تەڭىز جانۋارلارى پاركىنىڭ ارتىستەرى 4 دەلفين (افالين ءتۇرى) جانە 3 تەڭىز مىسىعىمەن ونەر كورسەتەدى. 40-تان استام ءتۇرلى ەلەمەنت تاڭعاجايىپ شوۋ بارىسىندا كورەرمەن نازارىنا ۇسىنىلماق.
- قۇرمەتتى ەلوردا تۇرعىندارى مەن قوناقتارى, ەكسپو- 2017 حالىقارالىق كورمەسىنىڭ اشىلۋ قارساڭىندا بۇگىن قالامىزدا ەڭ ۇلكەن تەڭىز جانۋارلارىنىڭ پاركى اشىلىپ وتىر. بۇل مادەني-تاريحي وقيعا. ويتكەنى, تەڭىز جانۋارلارى قايتالانباس, ەرەكشە شوۋ كورسەتەدى. بۇگىن شاراعا 400-گە جۋىق ءبۇلدىرشىن كەلدى, ولاردىڭ اراسىندا مۇمكىندىكتەرى شەكتەۋلى 100-گە جۋىق بالالار دا بار, - دەدى «نۇر وتان» پارتياسى قالالىق فيليالىنىڭ ورىنباسارى ۆلاديسلاۆ سەرگەەۆ.
قالا تۇرعىنى ءلاززات بەرسەباەۆا مۇنداي وتباسىلىق ويىن-ساۋىق ساياباعىن العاش كورىپ وتىرعانىن ايتتى. ول پارككە ەكى بالاسىمەن كەلگەن. دەلفيندەر مەن تەڭىز مىسىقتارىنىڭ ونەرىنە بالالار تۇگىلى ۇلكەندەر دە تاڭداي قاقتى.
ەلوردا تۇرعىندارى مەن قوناقتارى Mega Silk Way ويىن-ساۋىق ورتالىعىندا ورنالاسقان Happylon پاركىندەگى شوۋدى كورە الادى. تەڭىز جانۋارلارىنىڭ العاشقى شوۋ قويىلىمىن بالالار ءۇيىنىڭ تاربيەلەنۋشىلەرى تاماشالادى.