ساۋديانىڭ SPA اقپاراتتىق اگەنتتىگى حابارلاعانداي, ەر-رياد كاتارمەن اراداعى شەكارانى جاۋىپ, جەردەگى, تەڭىزدەگى جانە اۋە قاتىناستارىنىڭ ءبارىن ءۇزدى. وسىلايشا دوحانى ايتارلىقتاي وقشاۋلاپ تاستادى. اگەنتتىك ءسوزىن كەلتىرگەن ساۋد ۇكىمەتى وكىلىنىڭ ايتۋىنشا, بۇل قادامدار ەلدىڭ ۇلتتىق مۇددەسىن تەرروريزم مەن ەكسترەميزم قاۋىپتەرىنەن قورعاۋ ماقساتىندا جاسالىپ وتىر.
ۆۆس بۇل جاعدايدى پارسى شىعاناعىنداعى ىقپالدى جانە اقش-پەن وداقتاس ەلدەر اراسىنداعى اسا ءىرى تەكەتىرەس دەپ باعالايدى.
بۇدان ەكى اپتا بۇرىن اتالعان ءتورت ەل كاتاردىڭ اقپارات سايتتارىن بۇعاتتاپ تاستاعان بولاتىن. ول كەزدە ينتەرنەتتە كاتار ءامىرى شەيح تاميم بين حاماد ءال-تانيدىڭ ساۋد ارابياسىن سىناعانى تۋرالى ماتەريالدار پايدا بولعان-دى. الايدا, كاتار وكىمەتى ولاردى جالعان دەپ مالىمدەدى.
ال قازىرگى وقيعالار مىناداي.
بىرىككەن اراب امىرلىكتەرى كاتار ديپلوماتتارىنا ەلدەن كەتۋگە 48 ساعات بەردى. ءابۋ-دابي دوحانى تەرروريزمدى, ەكسترەميزمدى جانە سەكتانتتىق ۇيىمداردى قولداپ, قارجىلاي كومەك بەرەدى دەگەن ايىپ تاعادى دەپ حابارلادى WAM اقپارات اگەنتتىگى. ءباا-ءنىڭ مەملەكەتتىك Etihad Airways اۋە كومپانياسى جەرگىلىكتى ۋاقىت بويىنشا سەيسەنبى ساعات 02:45-تەن باستاپ دوحاعا رەيستەردىڭ ءبارىن توقتاتاتىنىن حابارلادى. باحرەيننىڭ ۇكىمەتتىك اقپارات اگەنتتىگى ەلدىڭ ىشكى ىسىنە ارالاسىپ, قاۋىپسىزدىك پەن تۇراقتىلىققا قاۋىپ ءتوندىرىپ وتىرعانى ءۇشىن باحرەيننىڭ دوحامەن اراداعى بايلانىستاردى ۇزەتىنىن حابارلادى. اقش مەملەكەتتىك حاتشىسى رەكس تيللەرسون سيدنەيدە سويلەگەن سوزىندە ماسەلەلەردى ديالوگ ارقىلى شەشۋگە شاقىردى. كاتار يەمەندە حۋتۋ كوتەرىلىسشىلەرىمەن سوعىسىپ جاتقان ساۋد ارابياسى باستاعان كواليتسيا قۇرامىنان دا شىعارىلدى. ويتكەنى, SPA اگەنتتىگىنىڭ حابارى بويىنشا, اليانس كاتاردى تەرروريزمدى كۇشەيتەتىن ادىستەردى قولدانادى جانە ءال-كايدا, دايش سياقتى توپتاردى قولدايدى, سونىمەن قاتار جاساقشىلارمەن بايلانىس جاسايدى دەپ ايىپتايدى.كاتار وكىمەتىنەن بۇل احۋالعا قاتىستى ازىرگە رەسمي جاۋاپ بولعان جوق. كاتار 2022 جىلى فۋتبولدان الەم چەمپيوناتىن وتكىزۋى ءتيىس دەپ ەسكە سالادى ۆۆس.