شاراعا پارلامەنت ءماجىلىسى توراعاسىنىڭ ورىنباسارى, «نۇر وتان» پارتياسى فراكتسياسىنىڭ باسشىسى گۇلميرا يسيمباەۆا, ءماجىلىس توراعاسىنىڭ ورىنباسارى ۆلاديمير بوجكو, دەنساۋلىق ساقتاۋ ماسەلەسى بويىنشا پارتيالىق تالىمگەر زاۋرەش امانجولوۆا, دەنساۋلىق ساقتاۋ ءمينيسترى ەلجان ءبىرتانوۆ, ماجىلىستەگى پارتيا فراكتسياسىنىڭ جانە قحا دەپۋتاتتىق توبىنىڭ مۇشەلەرى, ۆيتسە-مينيسترلەر, ورتالىق جانە جەرگىلىكتى اتقارۋشى مەملەكەتتىك ورگانداردىڭ وكىلدەرى, رەسپۋبليكالىق جانە وڭىرلىك مەديتسينالىق ورتالىقتار مەن ۇكىمەتتىك ەمەس ۇيىمداردىڭ باسشىلارى, سونداي-اق, ساراپشىلار قاۋىمداستىعى مەن بەينەبايلانىس رەجىمىندە ايماق وكىلدەرى دە قاتىستى.
قازىرگى قوعامداعى دەنساۋلىق ساقتاۋدىڭ ماڭىزى جونىندە پىكىر ايتىپ, جيىندى اشقان م.قۇل-مۇحاممەد حالىقتىڭ دەنساۋلىعىن جاقسارتىپ, ءومىر ساپاسىن ارتتىرۋ ەلباسى ساياساتىنىڭ ەڭ ماڭىزدى باعىتتارىنىڭ ءبىرى ەكەندىگىنە ەرەكشە توقتالدى.
«تاۋەلسىزدىك جىلدارى قازاقستان ومىرلىك ماڭىزى بار اتالعان سالانىڭ دامۋىندا ايتارلىقتاي جەتىستىكتەرگە قول جەتكىزدى. ەلىمىزدىڭ باستى ساياسي كۇشى رەتىندە «نۇر وتان» پارتياسى بۇل ماڭىزدى مەملەكەتتىك باعدارلامانىڭ جۇزەگە اسىرىلۋ بارىسىن ودان ءارى قاتاڭ باقىلايتىن بولادى. حالىقتىڭ دەنساۋلىعى – مەملەكەتتىڭ گۇلدەنىپ-كوركەيۋىنىڭ نەگىزى», – دەدى.
ءوز كەزەگىندە نەگىزگى بايانداما جاساعان دەنساۋلىق ساقتاۋ ءمينيسترى ە.ءبىرتانوۆ «دەنساۋلىق» مەملەكەتتىك باعدارلاماسىن جۇزەگە اسىرۋدىڭ 2016 جىلعى قورىتىندىسى بويىنشا بىرقاتار باعىتتار جونىندە ناقتى دەرەكتەر كەلتىردى.
«اتاپ ايتقاندا, قوعامدىق دەنساۋلىق ساقتاۋ قىزمەتىنىڭ نەگىزى قالىپتاسۋىمەن قاتار, ەلىمىزدىڭ جەتى ايماعىنداعى قالالىق ەمحانالارعا اۋرۋلاردى باسقارۋ باعدارلاماسىن ەنگىزۋگە ارنالعان جاڭا جوبا جۇزەگە اسىرىلۋدا. سونداي-اق, ۇكىمەتتىك ەمەس ۇيىمدار, جەكە سەكتورلار جانە فارميندۋستريا وكىلدەرىنەن تۇراتىن ساپا جونىندەگى بىرلەسكەن كوميسسيا قۇرىلىپ, قازاقستاندىق ۇلتتىق دارىلىك فورمۋليار ەنگىزۋ بويىنشا جۇمىستار دا جالعاسىن تابۋدا. بەسىنشى باعىت بويىنشا مىندەتتى مەديتسينالىق ساقتاندىرۋ جۇيەسى ەنگىزىلىپ, ادام رەسۋرستارىن ستراتەگيالىق باسقارۋ جانە مەديتسينالىق ءبىلىمدى جاڭعىرتۋ بويىنشا ناقتى جوبالار دا قولعا الىنۋدا. جانە سوڭعىسى اتالعان سالادا مەملەكەتتىك-جەكەمەنشىك ارىپتەستىككە باسىمدىق بەرىلۋدە. وسىعان وراي, مينيسترلىك جانىنان بيزنەس-كەڭەس ءوز جۇمىسىن باستاپ, مەملەكەتتىك-جەكەمەنشىك ارىپتەستىكتى جانە ينفراقۇرىلىمدى دامىتۋدىڭ جول كارتاسى دايىندالۋ ۇستىندە», – دەدى مينيستر.
القالى كەڭەسكە قاتىسۋشىلار سالاعا قاتىستى جاۋاپتى ماماندارعا وزدەرىن تولعاندىرعان سان ءتۇرلى ساۋالدارىن جولداپ, جاۋابىن الدى. اسىرەسە, حالىق قالاۋلىلارى مەديتسينالىق مەكەمەلەردەگى مامانداردىڭ تاپشىلىعى مەن قىزمەتكەرلەردىڭ بىلىكتىلىگىن ارتتىرۋ, مەدقىزمەت ساپاسىنا باقىلاۋدى كۇشەيتۋ, مەديتسينالىق مەكەمەلەردى ينتەرنەتپەن ءتيىستى دەڭگەيدە جابدىقتاۋ, سانيتارلىق اۆتوكولىكپەن قامتۋ, ەمدەلۋگە كۆوتا الۋ, بولشەكتەپ ساتىلاتىن دارىلىك پرەپاراتتاردىڭ باعاسىن رەتتەۋ, سونداي-اق, ناۋقاستاردىڭ تەكسەرىلۋگە جانە ەمدەلۋگە كەتكەن شىعىندارىن وتەۋ سىندى وتكىر ماسەلەلەردى ورتاعا سالدى. سول سەبەپتەن دە باستاپقى مەديتسينالىق-سانيتارلىق كومەك جۇيەسىندەگى مەديتسينالىق قىزمەتتى ورتالىقسىزداندىرۋ, سالاماتتى ءومىر سالتى جونىندەگى باعدارلاماعا ايرىقشا كوڭىل ءبولۋ جانە ادام اعزاسىنا قاۋىپتى قالدىقتارمەن اۋانى لاستايتىن ءوندىرىس ورىندارىنىڭ جاۋاپكەرشىلىگىن كۇشەيتۋگە قاتىستى ناقتى ۇسىنىستار جولدانعان جيىندا مىندەتتى الەۋمەتتىك مەديتسينالىق ساقتاندىرۋدى ەنگىزۋ جونىندەگى ماڭىزدى رەفورمانىڭ ءمان-ماڭىزى دا جان-جاقتى تالقىلاندى. بۇل تاقىرىپ بويىنشا قور جەتەكشىسى ەلەنا باحمۋتوۆا ارنايى بايانداما جاسادى. ءسويتىپ, دەنساۋلىق ساقتاۋ سالاسىنىڭ وزەكتى تۇستارىنا نازار اۋدارىلىپ, ءتيىستى شارالاردى قولعا الۋ قاجەتتىگى پىسىقتالعان كەڭەستى قورىتىندىلاعان مۇحتار قۇل-مۇحاممەد مۇنداي باسقوسۋلار وزەكتى ماسەلەلەردى دەر كەزىندە انىقتاپ, ونى شەشۋ جولدارىن ۋاقىتىندا ۇسىنۋعا مۇمكىندىك بەرەتىنىن ايتتى. «نۇر وتان» پارتياسى توراعاسى ءبىرىنشى ورىنباسارىنىڭ ايتۋىنشا, پارتيالىق تىڭداۋ كەزىندە جاسالعان ۇسىنىستاردىڭ بارلىعى جاقىن كۇندەرى ءتيىستى ورگاندارعا جولدانباق.
ايتا كەتەيىك, ەلىمىزدە سوڭعى 5 جىل ىشىندە 381 دەنساۋلىق ساقتاۋ نىساندارى سالىنعان بولسا, ونىڭ 19-ى – اۋرۋحانا, 41-ءى – ەمحانا جانە 314-ءى – دارىگەرلىك امبۋلاتوريا. مەملەكەت مەديتسينالىق مەكەمەلەردى زاماناۋي قىمبات جابدىقتارمەن قامتاماسىز ەتۋ جايىن دا نازاردان تىس قالدىرماۋدا. ناتيجەسىندە, مەديتسينالىق كومەك كورسەتۋ جوعارى تەحنولوگيالىق دەڭگەيگە جەتتى. اسىرەسە, كارديوحيرۋرگيا, ترانسپلانتولوگيا, نەيروحيرۋرگيا, تراۆموتولوگيا, ورتوپەديا جانە تاعى باسقا سالالار بويىنشا كورسەتكىشتەر جوعارى. سول سياقتى مامان دايارلاۋ ءىسى دە ىلگەرىلەپ كەلەدى. بۇگىندە ەلىمىزدە جانە شەتەلدەردە وقىتۋ جۇمىستارى قارقىندى جۇرگىزىلۋدە. دامىعان ەلدەرمەن تاجىريبە الماسۋ ءىسى دە جۇيەلى جولعا قويىلدى. سونداي-اق كولىكتەگى مەديتسينا, قاشىقتىقتان كەڭەس بەرۋ مەديتسيناسى جانە تەلەمەديتسينا سالاسى قارقىندى دامىپ, ەلىمىزدە اتالعان سالانىڭ جەتىلىپ, زاماناۋي تەحنولوگيامەن جابدىقتالۋىنا بايلانىستى مينيسترلىك كۆوتاسى بويىنشا شەتەلدە ەمدەلۋگە مۇقتاج ناۋقاستاردىڭ سانى ازايۋدا.
نۇرلىبەك دوسىباي,
«ەگەمەن قازاقستان»