«نۇر وتان» حدپ جوعارى پارتيا مەكتەبىندە جاڭا وقۋ جىلى باستالدى. مەكتەپ بىلتىر اشىلعان بولاتىن. وسى ۋاقىت ىشىندە بۇل جەردە 1,5 مىڭعا جۋىق پارتيا قىزمەتكەرى, سونىڭ ىشىندە ورتالىق اپپاراتتىڭ 30 قىزمەتكەرى وقىپ شىقتى. جوعارى پارتيا مەكتەبىنىڭ ماتەريالدىق-تەحنيكالىق بازاسى, وقىتۋ ءادىس-تاسىلدەرى, وقىتۋشىلار قۇرامى قالىپتاسىپ ۇلگەرگەن. پرەزيدەنت, «نۇر وتان» پارتياسىنىڭ توراعاسى نۇرسۇلتان نازارباەۆتىڭ پارتيالىق-ساياسي وقۋ جەلىسىن نىعايتۋ ءجونىندەگى نۇسقاۋلارى بويىنشا مەكتەپ فيليالدارى اشىلۋدا. قازىرگى ۋاقىتتا ولار الماتى مەن اقتوبە قالالارىندا اشىلىپ, ويداعىداي جۇمىس ىستەۋدە. قىسقا مەرزىمدە مەكتەپ فيليالدارىن 300 باستاۋىش پارتيا ۇيىمدارىنىڭ جەتەكشىلەرى وقىپ شىقتى. قازان ايىندا سەمەي قالاسىندا مەكتەپتىڭ شىعىسقازاقستاندىق ءبولىمى اشىلادى.
العاشقى سەمينار ەلدى الەۋمەتتىك-ساياسي جاڭعىرتۋ جاعدايىنداعى پارتيا قىزمەتىنىڭ باسىمدىقتارىنا ارنالعان. جاڭا وقۋ تسيكلىن «نۇر وتان» پارتياسى توراعاسىنىڭ ءبىرىنشى ورىنباسارى اشتى. نۇرلان نىعماتۋليننىڭ ايتۋىنشا, ەلباسى, پارتيا توراعاسى نۇرسۇلتان نازارباەۆ بەلگىلەپ بەرگەن يندۋستريالىق-يننوۆاتسيالىق دامۋ ستراتەگياسى شاعىن جانە ورتا بيزنەسكە قولداۋ جاساۋ مەن ادام كاپيتالىنىڭ ساپاسىن ارتتىرۋدى قامتيدى. رەفورمالاردىڭ تۇپكى ماقساتى – بارشا قازاقستاندىقتاردىڭ ءال-اۋقاتىن ارتتىرۋ.
بيىلعى وقۋ جىلىندا بۇل جەردە وبلىستىق, قالالىق, اۋداندىق پارتيا فيليالدارىنىڭ جانە ەلىمىزدىڭ بارلىق ايماقتارىنىڭ باستاۋىش پارتيا ۇيىمدارى جەتەكشىلەرى وقيتىن بولادى. وقۋ ورنىنىڭ باستى ماقساتى پارتيالىق-ساياسي ەليتانى قالىپتاستىرۋ بولىپ تابىلادى. قوعامدا بولىپ جاتقان وقيعالارعا دەر كەزىندە جاۋاپ بەرە الاتىن, جاۋاپكەرشىلىك سەزىمى جوعارى, مەملەكەتتىك ساياساتتى جۇرگىزەتىن مامانداردىڭ اسا قاجەت ەكەنى داۋسىز.