ەكىباستۇزدىق وقۋشىلار دا جاز بويعى دەمالىستارى اياقتالىپ سۇيىكتى مەكتەپتەرىنە ورالدى. «ارينە, ولار وسى ءبىر ەرەكشە جوبا ارقىلى دەمالىستارىن قالاي وتكىزگەندەرىن قىزىعا ايتىپ تا جۇرگەن بولار. اعىلشىن تىلىنەن اۋدارعاندا, «LIFE» ءومىر دەگەن ماعىنانى بىلدىرەدى», – دەيدى قالاداعى «قاينار» ءبىلىم بەرۋ جانە بوس ۋاقىتتى وتكىزۋ كەشەنى ديرەكتورىنىڭ ورىنباسارى سايان قۇدايبەرگەنقىزى.
وسى ارادا «جول كارتاسى» باعدارلاماسى اياسىندا «قاينار» كەشەنىنە 155 ميلليون تەڭگە قارجى ءبولىنىپ, ءىشى-سىرتىنا تۇگەلدەي قايتادان كۇردەلى جوندەۋ, جاڭارتۋ جۇمىستارى جۇرگىزىلگەنىن ايتا كەتسەك دەيمىز. ونىڭ جانىنان اۋدانى 1680 شارشى مەتر بولاتىن قوسىمشا عيماراتتار سالىندى. بالالار ءۇشىن 200 ورىندى جيىلىس زالى, بي زالى, كافە اشىلىپ, تۋريستىك سكالودروم ىسكە قوسىلدى. جارقىراعان كەشەن ءىشى زاماناۋي ۇلگىدەگى قۇرال-جابدىقتار, جيھازدارمەن جابدىقتالدى. ورتالىقتا 60 مۇعالىم بار. ولار 15 مىڭ بالامەن جۇمىس جاسايدى, 36 شىعارماشىلىق بىرلەستىك, 14 اۋلا كلۋبى, «بالداۋرەن» اتتى بالالار جانە جاسوسپىرىمدەر ۇيىمى, «ارمان – رادوست» ءان-بي حورەوگرافيالىق انسامبلدەرى, الپينيستىك-تۋريستىك كلۋبتار, بالالار تەاتر ۇجىمدارى جۇمىس جاسايدى.
بالالاردىڭ جەكە تۇلعا رەتىندە قالىپتاسۋىنا, ءوزىنىڭ بولاشاقتاعى كاسىبىن, ماماندىعىن تاڭداۋىنا, شىعارماشىلىقپەن ەڭبەك ەتۋىنە, قابىلەت-دارىندارىن ىسكە اسىرۋلارىنا بۇل جەردە بارلىق جاعداي جاسالعان. سونىمەن قاتار, بالالاردىڭ قاداعالاۋسىز قالماۋلارىن, كامەلەتكە تولماعاندار اراسىندا قۇقىق بۇزۋشىلىقتىڭ الدىن الۋ, بوس ۋاقىتتارىن مازمۇندى وتكىزۋ, ازاماتتىق سانا-سەزىمدى ءوسىرىپ, پاتريوتيزمگە, وتانسۇيگىشتىككە باۋلۋ, سالاماتتى ءومىر سالتىن قالىپتاستىرۋ, بالالاردىڭ جازعى دەمالىستارىن ۇيىمداستىرۋ بۇل كەشەندى ورتالىقتىڭ نەگىزگى مىندەتتەرى بولىپ تابىلادى. بالالار ءار سالا بويىنشا ەلىمىزدە وتەتىن بارلىق بايقاۋلار مەن كونكۋرستارعا قاتىسادى. بيىلعى جىلى ورتالىق «جاز LIFE» اتالاتىن قالالىق باعدارلاما نەگىزىندە جۇمىس جاسادى. جالپى, ۇيىمداستىرۋشىلاردىڭ ايتۋىنشا, بۇل باعدارلاما رەسپۋبليكالىق «شىركىن LIFE» تەلەباعدارلاماسى نەگىزىندە جۇزەگە اسقان.
فاريدا بىقاي.
ەكىباستۇز.