مەملەكەت باسشىسىنىڭ اتىنا وڭتۇستىك قازاقستان وبلىسىنىڭ زيالى قاۋىم وكىلدەرى اتىنان حات كەلدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
حات يەلەرى ەلىمىزدىڭ ەكونوميكاسىنىڭ ءوسىپ-وركەندەپ كەلە جاتقانىن اتاپ ءوتىپ, اسىرەسە, وڭتۇستىك قازاقستان وبلىسىنىڭ دامۋىنا مەملەكەت تاراپىنان جان-جاقتى قولداۋ كورسەتىلىپ كەلە جاتقانىنا زور ريزاشىلىق سەزىمدەرىن بىلدىرگەن. ودان ءارى وڭتۇستىكتىك زيالى قاۋىم وكىلدەرى: «وڭتۇستىك وڭىرىندە تۇرعىنداردىڭ ءال-اۋقاتىنىڭ ارتۋىنا مەملەكەت بارلىق جاعداي جاساپ كەلەدى. سونىڭ ءبىر عانا ايعاعى – وتكەن جىلى 75 دەنساۋلىق ساقتاۋ مەكەمەسى, 60 ءبىلىم بەرۋ نىسانى ەل يگىلىگىنە بەرىلدى. ەلباسى باستاماسىمەن قولعا الىنعان «100 مەكتەپ, 100 اۋرۋحانا» جانە «بالاپان» باعدارلامالارىنىڭ اياسىندا بيىلعى جىلعى 1 قىركۇيەكتە 17 مەكتەپ, 7 بالاباقشا جاڭادان اشىلدى. اپاتتىق, ءۇش اۋىسىمدىق مەكتەپتەردىڭ پروبلەمالارى وڭ شەشىمىن تاپتى. وسىنىڭ ءوزى تاۋەلسىز ەلىمىز ءۇشىن ءاربىر جىلدىڭ تولىسۋ, كەمەلدەنۋ جىلىنا اينالعاندىعىن ايقىن كورسەتەدى. بولاشاققا نىق قادام باسىپ كەلە جاتقان مەملەكەتىمىز بۇدان دا وراسان تابىستار مەن بيىك بەلەستەردى باعىندىرا الاتىنىنا كامىل سەنەمىز», دەپ جازادى.
پرەزيدەنتتىڭ ەل مۇددەسى جولىنداعى ەرەن ەڭبەگىنە تولايىم تابىستار, زور دەنساۋلىق جانە وتباسىنا اماندىق-ساۋلىق تىلەگەن حاتقا كەڭەس وداعىنىڭ باتىرى ت.قاۋىمباەۆ, سوتسياليستىك ەڭبەك ەرلەرى ب.شۇكىربەكوۆ پەن ت.اعابەكوۆ, وقو ارداگەرلەر كەڭەسىنىڭ توراعاسى ج.ماۋلەنقۇلوۆ, قازاقستاننىڭ ەڭبەك سىڭىرگەن قايراتكەرى م.بايعۇت, پروفەسسور ءا.ومباەۆ, وبلىستىق سلاۆيان مادەني ورتالىعىنىڭ توراعاسى يۋ.كيريۋحين, وبلىستىق وزبەك ەتنومادەني ءبىرلەستىگىنىڭ توراعاسى ي.حاشيمجانوۆ, قازاقستان كورەيلەرى اسسوتسياتسياسى وبلىستىق فيليالىنىڭ توراعاسى يۋ.يۋگاي, ەڭبەك ارداگەرى, گەنەرال-مايور ج.سۇلتانوۆ, جانە ت.ب. قول قويعان.