ءفيلمنىڭ وزەگى – جەتىمدەر ءۇيىنىڭ تاربيەلەنۋشىسى جەتكىنشەك بيبول مەن جارىنان ايىرىلىپ, جالعىزدىققا دۋشار بولعان قامكوڭىل قاريا قاسىمحان احات ۇلىنىڭ اراسىنداعى قىزىقتى ءھام تاعدىرلى وقيعالار نەگىزىندە ءوربيدى. جەتىم بالا بيبول مەن قاسىمحاننىڭ كەزدەيسوق جولىعۋىنان باستالعان كورىنىس ءارى قاراي تەز شيرىعادى. قاريانىڭ كوسموپوليت ءارى تاسباۋىر قىزى اكەسىنىڭ ءۇيىن ساتقىزىپ, ونىڭ قارجىسىن ءوزى پايدالانباق. باسپاناسىز اكەسىن قارتتار ۇيىنە وتكىزبەك. ال بيبول اقساقالعا جان جىلۋىن سىيلاعىسى كەلەدى. بىراق ازىرگە دارمەنسىز... اسىرەسە, شەرمەندە شالدىڭ ءبىر ەپيزودتا پاناسىز جەتىمەكتى قۇشاعىنا قىسىپ وتىرىپ: «ۋا, دۇنيە-اي! قارا شاشىم اعارىپ قارتايعانعا دەيىن مەن نەمەرە سۇيە الماي شەرمەندە جۇرسەم, سەن بەسىكتەن بەلىڭ شىقپاي جاتىپ اتاسىز قالىپ قاڭعىرىپ ءجۇرسىڭ! بۇل نە تاعدىر سوندا؟!» دەپ كۇڭىرەنۋى – بۇل كينونىڭ كۇرمەۋى. تاعدىرى قيىن كۇرمەۋدى رەجيسسەر ءساتتى شەشىپتى: فيلم سوڭىندا قاريا مەن بالا – اتا مەن نەمەرەگە اينالادى. تۋىندىنىڭ تۇساۋكەسەر راسىمىنە قاتىسقان مادەنيەت جانە سپورت ءمينيسترى ارىستانبەك مۇحامەدي ۇلى رولدەردى سومداۋعا تاجىريبەلى, تالانتتى ونەر يەلەرى قاتىسقاندىقتان شىعارما وسال بولۋى مۇمكىن ەمەس دەگەنگە توقتالىپ, شىعارماشىلىق ۇجىمعا ءوز اتىنان العىس ءبىلدىردى. شارا سوڭىندا رەجيسسەر تالعات تەمەنوۆتىڭ دە پىكىرىنە قۇلاق تۇردىك: – بۇل فيلم العاشىندا «كىشكەنتاي حانزادا» دەپ اتالعان. كەيىن ونى «بيبول» دەپ وزگەرتتىك. قازىرگى قازاق قوعامىنداعى تاستاندى بالا مەن قارتتار ءۇيىن ساعالاعان قاريالاردىڭ كوبەيىپ كەتۋى, اسىرەسە, تەك بايۋدى ماقسات تۇتقان, اكە-شەشەسىنەن جەرىنگەن مارگينالدانعان ۇرپاق فيلمدە كورىنىس تابادى. – فيلم تۇسىرۋگە قانشا ۋاقىت جۇمسالدى؟ – ستسەناري جازۋعا ءبىر اي ۋاقىت جۇمسالىپ, ال ءفيلمدى 19 كۇندە ءتۇسىرىپ ۇلگەردىك. بىلتىر كورەرمەنگە جول تارتۋى كەرەك ەدى. قارجىلىق سەبەپتەرگە بايلانىستى كەشىكتى. – تۋىندى ۇلكەن ەكرانعا قاشان شىعادى جانە ونىڭ باستى ەرەكشەلىگى رەتىندە نە ايتاسىز؟ – الداعى قىركۇيەك ايىندا فيلم ۇلكەن ەكرانعا شىعادى. تۋىندىنىڭ باستى ەرەكشەلىگى – مۋزىكالىق ارلەنۋى. مەنىڭ بارلىق فيلمدەرىمە مۋزىكا جازعان تالانتتى كومپوزيتور تولەگەن مۇحامەدجانوۆ. وسى دوسىمنىڭ ارقاسىندا بۇل ءفيلمنىڭ دە مۋزىكالىق ارلەنۋى وتە تاماشا شىقتى. سونىمەن قاتار, دارىندى دومبىراشى ايبەك بەكبوسىنوۆتىڭ ورىنداۋىندا قازاقتىڭ كۇيلەرىن پايدالاندىق. ءبىر سوزبەن ايتقاندا, ءفيلمنىڭ ۇلتتىق بوياۋى قانىق, قازىرگى قوعامداعى وعاش وقيعانى ءساتتى بەرە الۋىمەن قۇندى. – باستى ءرولدى سومداعان ارتىستەردى تاڭداۋ قالاي بولدى؟ – اقساقالدىڭ ءرولىن سومداعان تولەۋبەك ارالباي اعامىزعا قاتىستى تاڭداۋدا كوپ قينالعان جوقپىز, ال جەتىم بالا بيبولدىڭ رولىنە 2000-نان استام جەتكىنشەك تارتىلدى. وسىلاردىڭ ىشىنەن ەسىك قالاسىندا تۇراتىن كىشكەنتاي بالا ءانۋار تولەۋعاجى تاڭدالىپ الىندى. قوسىمشا ەپيزودتاعى كەيىپكەرلەردى استانا قالاسىنداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى سومدادى.
بەكەن قايرات ۇلى, «ەگەمەن قازاقستان»