كەشە قورعانىس ءمينيسترى ادىلبەك جاقسىبەكوۆ راديوبايلانىس قۇرالدارىن جاسايتىن «تالەس كازاحستان ينجينيرينگ» زاۋىتىن سالتاناتتى جاعدايدا اشتى. «كازينجەلەكترونيكس» قورعانىس كاسىپورنىنىڭ بازاسىندا بىرىگىپ ۋقت جانە قت-دياپازوندى بايلانىس قۇرالدارىنىڭ ءۇشىنشى, ءتورتىنشى بۋىنىن شىعارۋ قولعا الىنباق. بۇل جوبا قازاقستان مەن فرانتسيا پرەزيدەنتتەرى نۇرسۇلتان نازارباەۆ پەن نيكوليا ساركوزيدىڭ ەكى ەل اراسىنداعى ىنتىماقتاستىقتى كەڭەيتۋ جونىندەگى كەلىسىمدەرىنىڭ تاجىريبە جۇزىندە جۇزەگە اسۋىنىڭ العاشقى كەزەڭى. «كازاحستان ينجينيرينگ» پەن «تالەس» كومپانياسىنىڭ بىرلەسە اتقارعان جۇمىسىنىڭ ناتيجەسىندە زاماناۋي تەحنولوگيالىق بازاسى بار كاسىپورىن قۇرىلدى. فرانتسۋزدىڭ «تالەس» كومپانياسى اسكەري جانە ازاماتتىق ماقساتتاعى جوعارى تەحنولوگيالى ەلەكتروندى جۇيەنى جاساۋدا جانە شىعارۋدا الەمدەگى كوشباستاۋشىلاردىڭ ءبىرى. فرانتسيا تمد ەلدەرى اراسىندا قازاقستانعا ءبىرىنشى بولىپ ءوز ارمياسىندا جانە قىرىقتان استام ەلدەردە قولدانىلاتىن جاڭا تەحنولوگياسىن بەرىپ وتىرعاندىعىن اتاپ وتكەن ءجون. قازاقستان ءۇشىن مۇنداي ءوندىرىستى ىسكە قوسۋ ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ ماڭىزدى ەلەمەنتى بولىپ سانالادى. – بۇگىن ءبىز ۇلتتىق راديوەلەكتروندى ونەركاسىپتىڭ دۇنيەگە كەلگەنىنە كۋا بولىپ تۇرمىز جانە دە ونىڭ شىعارعان ءونىمى الدىڭعى قاتارلى ساپا ستاندارتىنا ساي بولۋى ءتيىس,– دەپ اتاپ وتكەن قازاقستان قورعانىس ءمينيسترى ادىلبەك جاقسىبەكوۆ, «تالەس كازاحستان ينجينيرينگ» ەلىمىزدەگى ماڭدايالدى كاسىپورىنداردىڭ ءبىرى بولاتىنىنا سەنىم ءبىلدىردى. ءجۇنىس ومار, قورعانىس مينيسترلىگى ءباسپاسوز قىزمەتىنىڭ ءبولىم باستىعى, پولكوۆنيك. ---------------------------------- سۋرەتتى تۇسىرگەن ەرمەك سارباسوۆ.