18 جاستاعى ماسكەۋلىك ۆيكتوريا اندرەەۆا الەۋمەتتىك جەلىدە ءوز قاتارلاستارىمەن قازاقشا سويلەسىپ, ءتىل ۇيرەنىپ ءجۇر. ول باتىرحان شۇكەنوۆتىڭ "وتان انا" ءانىن ەستىگەن سوڭ قازاق ءتىلىن ۇيرەنۋدى ماقسات ەتتى, دەپ جازادى "ەۆريكا" گازەتى.
ۆيكتوريانىڭ كوزى تولىق كورمەيدى. زاعيپتارعا ارنالعان مەكتەپتە وقيتىن بويجەتكەن بىرنەشە جىل بۇرىن الەۋمەتتىك جەلىدە قازاقستانداعى قاتارلاستارىمەن تىلدەسىپ, ولاردان قايرات نۇرتاستىڭ وزىنە ۇناعان اندەرىن ۇيرەنىپتى.
"ول كەزدە قاتتى اسەر ەتپەدى. ال باتىرحان شۇكەنوۆتىڭ "وتان انا" ءانىن تىڭداعان كەزدە ەرەكشە سەزىمدە بولدىم. مەنىڭ سول كەزدە نە سەزىنگەنىمدى سوزبەن ايتىپ جەتكىزۋ مۇمكىن ەمەس. بۇل ادامنىڭ قازىر ومىردە جوق ەكەنى وكىنىشتى. "وتان انا" ءانى ەرەكشە سيقىرعا يە سەكىلدى. مەنىڭشە, باتىرحان وتانىنا دەگەن ماحابباتىن ايتقان. سول سەزىم ماعان دە بەرىلگەن سەكىلدى. وسى ساتتەن كەيىن قازاق ءتىلىن ۇيرەنۋگە دەگەن قۇشتارلىعىم ارتتى. ءسويتىپ, وسى ءتىلدى ۇيرەنۋگە دەن قويا باستادىم", دەيدى ۆيكتوريا.
ماسكەۋلىك قىزدىڭ ايتۋىنشا, ول soyle.kz سايتى ارقىلى ءتىل ۇيرەنە باستاعان. كەيىننەن گرافيكالىق ەلەمەنتتەرگە بايلانىستى اتالعان سايت زاعيپ جاندارعا قولجەتىمسىز بولادى. "جاڭا تولقىن" كۋرسى دا ءوزىنىڭ ىڭعايىنا بەيىمدەلمەگەندىكتەن, ۆيكتوريا الەۋمەتتىك جەلى ارقىلى وزىنە ءتىل ۇيرەنۋگە كومەكتەسەتىن ادام ىزدەيدى. قازىر وعان ءتىل مەڭگەرۋ ءۇشىن اقتوبەلىك قاتارلاسى كومەكتەسىپ ءجۇر ەكەن.
بۇگىندە ۆيكتوريا قازاق تىلىندە ءوزى تۋرالى اڭگىمەلەپ بەرە الادى. بىراق ونىڭ ارمانى - ەركىن سويلەۋ, فيلمدەر كورىپ, اندەردى اۋدارۋ.
"مەن الدار كوسە ەرتەگىسىنىڭ كەيىپكەرلەرىن بىلەمىن. "قىز جىبەك" ءفيلمىن كوردىم. زاماناۋي ەسترادادان بولەك امىرە قاشاۋباەۆ, ءشامشى قالداياقوۆتىڭ اندەرىن تىڭدادىم. مۇقاعالي ماقاتاەۆتىڭ ولەڭدەرىن وقىدىم. ماعان ۇنادى. ءسوزىن قاتتى تۇسىنبەسەم دە, ءتىلدىڭ دىبىستالۋىنىڭ ءوزىن ەرەكشە جاقسى كورەمىن. بۇل شىعىس ەكەنى سەزىلەدى. مەن ءۇشىن بۇل تاڭسىق", دەيدى ۆيكتوريا اندرەەۆنا. سونىمەن قاتار ۆيكتوريا قازاقشا ءان تىڭداعاندى ەرەكشە جاقسى كورەدى ەكەن. "قازاق ءتىلى ارقىلى مەنىڭ ءان ايتۋعا قۇشتارلىعىم وياندى. باسىندا تەك تىڭداپ جۇرەتىنمىن. كەيىن ويلانا كەلە, نەگە وزىمە دە ءان سالماسقا دەگەن وي كەلدى. ءاندى ۇزاق ىزدەپ, بىرەۋىن تاڭداپ, ونىڭ سوزدەرىن جازىپ الدىم. تۇبىندە ءبىر ناتيجە شىعار", دەيدى بويجەتكەن.
باسىلىمنىڭ ايتۋىنشا, ماسكەۋلىك قىز قازاق ەسترادا انشىلەرىنىڭ كوپشىلىگىن بىلەدى. ول اقبوتا كەرىمبەكوۆا, ەركە ەسماحان, قاراقات ءابىلدينا, باتىرحان شۇكەنوۆ, ديماش قۇدايبەرگەنوۆ, "Melo Men", "ارناۋ" توبىن, "جىگىتتەر" كۆارتەتىنىڭ اندەرىن تىڭدايدى.
بويجەتكەن وزىنە ۆيرتۋالدى الەمدە قازاقستاننان تەك اشىق, اقكوڭىل, مەيىرىمدى جانداردىڭ جولىققانىن ايتادى. ۆيكتوريانىڭ ايتۋىنشا, ەگەر دە مۇمكىندىك بولسا, ول قازاقستانعا قۋانا-قۋانا كەلەر ەدى. سەبەبى سۇيىكتى تىلىندە ادامدارمەن بەتپە-بەت تىلدەسىپ, قازاقتىڭ ۇلتتىق تاعامدارىنىڭ ءدامىن تاتقىسى كەلەدى.