامالار مەن جوبالار جۇرتشىلىق كوڭىلىنەن شىققانىن, ەندىگى ماقسات جاڭا جاعدايداعى رۋحاني جاڭعىرۋ يدەيالارىن دامۋىمىزدىڭ باستى قاعيداسىنا اينالدىرۋ تيىستىلىگىن اتاپ كورسەتتى.
ءومىر ەسقالي, «ەگەمەن قازاقستان» سولتۇستىك قازاقستان وبلىسى