بۇگىن «باس رەداكتورلار كلۋبى» قوعامدىق بىرلەستىگىنىڭ ەسەپ بەرۋ - سايلاۋ كونفەرەنتسياسىندا بىرلەستىك پرەزيدەنتى مەن باسقارما مۇشەلەرىنىڭ جاڭا قۇرامى سايلاندى. كلۋب پرەزيدەنتى رەتىندە قازاقستان جۋرناليستيكاسى اكادەمياسىنىڭ اكادەميگى ەرلان بەكحوجين كانديداتۋراسى ءبىراۋىزدان قولداۋ تاپتى. بۇعان دەيىن بۇل قىزمەتتى اتقارعان بيبىگۇل جەكسەنباي پرەزيدەنتتىكتەن ۇيىمنىڭ جارعىسىنا ساي, ياعني سايلانۋ مەرزىمى اياقتالۋىنا بايلانىستى بوساتىلدى.
سونداي-اق, باس رەداكتورلار كلۋبىنىڭ مۇشەلەرى بىرلەستىكتىڭ ۆيتسە-پرەزيدەنتتەرىن ءبىراۋىزدان سايلادى. ولاردىڭ ىشىندە - تانىمال تەلەجۋرناليست بيبىگۇل جەكسەنباي, «ادىلەت» ۇلتتىق اپتالىعىنىڭ رەداكتورلار كەڭەسىنىڭ توراعاسى مۇراتبەك توقتاعازين, حالىقارالىق تەلەۆيدەنيە جانە راديو اكادەمياسىنىڭ اكادەميگى (AIATR) ارسەني دۇيسەنوۆ, «چەلوۆەك ي زاكون» گازەتىنىڭ باس رەداكتورى مارات باشيموۆ, «ۋكراiنسكi نوۆيني» رەسپۋبليكالىق گازەتىنىڭ باس رەداكتورى تاراس چەرنەگا بار.