بۇگىنگى داۋىردە جۇزدەن جۇيرىك, مىڭنان تۇلپار شىعۋدىڭ جولى ءبىلىم مەن بىلىكتە قالدى. سوناۋ عاسىرلاردا «مەن – ءبىلىم دەسە, تاڭدايى كەپكەن ساياحاتشى سەكىلدىمىن» دەپتى ءال-حورەزمي. شىنىندا, ەلىمىزدەگى ءبىلىم الۋ دەڭگەيى قازىر جوعارى دەۋگە بولادى. بۇگىندە قازاق ەلىندە 6-دان 24 جاسقا دەيىنگى ازاماتتاردىڭ 75,3 پايىزى ءبىلىم بەرۋ باعدارلامالارىمەن قامتىلعان, ساۋاتتى تۇرعىندار 99,6 پايىزدى قۇرايدى. 4,3 ميلليون ادام ءبىلىم الۋ ۇستىندە. ءبىلىم جانە عىلىم سالاسىندا 411 مىڭ پەداگوگ پەن عالىمدار جۇمىس ىستەيدى دەسەك, ول وسى سالادا 30 پايىزدى قامتيدى.
وسىنداي جەتىستىكتەرىمىزبەن تانىسۋ ءۇشىن ارنايى كەلگەن بىرىككەن ۇلتتار ۇيىمىنىڭ ءبىلىم الۋ قۇقىعى ءجونىندەگى ارناۋلى بايانداماشىسى كيشور سينگح پەن ءبىلىم جانە عىلىم ءمينيسترى باقىتجان جۇماعۇلوۆتىڭ كەزدەسۋى بولدى. ءوز كەزەگىندە وتاندىق مينيستر ەلىمىزدەگى ءبىلىم بەرۋ سالاسى, عىلىمي ۇيىمدار, ەل دامۋى, ەل استاناسى تۋرالى قوناقتى جان-جاقتى حاباردار ەتتى. ساپاردىڭ ماقساتىنا كەلەر بولساق, حالىقارالىق مىندەتتەمەلەرگە سايكەس قازاقستانداعى ءبىلىم الۋ قۇقىعىن قامتاماسىز ەتۋدىڭ جاي-كۇيىن باعالاۋ كورىنەدى. ساپار قورىتىندىسى بويىنشا بۇۇ ادام قۇقىقتارى جونىندەگى ەسەپ بەرىلمەكشى.
ك.سينگح استانا, الماتى قالالارىنىڭ ءبىلىم بەرۋ ۇيىمدارىمەن تانىسىپ شىقپاق. ءبىزدىڭ ەلىمىز نەگىزگى حالىقارالىق قۇقىق قورعاۋ شارتتارىنىڭ قاتىسۋشىسى بولىپ تابىلادى. سوندىقتان دا مەملەكەت جان-جاقتى ءبىلىم بەرۋ ماقساتىندا قولدا بار رەسۋرستار اياسىندا اكىمشىلىك, سوتتىق, زاڭدىلىق ءىس-شارالاردى جۇزەگە اسىرۋعا مىندەتتەنىپ وتىر. وتانىمىزدىڭ ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىندا اقىلى ءبىلىم بەرۋ جۇيەسىنىڭ مەملەكەتتىك جيناقتاۋشى قۇرىلىمى ارقىلى حالىقتىڭ قول جەتىمدىلىگىن قامتاماسىز ەتۋ قاراستىرىلعان. سونىڭ ورايىندا قازاقستاننىڭ ءاربىر ازاماتىنا بولاشاقتا ءوز بالاسىن جوعارى وقۋ ورىندارىندا, كوللەدجدەردە وقىتۋعا قاراجات جيناقتاۋ مۇمكىندىگى جان-جاقتى ويلاستىرىلعان.
تاۋەلسىزدىك العان جىلداردان بەرى ءبىلىم الۋ سالاسىنا, اسىرەسە بالالاردىڭ قۇقىعىن قورعاۋ ماسەلەسىنە ەلباسى تىكەلەي ءمان بەرىپ وتىرعانى ءمالىم. قارجى ءبولۋ جاعى دا جىل سايىن ەسەلەپ ارتۋدا. وسىنداي وڭ قادامدارمەن تانىسقان ك.سينگح ەلىمىزدەگى اتالمىش سالاعا وڭ باعا بەردى. ساپار شەڭبەرىندە ول «نازارباەۆ ۋنيۆەرسيتەتىندە», ل.ن.گۋميلەۆ اتىنداعى ءبىلىم ورداسىندا بولادى.
سۇلەيمەن مامەت.