25 قاراشا – ايەلدەرگە قاتىستى زورلىق-زومبىلىقتى جويۋعا ارنالعان حالىقارالىق كۇرەس كۇنى. ونى بىرىككەن ۇلتتار ۇيىمىنىڭ باس اسسامبلەياسى 1999 جىلى بەلگىلەپ, رەسمي تۇردە جاريالاعان. سول كەزدەن بەرى الەمنىڭ كوپتەگەن ەلدەرىندە ايەلدەرگە قاتىستى زورلىق-زومبىلىق ماسەلەسىنە نازار اۋدارتۋعا باعىتتالعان «16 بەلسەندى كۇن» باستاۋ الدى. 25 قاراشادان 10 جەلتوقسانعا دەيىنگى جىل سايىنعى ناۋقان قازاقستاندا دا وتكىزىلەدى.
ورتالىق كوممۋنيكاتسيالار قىزمەتىندە «زورلىق-زومبىلىققا قارسى 16 كۇن» حالىقارالىق ناۋقانىنىڭ ماقساتتارى مەن مىندەتتەرى» تاقىرىبىندا بريفينگ وتكىزىلىپ, وعان پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى, ورتالىق سايلاۋ كوميسسياسىنىڭ مۇشەسى ءلاززات سۇلەيمەن, ۇلتتىق كوميسسيا مۇشەسى, باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى ساۋلە ايتپاەۆا جانە ىشكى ىستەر مينيسترلىگى اكىمشىلىك پوليتسيا كوميتەتى ءتوراعاسىنىڭ ورىنباسارى ماقسات بايبولوۆ قاتىستى.
ۇلتتىق كوميسسيا ءتورايىمىنىڭ ورىنباسارى سوڭعى جىلدارى ەلدە تۇرمىستىق زورلىق-زومبىلىق سالاسىنداعى زاڭدىلىقتى نىعايتۋ بويىنشا پارمەندى زاڭدى جانە پراكتيكالىق شارالار قابىلدانعانىن, تۇرمىستىق قىلمىستاردىڭ جولىن كەسۋ بويىنشا قۇقىقتىق مەحانيزمدەر قۇرىلعانىن اتاپ ءوتتى. «ەلباسى ايەلدەرگە قاتىستى زورلىق-زومبىلىققا قارسى كۇرەستى باسىم مىندەتتەردىڭ ءبىرى دەپ بەلگىلەدى. پروفيلاكتيكالىق جۇمىستى بەلسەندىلەندىرۋ جانە اكىمشىلىك-قۇقىقتىق شارالاردى قولدانۋ ءوز ناتيجەسىن بەردى – سوڭعى ءتورت جىلدا تۇرمىستىق قىلمىستىڭ سانى ەكى ەسەگە قىسقاردى», – دەدى ل.سۇلەيمەن. الايدا, ونىڭ ايتۋىنشا, ايەلدەرگە قاتىستى تۇرمىستىق زورلىق-زومبىلىق بۇكىل الەمدە دە كۇردەلى ماسەلە بولىپ قالىپ وتىر.
ساۋلە ايتپاەۆا تۇرمىستىق زورلىق-زومبىلىقتىڭ الدىن الۋ سالاسىنداعى وزەكتى ماسەلەلەر تۋرالى جانە باس پروكۋراتۋرا جۇزەگە اسىرىپ جاتقان «وتباسىنداعى زورلىق-زومبىلىقسىز قازاقستان» جوباسىنىڭ اياسىندا قابىلدانىپ جاتقان شارالار تۋرالى اقپارات بەردى. سونداي-اق, وتباسىلىق-تۇرمىستىق سالاداعى قۇقىق بۇزۋشىلىقتاردىڭ الدىن الۋدىڭ ءتيىمدى مەحانيزمدەرىن ازىرلەۋگە جانە ەلىمىزدە تۇرمىستىق زورلىق-زومبىلىق قۇرباندارىن وڭالتۋعا ارنالعان ۆەدومستۆوارالىق جۇمىس توبى قۇرىلعانىن جەتكىزدى. «بيىلعى جىلدىڭ باسىنان بەرى تۇرمىستىق سيپاتتاعى قىلمىستارعا بايلانىستى كۇشىنە ەنگەن ۇكىمدەر بويىنشا 206 ادام سوتتالدى. ولاردىڭ باسىم بولىگى (86 ادام) باس بوستاندىعىنان ايىرۋ جازاسىنا كەسىلدى. سونداي-اق, 11 444 ادام اكىمشىلىك جاۋاپقا تارتىلدى», – دەدى س.ايتپاەۆا.
ىشكى ىستەر مينيسترلىگىنىڭ اكىمشىلىك پوليتسيا كوميتەتى توراعاسىنىڭ ورىنباسارى ماقسات بايبولوۆ تۇرمىستىق زورلىق-زومبىلىقتىڭ الدىن الۋ بويىنشا ىشكى ىستەر ورگاندارى قابىلداپ جاتقان شارالار تۋرالى باياندادى.
ايدار ورىسباەۆ,
«ەگەمەن قازاقستان»