«استانا كورمەسىنىڭ كۇن تارتىبىنە «بولاشاقتىڭ ەنەرگياسى» تاقىرىبىنىڭ ۇسىنىلۋى كەزدەيسوق ەمەس» دەيدى ول اڭگىمەلەسكەنىمىزدە. ول وندىرىسكە عىلىم جاڭالىقتارىن ەنگىزۋدىڭ جولدارىن تالماي قاراستىرادى. توپىراقتى وڭدەۋدىڭ, شابىندىقتاردى سۋارۋدىڭ, بيداي, كارتوپ ءوسىرۋدىڭ, اسىل تۇقىمدى سەلەكتسيالىق جۇمىستاردىڭ وزىق تەحنولوگيالارىن العاشقىلاردىڭ قاتارىندا پايدالاندى.
ءبىر ارمانى جاڭارتىلعان ەنەرگيا تۇرلەرىن قاراپايىم تۇرمىستا قولدانۋ بولاتىن. وسى ماقساتىن ىسكە اسىرۋ ءۇشىن جاتپاي-تۇرماي ىزدەنىپ, اقىرى جەل-ەنەرگەتيكالىق قوندىرعىسىن ورناتۋ قاجەت دەپ شەشكەن. وعان شارۋاشىلىق ەسەبىنەن 420 ميلليون تەڭگە جۇمساپ, جالپىۇلتتىق تەلەكوپىردە تۇساۋىن ەلباسىنىڭ ءوزى كەستى. بۇگىنگى كۇنى جەلدەن قۋات كوزىن الاتىن ەكى ەنەرگەتيكالىق قۇرىلعى تۇراقتى جۇمىس ىستەپ تۇر. بىلتىر 1,3 ملن كۆت ەنەرگيا ءوندىرىلىپ, كورشى اۋىلداردى دا قامتاماسىز ەتتى. جەلدەن جارىق الۋ قاي جاعىنان بولسىن وتە ءتيىمدى ەكەنىن وسىلايشا دالەلدەدى.
گەننادي گەننادەۆيچتىڭ سوزىنە الىپ-قوسارىمىز جوق. ەلىمىز ءداستۇرلى ەنەرگەتيكالىق رەسۋرستارعا كەندە بولماسا دا, بالامالى ەنەرگيا كوزدەرىن پايدالانۋ ارقىلى «جاسىل ەكونوميكا» قۇرۋ باعىتىنا باسىمدىق بەرۋىنىڭ ءبىر سەبەبى زياندى زاتتاردىڭ قورشاعان ورتاعا كەلتىرەر زالالىن تومەندەتۋ بولسا كەرەك. ونىڭ ۇستىنە بۇگىنگىدەي جاھاندانۋ ۇردىسىندە ەڭ ۇزدىك تەحنولوگيالىق جەتىستىكتەرسىز العا باسۋ مۇمكىن ەمەس. حالىقتىق, ۇلتتىق ءداستۇر مەن مادەنيەتتەگى جاڭا سيپاتتار دا كورمەنىڭ باستى تاقىرىپتارىنىڭ ءبىرى ەكەنى داۋسىز. دەمەك, سان-سالالى اۋقىمدا ءوربيتىن كورمەنىڭ ۇسىنارى كوپ بولماق.
سول سياقتى, قازاقستان ءۇشىن بيىلعى جىلعى باستى وقيعاعا بالاناتىن ايتۋلى شاراعا «بيوتەس», «تايىنشا-استىق», «ۋگلجوگ», «رادۋگا» سەكىلدى كاسىپورىندار دا قاتىسىپ, ءوز جەتىستىكتەرىن جارنامالايتىن بولادى.
جالپى, سولتۇستىكقازاقستاندىقتار قاي جاعىنان بولسىن حالىقارالىق كورمەگە جان-جاقتى دايىندىقتارمەن كەلگەنىن ايتا كەتكەن ءجون. ول تۋرالى كاسىپكەرلىك جانە تۋريزم باسقارماسىنىڭ باسشىسى قۇرالاي جاروۆا اڭگىمەلەپ بەردى. ونىڭ ايتۋىنشا, 100 مىڭعا جۋىق سولتۇستىكقازاقستاندىق كورمەنى كەزەڭ-كەزەڭىمەن قىزىقتاماق, ولاردىڭ بەستەن ءبىرى– بالالار مەن زەينەتكەرلەر. مەكتەپ وقۋشىلارى ءۇشىن جەرگىلىكتى قازىنادان قاراجات ءبولىنىپ, ارنايى كولىكتەر بولىنگەن. كوپ بالالى وتباسىلارعا, جەتىم بالالارعا جەڭىلدىكتەر جاسالعان.
اگروقۇرىلىمدار دا ءوز تارتۋ-تارالعىلارىمەن بارىپ جاتىر. بۇل كۇندەرى اۋىلشارۋاشىلىق جارمەڭكەلەرى ۇيىمداستىرىلىپ, استانالىقتار مەن مەيماندارعا 2851 توننا ازىق-ت ۇلىك تۇرلەرى, ەت, ءسۇت ونىمدەرى قولجەتىمدى باعاعا ۇسىنىلادى. ال, مادەنيەت كۇندەرى اياسىندا ونەر ۇجىمدارىنىڭ كونتسەرتتىك باعدارلامالارى تاماشالانادى. «ەتنواۋىل» ۇلتتىق-مادەني كەشەنىن قىزىقتاۋشىلار قاتارى قالىڭ بولارى ءسوزسىز.
ءبىر سوزبەن ايتقاندا, الەمدىك اۋقىمدا اتاپ وتىلەتىن ەكسپو-2017 حالىقارالىق كورمەسى تەحنيكالىق جەتىستىكتەرمەن, بالامالى ەنەرگيا كوزدەرىنىڭ مولدىعىمەن, رۋحتى جاڭارتۋدىڭ, عىلىمعا ۇمتىلۋدىڭ ماڭىزدىلىعىمەن نازار اۋدارارى انىق.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى