قىركۇيەك ايىندا مۇناي ءوندىرىسى قايتا ىسكە قوسىلعان اتىراۋ وبلىسىنداعى قاشاعان كەن ورنىنان 25 قاراشادا وندىرىلگەن تاۋار شيكىزاتىنىڭ كولەمى 479 مىڭ تونناعا جەتكەن.
«كەن ورنىنان تەك قانا تاۋارلىق مۇناي ەمەس, سونداي-اق گاز ءوندىرىلىپ جاتىر. قازىرگى تاڭدا وندىرىلگەن تاۋارلىق گازدىڭ كولەمى 97 ملن تەكشە مەتردى قۇرادى. ءوندىرىس كولەمىن ۇلعايتۋ ماقساتىندا نىسانداردى پايدالانۋعا بەرۋ جۇمىستارى جۇزەگە اسىپ جاتىر», – دەپ مالىمدەدى «نورت كاسپيان وپەرەيتينگ ب.ۆ.» كومپانياسىنىڭ ءباسپاسوز قىزمەتى.
قر ەنەرگەتيكا مينيسترلىگى بۇرىن ايتىپ وتكەندەي, 2017 جىلى قاشاعان كەن ورنىنان 4-تەن 8 ملن تونناعا دەيىن مۇناي ءوندىرۋ جوسپارلانۋدا. مۇناي ءوندىرۋ «شىڭىنا» جەتكەسىن, الدىدا ونى تاۋلىگىنە 1,5 ملن باررەلگە دەيىن شىعارۋ مىندەتى تۇر.