ءتۇبى ءبىر تۇركيا مەملەكەتىنىڭ ايتۋلى قالاسى ىستامبۇلداعى اباي مەكتەبىندە جاڭا وقۋ جىلى باستالدى. بۇل ءبىلىم ورداسى 2003 جىلى ەلباسى نۇرسۇلتان نازارباەۆتىڭ قاتىسۋىمەن اشىلعان بولاتىن. سودان بەرگى ۋاقىت ىشىندە قازاقتىڭ دانىشپان اقىنى ابايدىڭ ءىلىمى مەن ءبىلىمى باۋىرلاس ەل بالالارىنىڭ بويىنا دارىپ, ويىنا قونىپ كەلەدى.
بيىلعى جاڭا وقۋ جىلىنىڭ اشىلۋىنا سول مەملەكەتتەگى قازاق ەلىنىڭ ەلشىسى جانسەيىت تۇيمەباەۆ قاتىسىپ, وقۋشىلارعا ساتتىلىك تىلەدى. ول ءوز سوزىندە تاۋەلسىزدىگىمىزدىڭ 20 جىلدىعى بيىل اتا-جۇرتىمىزدا اتالىپ وتەتىنىن, وعان ەرەكشە دايىندىقتىڭ جۇرگىزىلىپ جاتقانىن, بۇل مەرەكەگە ەلدىڭ ەگەمەندىگىن تۇڭعىش تانىعان باۋىرلاستاردىڭ دا ۇلەسى بار ەكەنىن جەتكىزگەن. ول سونىمەن قاتار, تۇرىك باۋىرلاردىڭ 20 وقۋشىسى كورىكتى كوكشە وڭىرىندەگى, بۋراباي باۋرايىنداعى «بالداۋرەن» كەشەنىندە دەم العانىن دا نازارعا سالدى. بۇل ەكى ەل جاستارىنىڭ قازىردەن باستاپ ارالاسىپ وتىرۋىنا جاسالعان مۇمكىندىك ەكەنىن دە اتاپ وتكەن.
جالپى, سوڭعى جىلدارى باۋىرلاس ەلمەن تەك قانا ەكونوميكالىق قارىم-قاتىناستار جاساپ قويماي, تەگى ءبىر جۇرتتاردىڭ رۋحاني قۇندىلىقتارىن ءوزارا تانىپ-ءبىلۋ ماقساتىندا دا جۇرگىزىلىپ جاتقان اتاۋلى جۇمىستار از ەمەس.
سۇلەيمەن مامەت.