بۇل وتە جاۋاپتى جۇمىس ەكەنى ايتپاسا دا تۇسىنىكتى. بيۋدجەتتىڭ ورىندالۋىنا (كىرىس, شىعىس بولىكتەرى), مەملەكەتتىك ساتىپ الۋ پروتسەستەرىنىڭ بارلىق راسىمدەرىنىڭ زاڭ شەڭبەرىندە اتقارىلۋىنا باقىلاۋ جۇرگىزە الاتىن, سونىمەن بىرگە, اتالعان اكىمدىكتەرگە بەرىلگەلى وتىرعان كوممۋنالدىق مەنشىكتى باسقارا الاتىن ماماندار مەن باسشىلار اۋىلدىق جەرلەردە تاپشى ەكەنى بەلگىلى. ال زاڭدا كورسەتىلگەن روتاتسيالاۋ جۇمىسى تولىققاندى ورىندالماۋدا. سەبەبى, اۋدانداردا, اۋىلداردا قىزمەتتىك تۇرعىن ۇيمەن قامتاماسىز ەتۋ ماسەلەسى ۇزاق جىلدان بەرى شەشىمىن تاپپاي كەلەدى. مۇنداي ۇيلەر تەك اۋىل اكىمدىكتەرىندە عانا ەمەس, سونىمەن قاتار, وبلىستىق ماڭىزى بار قالا, اۋدانداردىڭ جانە وبلىستاردىڭ ورتالىقتارىندا دا بولۋى ءتيىس. سوندا عانا وبلىس ورتالىقتارىنان, اۋدان ورتالىقتارى مەن قالالاردان قاتىناپ اۋىل باسقاراتىن ء«اتۇستى» جۇمىس ەمەس, سول ەلدەردىڭ تىنىس-تىرشىلىگىن, ىستىق-سۋىعىن بىرگە كورىپ جۇرگەن ماماننىڭ, باسشىنىڭ تىڭعىلىقتى جۇمىسىن كورەر ەدىك جانە ءارتۇرلى كۇدىكتى سۇراقتاردىڭ تۋىنداۋى مەن زاڭ بۇزۋشىلىقتارعا جول بەرىلمەس ەدى. تۇرعىن ءۇي قۇرىلىسى جەرگىلىكتى بيۋدجەت ەسەبىنەن شەشىلۋى ءتيىس ەكەنى بەلگىلى. الايدا, بارلىق وڭىرلەر ءوز بيۋدجەتتەرىمەن بۇل جۇمىستاردى جۇرگىزە المايتىنى دا انىق. ەلىمىزدىڭ اتقارۋشى بيلىك ورگانى جوعارىدا باياندالعاننىڭ نەگىزىندە شاعىن ەلدى مەكەندەردى كاسىبي بىلىكتى ماماندارمەن قامتاماسىز ەتۋ ءۇشىن جەكەشەلەندىرۋگە جاتپايتىن قىزمەتتىك ءۇي قورىن قالىپتاستىرۋ ماسەلەسىن قاراستىرسا, اۋىلدارداعى مامان كادرلار ماسەلەسى بىرتە-بىرتە وڭ شەشىمىن تاپقان بولار ەدى.
ءبايدىلدا جىلقىشيەۆ, ءماجىلىس دەپۋتاتى