قوستاناي وبلىستىق «قوعامدىق كەلىسىم» ۇيىندە «ەتنوسارالىق قاتىناستاردىڭ وزەكتى پروبلەمالارى: قازىرگى جاعدايى جانە بولاشاعى» (قوستاناي وبلىسىنىڭ ماتەريالدارى بويىنشا) اتتى ۇجىمدىق مونوگرافيانىڭ تۇساۋكەسەرى ءوتتى. بۇل ەڭبەك جاقىندا استانادا وتكەن قازاقستان حالقى اسسامبلەياسى عىلىمي-ساراپشىلىق كەڭەسىنىڭ قازاقستان رەسپۋبليكاسى تاۋەلسىزدىگىنىڭ 25 جىلدىعى مەرەكەسىنە وراي جاريالاعان بايقاۋىندا باس جۇلدەگە يە بولعان ەدى. تۇساۋكەسەرگە وبلىس ورتالىعىنداعى زيالى قاۋىم جانە ۇلتتىق-مادەني ورتالىقتاردىڭ وكىلدەرى مەن مونوگرافيا اۆتورلارى قاتىستى.
باسقوسۋدا قازاقستان حالقى وبلىستىق اسسامبلەياسى عىلىمي-ساراپتاما توبىنىڭ توراعاسى, زاڭ عىلىمدارىنىڭ كانديداتى ءالىمجان بەكماعامبەتوۆ جاقىندا عانا ەلىمىز پارلامەنتى قابىلداعان قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان دەكلاراتسيا تۋرالى ايتىپ بەردى.
«ەلىمىز تاۋەلسىزدىگىن العاننان بەرگى 25 جىلدا ەلباسى نۇرسۇلتان نازارباەۆتىڭ باسشىلىعىمەن ەلىمىز جەتكەن جەتىستىكتىڭ نەگىزى بەرەكە-بىرلىگىمىزدە جاتىر. دەكلاراتسيادا وسى وي ناقتى ءارى ءادىل كورسەتىلگەن. ءبىزدىڭ عىلىمي ساراپشىلار جازعان مونوگرافيانىڭ دا كوزدەگەن ماقساتى ەلىمىزدەگى تىنىشتىق, قاتىقتاي ۇيىعان بىرلىك», - دەدى ءالىمجان باۋىرجان ۇلى.
مونوگرافياعا اتسالىسقان اۆتورلار ماقالالارىنىڭ بارلىعى دەرلىك عىلىمي سالماعىمەن ەرەكشەلەنەدى. كوپشىلىككە ارنالعان كىتاپتىڭ ەتنوساياسي سالادا وقىرمانعا بەرەرى مول.
مۇنان كەيىن مونوگرافيا تۋرالى جينالعاندار پىكىرلەرىن ورتاعا سالدى. كىتاپ ازىرگە 500 دانامەن شىقتى. الداعى ۋاقىتتا ول قارجىعا قاراي كوبەيتىلىپ, وبلىس كىتاپحانالارىنا, وقۋ ورىندارىنا تاراتىلادى.
ءنازيرا جارىمبەتوۆا,
"ەگەمەن قازاقستان".