ەلباسىنىڭ جارلىعىمەن بارلىق دەڭگەيدەگى اكىمدەردىڭ جۇرتشىلىق الدىندا ەسەپ بەرۋى داستۇرگە اينالدى. مۇنىڭ ەكى جاققا دا ءتيىمدى جاقتارى بار ەكەنىنە كوز جەتىپ كەلەدى.
الماتى وبلىسىنىڭ اكىمى اڭسار مۇساحانوۆ وبلىستىق ءماسليحات دەپۋتاتتارى الدىندا مەملەكەت باسشىسىنىڭ جىل سايىنعى جولداۋلارىنداعى مىندەتتەر مەن وڭىرگە جۇمىس ساپارىمەن كەلگەندە بەرگەن تاپسىرمالارىنىڭ ورىندالۋى, ەكونوميكانى دامىتۋ, جۇمىسسىزدىقتىڭ الدىن الۋ جانە تاۋەلسىزدىگىمىزدىڭ 20 جىلدىعىن وتكىزۋ ماسەلەلەرى بويىنشا اتقارىلعان جۇمىستاردى ورتاعا سالدى.
وتكەن سەگىز ايدا اكىمدىكتىڭ 7 ءماجىلىسى, 26 اپپاراتتىق كەڭەس ءوتكىزىلىپ, وندا وبلىستىڭ الەۋمەتتىك-ەكونوميكالىق, مادەني دامۋ ماسەلەلەرى قارالعان. جيىنداردا اتقارۋشى بيلىكتىڭ جۇمىستارىنا كەشەندى تالداۋ جاسالىپ, الداعى مىندەتتەر ايقىندالعان.
ءوڭىر باسشىسى قاي سالادا بولسىن, بىلىكتى مامانداردى تارتۋعا ەرەكشە كوڭىل بولىنەتىنىن جەتكىزدى. ويتكەنى, وڭ ءۇردىستەردىڭ ەتەك الۋى تىڭ ويلى, جوعارى كاسىبي بىلىكتى مامانداردىڭ ءوز قىزمەتىنە دەگەن جاۋاپكەرشىلىگىنە بايلانىستىلىعىن قاداپ ايتتى. وسى ماقساتتا اۋداندار مەن باسقارما باسشىلارى اراسىندا اۋىس-ءتۇيىس بولدى. ءاسىرەسە, جاستاردىڭ ءبىلىمى مەن بىلىكتىلىگى نازارعا الىنعان. اكىمدەردىڭ جۇمىسىنىڭ ماڭىزدى ءبىر بولىگى ازاماتتاردىڭ وتىنىشتەرىمەن جۇمىس ىستەۋ بولسا, وبلىس اكىمىنىڭ قابىلداۋىندا بولىپ, ماسەلەسى وڭ شەشىلگەندەر قاتارى كوبەيۋدە.
اڭسار مۇساحانوۆ ءماسليحات دەپۋتاتتارىنىڭ نازارىنا ونەركاسىپ, اۋىل شارۋاشىلىعى, ينۆەستيتسيا تارتۋ, ءبىلىم مەن دەنساۋلىق ساقتاۋ سالالارىنداعى وتكەن مەرزىمدە قولعا الىنعان ۇتىمدى ىستەر مەن تياناعى كەلتىرىلگەن جۇمىستاردى جىكتەدى. ءماسەلەن, ونەركاسىپ سالاسىندا 228,7 ملرد. تەڭگەنىڭ, اگرارلىق سەكتوردا 87,6 ملرد. تەڭگەنىڭ ءونىمى ءوندىرىلىپ, حالىقتىڭ ءال-اۋقاتىنىڭ ارتۋىنا قول جەتكىزىلگەن.
شاعىن جانە ورتا كاسىپكەرلىك بويىنشا دا ءونىم ءوندىرۋ مەن حالىققا قىزمەت كورسەتۋ دەڭگەيى ەداۋىر جاقسارعان. جاس ۇرپاققا ءبىلىم بەرۋ, دەنساۋلىق ساقتاۋ سالالارىنداعى جۇمىس بايىپتى جالعاسىن تابۋدا. «اقبۇلاق» باعدارلاماسى اياسىندا حالىقتى تازا اۋىز سۋمەن قامتاماسىز ەتۋ باعىتىندا 49 سۋ جۇيەسىنىڭ قۇرىلىسىن ءجۇرگىزۋ جوسپارلانعان. بولىنگەن قارجى ءتيىمدى جۇمسالىپ كەلەدى. جاستاردىڭ جاڭاشىل باستامالارى قولداۋ تاۋىپ, بۇل ماقساتقا بيۋدجەتتەن قوماقتى قارجى بولىنگەن. ەڭبەكشىقازاق اۋدانىنداعى مالوۆودنوە ەلدى مەكەنىن كوكتەمدە سۋ باسۋىنا بايلانىستى قالپىنا كەلتىرۋ جۇمىستارى سۋىق تۇسكەنشە اياقتالاتىنى دا ايتىلدى.
اكىم ازىق-ت ۇلىك باعاسىنىڭ نەگىزسىز وسۋىنە جول بەرىلمەيتىنىن دە جەتكىزدى. سونىمەن قاتار, ءىرى جوبالاردىڭ, ۇلەسكەرلەر ءماسەلەلەرىن شەشۋ, جىلىتۋ ماۋسىمىنا دايىندىق, تاعى باسقا كەشەندى جۇمىستارعا توقتالىپ, ءوڭىر حالقىنىڭ ءال-اۋقاتىن كوتەرۋ باستى مىندەتتەردىڭ ءبىرى ەكەندىگىن جانە وعان بارشانىڭ اتسالىسۋى قاجەتتىگىن مىندەتتەدى.
جيىندا دەپۋتات, «بارتوعاي» سۋ قويماسى جانە قوناەۆ اتىنداعى ۇلكەن الماتى كانالىن پايدالانۋ ءجونىندەگى مەملەكەتتىك مەكەمە ديرەكتورى ە.سۇلتانعازيەۆ, تالعار اگروبيزنەس جانە مەنەدجمەنت كوللەدجىنىڭ ديرەكتورى ن.ۇمبەتوۆا, شارۋا قوجالىعىنىڭ باسشىسى ۆ.حەلنيچەنكو, قازاقستان حالقى اسسامبلەياسىنىڭ مۇشەسى گ.يوردانيدي, ىلە اۋداندىق ءماسليحاتىنىڭ حاتشىسى ف.كامالقىزى جانە باسقا دا دەپۋتاتتار سويلەپ, جۇمىستارىنداعى وڭ ناتيجەلەرىمەن ءبولىسىپ, تىڭ ۇسىنىس-پىكىر ءبىلدىردى. دەپۋتاتتار وبلىس اكىمىنىڭ جۇمىسىنا قاناعاتتانارلىق دەگەن باعا بەردى.
كۇمىسجان بايجان,
الماتى وبلىسى.