سەناتور ماناپ كوبەنوۆ پاۆلودار وبلىسىنداعى اقتوعاي اۋدانىندا بولدى. اۋدان اكىمى اعىباي امىرينمەن كەزدەسۋدە ايماقتىڭ الەۋمەتتىك-ەكونوميكالىق دامۋىنداعى باسىمدىققا يە ماسەلەلەر تالقىلاندى.
اتاپ ايتقاندا, اقتوعاي اۋىلىنداعى ءار ءۇيدى اۋىز سۋمەن قامتاماسىز ەتەتىن سۋ قۇبىرى قۇرىلىسىنىڭ ءىى كەزەڭىن ىسكە اسىرۋ كەلەشەگى قارالدى. 2017 جىلى بۇل باعدارلامانى ىسكە اسىرۋعا رەسپۋبليكالىق بيۋدجەتتەن 930 ميلليون تەڭگە ءبولۋ كوزدەلىپ وتىر.
دەپۋتات اقتوعاي اۋىلىنداعى بالالاردىڭ ونەر مەكتەبىنىڭ جۇمىسىمەن تانىسىپ, اقتوعاي اۋدانىنىڭ قۇرمەتتى ازاماتى جاسۇلان شورمانوۆ باسقاراتىن «اۋىلداستار» كلۋبىنىڭ ارداگەرلەرىمەن اڭگىمەلەستى.
تاياۋ كۇندەرى م.كوبەنوۆ ەكىباستۇز جانە اقسۋ قالالارىنا, سونداي-اق, پاۆلودار وبلىسىنداعى بىرقاتار اۋداندارعا بارۋدى جوسپارلاپ وتىر.
فاريدا بىقاي,
«ەگەمەن قازاقستان»
پاۆلودار وبلىسى
* * *
سەنات دەپۋتاتتارى مۇرات باقتيار ۇلى مەن بەكمىرزا ەلامانوۆ ايماقتارعا ساپارلارى اياسىندا قىزىلوردا وبلىسىندا بولدى. سەناتورلار جالاعاش اۋدانىنىڭ الەۋمەتتىك-ەكونوميكالىق دامۋ بارىسىمەن تانىستى.
جەرگىلىكتى حالىقپەن كەزدەسۋلەر بارىسىندا اۋدان ورتالىعىنداعى ينفراقۇرىلىمدى دامىتۋ جانە «نۇرلى جەر» باعدارلاماسى بويىنشا بولىنگەن 420 ميلليون تەڭگەنىڭ يگەرىلۋى تۋرالى ماسەلەلەر كوتەرىلدى.
دەپۋتاتتار وسى اۋدانداعى ميا تامىرىن وڭدەۋ زاۋىتىندا بولىپ, ەڭبەك ۇجىمىمەن كەزدەستى. قازىرگى كەزدە ەلۋ شاقتى ادام جۇمىس ىستەيتىن ميا تامىرىن وڭدەۋ زاۋىتى ونىمدەرىنىڭ ەداۋىر بولىگى شەت ەلگە ەكسپورتقا شىعارىلادى.
م.باقتيار ۇلى مەن ب.ەلامانوۆ سىرداريا اۋدانىندا بولعان كەزدەرىندە قالجان احۋن اۋىلىنداعى كۇرىششىلەرمەن كەزدەستى. جۇزدەسۋ بارىسىندا ەڭبەك ونىمدىلىگىن ارتتىرۋ, تىڭايتقىشتار مەن جانار-جاعار ماي ماسەلەلەرى تۋرالى اڭگىمە قوزعالدى.
سىرداريا اۋدانىنداعى مەكتەپتە بولعان كەزدەسۋدە مەملەكەت باسشىسىنىڭ بەس ينستيتۋتتىق رەفورماسىن جۇزەگە اسىرۋ جونىندەگى «100 ناقتى قادام» ۇلت جوسپارىن ىسكە اسىرۋ جانە ءۇش تۇعىرلى ءتىلدى دامىتۋ جايىندا اڭگىمە بولدى.
ەرجان بايتىلەس,
«ەگەمەن قازاقستان»
قىزىلوردا وبلىسى
***
پارلامەنت سەناتى دەپۋتاتتارىنىڭ ايماقتارعا ساپارى ودان ءارى جالعاسۋدا. بۇل كۇندەرى سەناتور مارات تاعىموۆ اقتوبە وبلىسىندا جۇمىس بابىنداعى ساپاردا ءجۇر.
دەپۋتات وبلىس ورتالىعى مەن العا اۋدانىندا جەرگىلىكتى ءماسليحات دەپۋتاتتارىمەن جانە جۇرتشىلىقپەن كەزدەسۋلەر وتكىزدى. م.تاعىموۆ «ايبەك» قالبىرلاۋ زاۋىتىندا جانە اقتوبەدەگى قالالىق جىلىجاي شارۋاشىلىعىندا دا بولدى. العا اۋدانىنداعى «نۇرلى جول» باعدارلاماسى بويىنشا قارجىلاندىرىلعان ەت وڭدەۋ كەشەنى مەن «العا جىلۋ» كمك تازارتۋ عيماراتىنىڭ جۇمىسىمەن تانىستى, سونداي-اق, قۇقىق قورعاۋ ورگاندارىنىڭ باسشىلىعىمەن كەزدەستى. ەڭبەك ۇجىمدارىمەن جۇزدەسۋ بارىسىندا ايماقتىڭ ەكونوميكالىق وركەندەۋى مەن الەۋمەتتىك ماسەلەلەردى شەشۋ تۋرالى اڭگىمە ءوربىدى.
سەناتور الداعى ۋاقىتتا مارتوك جانە ايتەكە بي اۋداندارىنا بارۋدى جوسپارلاپ وتىر.
ساتىبالدى ءساۋىرباي,
«ەگەمەن قازاقستان»
اقتوبە وبلىسى
* * *
سەنات دەپۋتاتتارى ايماقتاردىڭ الەۋمەتتىك-ەكونوميكالىق دامۋ بارىسىمەن تانىسۋدا. الماتى وبلىسىندا ساپاردا جۇرگەن سەناتورلار نۇرلان قىلىشباەۆ پەن اڭسار مۇساحانوۆ قاپشاعاي قالاسىندا, شەڭگەلدى جانە زارەچنىي اۋىلدىق وكرۋگتەرىندە بىرقاتار كەزدەسۋلەر وتكىزدى.
دەپۋتاتتار «اگريپاك» وراما-قاپتاما ونىمدەرىن وندىرەتىن تسەحىندا, «راۋان» شارۋا قوجالىعىندا, «بالىق ءوندىرىسى», «گرين لەند الاتاۋ», «مارەۆەن فۋد تيان-شان» مەكەمەلەرىندە بولدى. سونداي-اق, «نۇرلى جول» باعدارلاماسى بويىنشا زارەچنىي اۋىلدىق اكىمدىگىندە سالىنعان بۋ قازاندىعىنىڭ جۇمىسىمەن تانىستى.
سەناتورلار بالقاش اۋدانىندا «Dinara-Ranch» جانە «وتەسبيوازيا» اگروفيرمالارىنىڭ ەڭبەك ۇجىمدارىمەن, سونىمەن قاتار, اۋداندىق قوعامدىق كەڭەس پەن جەرگىلىكتى پوليتسيا باسشىلىعىمەن كەزدەستى. جۇزدەسۋلەر بارىسىندا ن.قىلىشباەۆ پەن ا.مۇساحانوۆ سايلاۋشىلاردى بەس ينستيتۋتتىق رەفورما مەن «100 ناقتى قادام» ۇلت جوسپارىن ىسكە اسىرۋعا ارنالىپ پارلامەنتتە قابىلدانعان زاڭدار تۋرالى حاباردار ەتتى.
نۇربول الدىباەۆ,
«ەگەمەن قازاقستان»
الماتى وبلىسى
***
اقمولا وڭىرىنە كەزەكتى ساپارمەن كەلگەن پارلامەنت ءماجىلىسىنىڭ دەپۋتاتتارى ساپار احمەتوۆ, ەرسۇلتان بەكتۇرعانوۆ, جانات جاراسوۆ, جەكسەنباي دۇيسەباەۆ جانە ميحايل چيركوۆ ءوز كەزدەسۋلەرىن وبلىستىق «نۇر وتان» پارتياسى اكتيۆىنەن باستادى.
بۇقارامەن كەزدەسۋ بارىسىندا ەلباسىنىڭ ساياساتىن جۇزەگە اسىرۋداعى نەگىزگى اتقارىلعان جۇمىستارىنا ەسەپ, قويىلعان سۇراقتارعا جاۋاپ بەردى. پارتيا اكتيۆىمەن وتكەن كەزدەسۋدەن سوڭ, دەپۋتاتتار «سينەگوريا» كوكشەتاۋ ءسۇت زاۋىتىنىڭ جۇمىسىمەن تانىستى. ءسۇت ءوندىرىسى بارىسىندا قولدانىلاتىن زاماناۋي تەحنولوگيالاردى كورىپ, ءسۇت ونىمدەرىنە جوعارى باعا بەردى.
بۇدان ءارى ءماجىلىس دەپۋتاتتارى وبلىس ورتالىعىندا ورنالاسقان ىشكى ىستەر مينيسترلىگىنە قاراستى كوكشەتاۋ تەحنيكالىق ينستيتۋتىنىڭ وقىتۋشى-پروفەسسورلىق قۇرامىمەن جانە كۋرسانتتارمەن كەزدەسىپ, ولاردىڭ ماتەريالدىق-تەحنيكالىق بازاسىمەن تانىستى. بۇگىنگى تاڭدا جوعارى وقۋ ورنى قابىرعاسىندا 600 كۋرسانت ءبىلىم الىپ جاتىر, ولاردىڭ ىشىندە رەسەي مەن بەلارۋس مەملەكەتتەرىنىڭ ازاماتتارى دا بار. بولاشاق ءورت ءسوندىرۋشى ماماندار تولىعىمەن مەملەكەت قاراماعىندا.
سونىمەن قاتار, دەپۋتاتتار جەكسەنباي دۇيسەباەۆ پەن ساپار احمەتوۆ «نۇر وتان» پارتياسىنىڭ اقمولا وبلىستىق فيليالىندا قوعامدىق قابىلداۋ وتكىزىپ, تۇرعىنداردىڭ سۇراقتارى مەن ماسەلەلەرىن قارادى.
باقبەرگەن امالبەك,
«ەگەمەن قازاقستان»
اقمولا وبلىسى