كوكشەتاۋداعى «دوستار» مادەنيەت سارايىندا اقمولا وبلىسى ۇكىمەتتىك ەمەس ۇيىمدارىنىڭ V فورۋمى بولىپ, قازاقستان رەسپۋبليكاسىندا 2006–2011 جىلدارعا ارنالعان ازاماتتىق قوعامدى دامىتۋ تۇعىرناماسىنىڭ ورىندالۋ بارىسى, ۇكىمەتتىك ەمەس ۇيىمداردىڭ مەملەكەتتىك ورگاندارمەن بايلانىسىن ودان ءارى نىعايتۋ ماسەلەلەرى تالقىلاندى جانە اتقارىلعان ىستەر قورىتىندىلاندى.
ماجىلىستە بايانداما جاساعان وبلىس اكىمى سەرگەي دياچەنكو قازاقستان تاۋەلسىزدىگىنىڭ 20 جىلدىعى قارساڭىندا وتكىزىلىپ وتىرعان فورۋمنىڭ ماڭىزدىلىعىن ازاماتتىق ينستيتۋتتاردىڭ قوعامداعى قوزعاۋشى كۇشكە اينالعاندىعىمەن بايلانىستىردى. ەلباسى, ۇلت كوشباسشىسى ن.نازارباەۆ وسىناۋ بۇقارالىق ۇيىمدى دامىتۋ مەملەكەتتىڭ ستراتەگيالىق مىندەتى ەكەندىگىن اتاپ كورسەتتى. بەلسەندى قۇرىلىمدارعا ارنايى قارجى مەن گرانتتار ءبولىنىپ, مارتەبەلى ىستەرگە جول اشىلدى. اقمولا وڭىرىندە قازىرگى تاڭدا 465 ۇكىمەتتىك ەمەس ۇيىم جۇمىس اتقارۋدا. مەملەكەت باسشىسىنىڭ جارلىعىمەن قابىلدانعان تۇعىرنامالىق مىندەتتەردى اتقارۋ ءۇشىن 2006–2011 جىلدار ارالىعىندا وبلىس 103,5 ميلليون تەڭگەنى يگىلىككە جاراتتى. ال, بيىل وبلىس بيۋدجەتىنەن بولىنگەن قارجى 60 پايىزعا ارتىپ وتىر.
فورۋمدا حالىقارالىق اقپاراتتاندىرۋ اكادەمياسىنىڭ ءبىرىنشى ۆيتسە-پرەزيدەنتى الەكسەي تسەحوۆويدىڭ, «شوقان جولدارى» جانە «پرومەتەي» قوعامدىق قورلارىنىڭ جەتەكشىلەرى راۋشان كوشەنوۆا مەن ولجاس سىزدىقوۆتىڭ, ارشالى اۋدانىنداعى «اقبوتا» ءبىرلەستىگىنىڭ باسشىسى تاتيانا نەمتساننىڭ, «پاراسات جانە ءدىل» ۇيىمىنىڭ ءتورايىمى قۇرالاي مۇتانوۆانىڭ ازاماتتىق قوعام قۇرۋداعى تابىستارى مەن الداعى مىندەتتەر تۋرالى پىكىرلەرى قىزۋ تالقىلاندى.
بۇدان كەيىن وبلىستىق «جىگەر» بايقاۋىنىڭ جەڭىمپازدارى انىقتالىپ, سەگىز اتاۋ بويىنشا ۇزدىكتەرگە ديپلومدار مەن اقشالاي سىيلىقتار تاپسىرىلدى. جەكە بەلسەندىلەر دە رەسپۋبليكالىق ۆەدومستۆولاردىڭ, وبلىس اكىمىنىڭ العىس حاتتارىمەن ماراپاتتالدى. جيىنعا قاتىسۋشىلار اقمولا وبلىسى ۇكىمەتتىك ەمەس ۇيىمدارىنىڭ الەۋمەتتىك يدەيالار مەن جاڭا جوبالار جارمەڭكەسىن تاماشالاپ, سالالىق ءۇش الاڭداعى شەبەر سىنىپتاردان ءدارىس الدى.
باسقوسۋدا الداعى رەسپۋبليكالىق فورۋمعا دەلەگاتتار سايلاندى.
باقبەرگەن امالبەك.
اقمولا وبلىسى.