بۇگىن لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىندە مەملەكەت جانە قوعام قايراتكەرى, xالىق جازۋشىسى ءابىش كەكىلباەۆ اتىنداعى اۋديتوريا اشىلدى.
ۋنيۆەرسيتەت رەكتورى ەرلان سىدىقوۆتىڭ ايتۋىنشا, جاڭادان اشىلعان اۋديتوريادا كۇندەلىكتى دارىستەردى وتكىزۋ ارقىلى قازاقتىڭ بىرەگەي جازۋشىلارىنىڭ ءبىرى - ءابىش كەكىلباەۆتىڭ شىعارماشىلىعىمەن ەتەنە تانىستىرۋ جوسپارلانعان.
"بۇگىن ءابىش اعانىڭ دۇنيەدەن وزعانىنا جىل تولىپ وتىر. جىلدىق اسى بەرىلىپ جاتىر. سول كۇنگە سايكەستەندىرىپ, ەۋرازيا ۇلتتىق ۋنيۆەرسيتەتىندە اتاقتى جازۋشى, قوعام قايراتكەرى ءابىش كەكىلباەۆتىڭ اۋديتورياسىن اشىپ وتىرمىز. بەلگىلى تۇلعالاردىڭ ەسىمىمەن اۋديتوريا اشۋ - بۇل ۋنيۆەرسيتەتىمىزدە قالىپتاسقان جاقسى ءبىر ءداستۇر. ويتكەنى سول تۇلعالارلىڭ ءومىرى, شىعارماشىلىعى مەن قايراتكەرلىگىنەن بۇگىنگى جاستار تاربيە الۋى قاجەت. باعدارلامامەن وقىتۋ ءوز الدىنا, ال تۇلعالار ارقىلى تاربيەلەۋ, ول دا ءبىلىم بەرۋ ادىستەرىنىڭ ءبىرى دەپ ءبىلۋىمىز كەرەك. اۋديتوريا اشۋ بۇل جاي تاقتايشا ىلە سالۋ ەمەس. ول جەردە وقىلاتىن دارىستەر, بەرىلەتىن ساباقتار ەرەكشە ءبىر سەزىمدە ءوتۋى ءتيىس. ماسەلەن, بۇگىنگى شاراعا قاتىسقان ازاماتتار مىنا اۋديتوريادا ءابىشتىڭ ءيىسى اڭقىپ تۇر دەدى. ودان ارتىق باعا بار ما؟ دەمەك, جاستاردىڭ بويىنا وسى سەزىمدى قۇيا الاتىن بولساق, ول ادامنىڭ رۋxاني جاعىنان باي ازامات بولىپ قالىپتاساۋىنا ءوز سەپتىگىمىزدى تيگىزەمىز", - دەيدى ە.سىدىقوۆ.