روماننىڭ قىسقى سپورت تۇرلەرى اراسىنان كونكيدى تاڭداۋى كەزدەيسوق ەمەس. تەتەلەس ەكى اعاسى جاستايىنان سپورتتىڭ وسى تۇرىمەن اينالىسىپ, بويى سيدام, دەنەسى جۇقالتاڭ توعىز جاستاعى ىنىلەرىنىڭ دە قىزىعۋشىلىعىن وياتقان. سودان بەرى ول كونكيمەن قىسقا قاشىقتىققا جۇگىرۋگە ابدەن ماماندانىپ, بۇگىندە ەلىمىزدىڭ ماڭدايالدى مايتالمان سپورتشىسى قاتارىنا قوسىلعان. حالىقارالىق دارەجەدەگى سپورت شەبەرىنىڭ ۇزدىك جەتىستىكتەرىن سانامالاپ شىعۋدىڭ ءوزى وڭاي ەمەس. قازاقستاننىڭ بىرنەشە دۇركىن چەمپيونى اتانعانىن بىلاي قويعاندا, بايراقتى باسەكەلەردە دە تالاي رەت ولجا سالدى.
2014 جىلى سوچي وليمپياداسىندا 500 مەتر قاشىقتىقتا جەتىنشى, 1000 مەترلىكتە ون ءۇشىنشى ساتىدان كورىنگەن سپورتشى دەنساۋلىعىنا بايلانىستى گەرمانيا مەن گوللانديادا وتكەن الەم كۋبوگىنىڭ كەزەڭدىك سىندارىنا قاتىسا الماعان. ويتكەنى, ونىڭ الدىندا ەكى رەت تىزەسىنە, بۇعاناسىنا, ءسىڭىرى سوزىلعان اياعىنا وتا جاساتىپ, بىرنەشە اي بويى سپورتتان قول ۇزۋىنە تۋرا كەلگەن.
– ۇزدىكسىز جاتتىعۋلار كەزىندە العان جاراقاتتار سىر بەرىپ, شاراسىزدىقتان ەشتەڭە جاساي الماي, تىعىرىققا تىرەلگەن كەزدەرىم ءالى كۇنگە ەسىمدە. سپورتتا مۇنداي ساتسىزدىكتەر ءجيى كەزدەسەدى. وعان نالىساڭ, كۇيرەكتىككە بەرىلسەڭ, دىتتەگەن مەجەگە جەتە المايسىڭ. كەرىسىنشە, قاتەلىكتەردەن ساباق الا وتىرىپ, العا قويعان ماقساتتارعا جەتۋگە بولاتىنىن ومىرلىك تاجىريبەدەن جاقسى بىلەمىن. سول كەزدە كەلەسى ماۋسىمدارعا تىڭعىلىقتى دايىندىق جاساۋ ءۇشىن ءبىراز كۇش جيناپ الۋ تۋرالى باپكەرلەر دۇرىس شەشىم العان ەدى, – دەيدى ر.كرەچ.
قوس تاراپتىڭ بىردەن-ءبىر دۇرىس قادام جاساعاندارىن كەيىنگى جارىستار ايقىن بايقاتتى. مۇنىڭ الدىندا اقش-تىڭ سولت-لەيك-سيتي قالاسىندا ۇيىمداستىرىلعان الەم كۋبوگىنىڭ ءتورتىنشى كەزەڭىندە 500 مەتر قاشىقتىقتى 34, 82 سەكۋندتا جۇگىرىپ ءوتىپ, ءۇشىنشى ورىن العان روماننىڭ الدىندا ناتيجەنى وسى دەڭگەيدەن تومەندەتپەۋ مىندەتى تۇردى. ول وسىندا داڭقتى جەرلەسى ۆاديم شاقشاقباەۆتىڭ 13 جىلدان بەرى وزگەرىسسىز تۇرعان رەكوردىنا وزگەرىس ەنگىزدى.
– 2008-2009 جىلدارى جاسوسپىرىمدەر اراسىنداعى الەم چەمپيونى بىلتىر كۇزدە اسپاناستى ەلىندە جالاۋى جەلبىرەگەن الەم كۋبوگىنىڭ «ا» ديۆيزيونىندا كونكيمەن جۇگىرۋدە تاماشا ونەر كورسەتىپ, مارە سىزىعىن ءبىرىنشى بولىپ قيدى. 500 مەترلىك قاشىقتىقتا الەم جەڭىمپازى, رەسەيلىك پاۆەل كۋليجنيكوۆ پەن گوللانديالىق كاي فەربايدى قاپى قالدىردى. وسىلايشا 21 جىل بۇرىن داۆوستا ۆاديم شاقشاقباەۆتىڭ ۇتىپ العان التىن جۇلدە قورىن تولىقتىرىپ, كورسەتكىشىن دە جاڭارتتى. رومان توزىمدىلىك, جىگەرلىلىك, ماقساتكەرلىك قاسيەتتەرى ارقاسىندا تالاي ازۋلى قارسىلاس- تارىن شاڭ قاپتىرىپ ءجۇر. الماتىدا وتەتىن حالىقارالىق ۋنيۆەرسياداعا ۇكىلەپ قوسىپ وتىرمىز. نەگىزگى ءۇمىتكەرلەرىمىزدىڭ ءبىرى. قازىر بابىندا, ازىرلىگى جاقسى, – دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەنالين.
ازيا چەمپيونى, ۆانكۋۆەر مەن سوچيدەگى وليمپيالىق ويىنداردا ەل نامىسىن قورعاعان روماننىڭ باسىنان مىنانداي «قىزىق» جاعداي دا وتكەن. ءبىر كەزدەرى ونىڭ وتباسىنا جەر تەلىمى, قوسىمشا قۇرىلىس الاڭدارى بار باسپاناسىنا ءسۇرىلۋ قاۋپى تونگەن. وعان ايىرباس رەتىندە مەردىگەر ۇيىمدار تاراپىنان قۇرقىلتايدىڭ ۇياسىنداي ءبىر بولمەلى پاتەر ۇسىنىلعان. وسىنداي قيىن جاعدايدا قالعاندا وبلىس اكىمدىگى ەكى بولمەلى پاتەردىڭ كىلتىن تابىستاعان. سانالى عۇمىرىن كاسىبي سپورتقا ارناپ كەلە جاتقان كونكيشىگە جەرگىلىكتى بيلىك قولداۋ كورسەتكەن.
ولاي بولسا, رومان كرەچ تە قازاقستاندىقتاردى جەرگە قاراتپايدى دەگەن ۇمىتتەمىز.
ءومىر ەسقالي,
«ەگەمەن قازاقستان»
پەتروپاۆل