كوميسسيا ءماجىلىسى كەزىندە پرەزيدەنت ماقالاسىنان تۋىندايتىن «تۋعان جەر», «قازاقستانداعى 100 جاڭا ەسىم», «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق», ءالفاۆيتىمىزدى قازىرگى كيريلليتسادان لاتىن قارپىنە كوشىرۋ جانە «قازاقستاننىڭ كيەلى جەرلەرىنىڭ گەوگرافياسى» تۋرالى باعدارلامالار بارىسى تالقىلاندى. ءبىز وسىنىڭ ىشىندە لاتىن قارپىنە كوشۋگە قاتىستى ايتىلعان وي-پىكىرلەرگە باسىمدىق بەرگىمىز كەلەدى. ويتكەنى, بۇل ماسەلە ماقالادا كورسەتىلگەن, وزگە باعىتتارعا قاراعاندا ءتۇسىندىرۋ جۇمىستارىن كوبىرەك قاجەتسىنەتىنى ايتپاسا دا بەلگىلى.
تاعى ءبىر قويىلار تالاپ − لاتىن الفاۆيتىنە كوشۋ جونىندەگى ويلار مەن پىكىرلەر الدىن الا بەلگىلەنگەن تۇجىرىمدامالىق قۇجاتتار اياسىنان اسپاعانى ءجون. وكىنىشكە قاراي, قازىرگى كۇنى مەملەكەتىمىزدىڭ وركەنيەتتى جولعا بەت بۇرۋىنىڭ ءبىر بەلگىسى ىسپەتتەس, بۇل ماسەلە تەك فيلولوگ ماماندار مەن بەلگىلى ءبىر لينگۆيستيكالىق توپتاردىڭ اراسىندا عانا تالقىلاۋ نىسانىنا اينالعان. ال حالىقتىڭ قالىڭ توبى ازىرگە باعدارلامالىق باعىتقا قاتىستى وي-پىكىرلەرىن ورتاعا سالۋدان تىس قالىپ وتىر.
وسى ولقىلىقتىڭ ورنىن تولتىرۋ جونىندە اقتوبە وبلىسىندا بايىپتى باستامالار پايدا بولا باستاعانى كوڭىلدى دەمەيدى. سونىڭ ءبىر دالەلى وڭىردەگى تۇساۋكەسەر ساعاتتارى مەن لاتىن ءالىپبيىن مەڭگەرۋگە قاتىستى اقىسىز كۋرستار ۇيىمداستىرۋ جونىندەگى ۇمتىلىستار بولىپ تابىلادى. اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەباەۆا ءوز وي-پىكىرىن وسى ارنادان ساباقتادى. كەلەسى كەزەكتە ءوز داۋىرىندە لاتىن ءالىپبيىن قولداعان تاريحي تۇلعالاردىڭ ءبىرى, قازاق ءتىل ءبىلىمى عىلىمىنىڭ كورنەكتى وكىلى, وسى ءوڭىردىڭ تۋماسى قۇدايبەرگەن جۇبانوۆ ەكەنىن ايتپاي كەتۋ شىندىققا قيانات. ءبىر سۇيسىنەرلىگى بۇگىنگى كۇنگە دەيىن جۇرگىزىلگەن الەۋمەتتىك زەرتتەۋلەر مەن تالداۋلاردىڭ قورىتىندىلارى اقتوبەنىڭ بۇگىنگى تۇرعىندارىنىڭ 67 پايىزى لاتىن الفاۆيتىنە كوشۋدىڭ قاجەتتىلىگىن قولداعانىن كورسەتەدى,− دەدى بۇدان ءارى گازەت تىلشىسىنە گۇلايىم تەلمانقىزى.
الدىڭعى ويىمىزدى ودان ءارى شەگەندەپ, شەگەلەر تۇستا لاتىن الىپبيىنە كوشۋ جۇمىستارىنىڭ ەلىمىزدىڭ رۋحاني الەمى ءۇشىن اسا قاجەت ءىس ەكەنىن تايعا تاڭبا باسقانداي ءتۇسىندىرىپ بەرۋى ءۇشىن ءتيىستى كادرلار كورپۋسى ازىرلەنىپ جاساقتالۋى كەرەكتىگى دە باسى اشىق ماسەلە. بۇل تۇرعىدا قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى باۋىرجان ەردەمبەكوۆ قازىرگى كۇننىڭ وزىندە «قازىنا» عىلىمي-زەرتتەۋ ورتالىعى قۇرىلعانىن العا تارتتى. ونىڭ ايتۋىنشا, جوعارى وقۋ ورنىندا لاتىن قارپىنە كوشۋ ماسەلەلەرىنە بايلانىستى كوپشىلىكتىڭ ساۋالدارىنا ساۋاتتى دا تۇجىرىمدى جاۋاپتار قايتارا الاتىن لەكتورلار توبىن ازىرلەۋگە دە نازار اۋدارىلا باستاعان.
تەمىر قۇسايىن, «ەگەمەن قازاقستان»
اقتوبە