سارسەنبى كۇنى الماتىداعى «دوستىق» سپورت كەشەنىندە 21 جاسقا دەيىنگى قىزدار اراسىنداعى قول دوبىنان ءحى ازيا چەمپيوناتى باستالعان ەدى. ءدال وسى تۋرنيردە توپ جارعان كوماندالار كەلەر جىلى چەحيادا وتەتىن الەم چەمپيوناتىنا جولداما الادى.
قازاقستاندا وتكەن چەمپيونات شىمىلدىعىن جاپونيا مەن تايپەي قۇراماسى اشتى. تۇستەن كەيىن گونكونگ پەن كورەيا قۇراماسى ورتاعا ءتۇستى. اۋەلى ءبىزدىڭ جەرلەستەرىمىز وزبەكستان قۇراماسىمەن سىنعا ءتۇستى. ازيا اۋماعىنداعى سپورت دوداسىندا 16 گاندبولشى قىزىمىز ەل نامىسىن قورعاۋدا. ال ازيا چەمپيوناتىنىڭ رەسمي اشىلۋى قىركۇيەكتىڭ 16-سى كۇنى بالۋان شولاق اتىنداعى سپورت سارايىندا وتەدى. چەمپيونات 20 قىركۇيەكتە مارەگە جەتەدى. ياعني, كەلەسى سەيسەنبىدە قىزدار اراسىنداعى ازيا چەمپيونى انىقتالادى.
قازاقستان قۇراماسى قول دوبىنان بۇعان دەيىن ءۇش رەت ازيا چەمپيونى اتانعان بولاتىن. قۇراما كوماندانىڭ اعا جاتتىقتىرۋشىسى ءماجيت كارمەن ۇلىنىڭ ايتۋىنشا, قىزدار بۇل جولى دا چەمپيوندىق بيىكتەن كورىنۋگە تىرىسادى. دەگەنمەن, 2002 جىلدان بەرى قاراي عانا وتاندىق گاندبولدىڭ باعى جانا باستادى دەۋگە بولادى. بۇعان دەيىن دە بىزدە فەدەراتسيا بولعان. بىراق, ول ەشقانداي حالىقارالىق ۇيىمداردان قولداۋ تاپپاعان ەدى. فەدەراتسيانىڭ پرەزيدەنتى گۇلنار تۇرلىحانوۆا الدىمەن فەدەراتسيانىڭ زاڭدىق-قۇجاتتىق نورمالارىن رەتتەۋدى قولعا الدى. ايماقتىق فەدەراتسيا ءبولىمدەرى جۇمىس ىستەي باستادى. ءبىزدى ازيا مويىنداي باستادى. الماتىدا جارىس وتكىزۋ قۇقىعىنا يە بولدىق. ءوز جەرىمىزدە ازيا چەمپيونى اتاندىق.
ەندى مىنە, الماتىدا جالاۋىن كوتەرەتىن 21 جاسقا دەيىنگى قىزدار اراسىنداعى ازيا چەمپيوناتىندا قازاقستان قۇراماسى اقتىق سىنعا شىعۋ ءۇشىن بارىن سالاتىن بولادى. بۇل جارىسقا ازيا ەلدەرىنىڭ 8 كومانداسى قاتىسۋدا.
– ءبىزدىڭ قۇرامانىڭ ساپىندا 16 سپورتشى ونەر كورسەتەدى. سپورتشىلارىمىز بابىندا. چەمپيونات بارىسىندا فينالدا ويىن كورسەتۋ باستى ماقساتىمىز, – دەگەن بولاتىن اعا جاتتىقتىرۋشى. ال ءباسپاسوز ءماسليحاتى كەزىندە قازاقستان گاندبول فەدەراتسياسىنىڭ پرەزيدەنتى گۇلنار تۇرلىحانوۆا: «ازيا چەمپيوناتىن ەلىمىزدە وتكىزۋدەگى ماقسات – سالاۋاتتى ءومىر سالتىن, گاندبول سپورتىن ناسيحاتتاۋ, كوماندالاردىڭ دەڭگەيىن كوتەرۋ. بىزگە گاندبولدان ازيا قۇرلىعىنداعى كوشباسشى رەتىندە وسى بيىك دەڭگەيدى ۇستاپ تۇرۋ تاپسىرىلعان. سوندىقتان گاندبولدى دامىتۋ, ناسيحاتتاۋ, وسىنداي حالىقارالىق دەڭگەيدەگى شارالاردى وتكىزۋ باستى ماقساتىمىز», – دەدى.
ونىڭ ايتۋىنشا, ازيا چەمپيوناتى قازاقستاندا وتەتىن گاندبول سايىستارىنىڭ سوڭى ەمەس. الداعى 2-6 قاراشا ارالىعىندا بۇدان دا ءىرى شارا – حالىقارالىق گاندبول فەدەراتسياسىنىڭ كۋبوگى ءۇشىن سايىس وتەدى. ايتۋلى دوداعا ءتورت قۇرلىقتىڭ كوماندالارى قاتىسپاق
ايناش ەسالي.
الماتى.