اقمولا وبلىسىنداعى قۇرامىندا ەتتى قايتا وڭدەۋ كەشەنى بار جاڭا بورداقىلاۋ الاڭى ءوزىنىڭ العاشقى ءونىمىن استانالىق بازارلارعا جەتكىزە باستادى. كاسىپورىننىڭ ەندىگى جوسپارىندا كورشىلەس قىتاي ەلىنە دە ەتتى ەكسپورتقا شىعارۋ ماسەلەسى تۇر. بۇل جوبا «قازاگرو» ۇلتتىق حولدينگىنىڭ 10 جىلدىعى جانە قازاقستان تاۋەلسىزدىگىنىڭ 25 جىلدىعى قارساڭىندا ىسكە اسىرىلدى.
اقمولا وبلىسىنىڭ ەرەيمەنتاۋ اۋدانىندا 3000 باسقا ارنالعان بورداقىلاۋ الاڭىن جانە جىلىنا 5000 توننا ەتتى وڭدەپ, ودان ونىمدەر شىعارا الاتىن كاسىپورىندى ۇيىمداستىرۋعا ارنالعان جالپى قۇنى 1,5 ملرد تەڭگە تۇراتىن بۇل جوبانى «قازاگرو» ۇلتتىق حولدينگىنىڭ قۇرامىنداعى «قازاگروقارجى» اق قارجىلاي قولداۋىمەن «جاڭا-بەرەكە» شارۋا قوجالىعى ىسكە اسىردى. ونىڭ ديرەكتورى ايبەك قازىبەكوۆتىڭ ايتۋىنشا, كاسىپورىن ءوندىرىستىڭ تولىق تسيكلى بويىنشا جۇمىس ىستەي الادى. ياعني, شارۋا قوجالىعىنداعى نەمەسە وعان كەلىپ تۇسكەن مال ەتكە وتكىزىلەر الدىندا بورداقىلاۋ الاڭىندا كۇتىمگە الىنىپ, سەمىرتىلەدى دە, ودان كەيىن وندىرىستىك نەگىزدە سويىلىپ, ەت وڭدەۋ كەشەنىنە جونەلتىلەدى. بۇل تسيكلدىق جۇيە وندا ازىرلەنگەن ەت ونىمدەرىن قازاقستاننىڭ ساۋدا جەلىلەرىنە جونەلتىپ قانا قويماي, ۆەتەرينارلىق تۇرعىدان نەعۇرلىم قاتاڭ تالاپتار قويىلاتىن شەتەل نارىقتارىنا شىعارۋعا دا مۇمكىندىك بەرەدى. وسى ءۇشىن كاسىپورىن حالىقارالىق ستاندارتتارعا سايكەستىك سەرتيفيكاتىنا يە بولىپ وتىر.
شارۋاشىلىقتاعى باسەكەگە قابىلەتتى ءونىم جاساۋعا مۇمكىندىك بەرەتىن ءوندىرىستىڭ نەگىزى شالعايداعى مال شارۋاشىلىعى بولىپ تابىلادى. شارۋاشىلىقتا باعىلاتىن قازاقتىڭ اقباس جانە قالماق تۇقىمدى سيىرلارى جەرگىلىكتى جاعدايلارعا جاقسى بەيىمدەلگەندىگىمەن ەرەكشەلەنەدى. مۇنداعى ءىرى قارا مال قورادا قامالىپ ۇستالمايدى. جارتى جىل بويى جايلاۋدا جانە تابيعي جايىلىمداردا باعىلا وتىرىپ, بالاۋسا شوپتەردى مولىنان پايدالانادى.
«جاڭا-بەرەكە» شق باسشىسى ءوز سوزىندە «قازاگرو» ۇلتتىق حولدينگىنىڭ قۇرامىنداعى دامۋ ينستيتۋتتارى «قازاگروقارجى» اق, «اگرارلىق نەسيە كورپوراتسياسى» اق, «قازاگروماركەتينگ» اق بۇل جوبانىڭ جۇزەگە اسۋىنا ۇلكەن كومەك كورسەتكەندىگىن اتاپ ءوتتى. قازىبەكوۆتىڭ ايتۋىنشا, سولاردىڭ كورسەتكەن قولداۋىنىڭ ارقاسىندا جەڭىلدىكتى نەسيە الۋعا, ليزينگتىك جابدىقتار مەن اۋىلشارۋاشىلىق تەحنيكالارىن ساتىپ الۋعا, سونداي-اق, مەملەكەتتىك سۋبسيديانى دەر كەزىندە پايدالانۋعا قول جەتكىزىلگەن.
ايتسا ايتقانداي, شارۋاشىلىق 1364 باس ءىرى قارا مالىن قازاقستان مەن رەسەيدىڭ اسىل تۇقىمدى شارۋاشىلىقتارىنان «قازاگروقارجى» اق بولگەن قاراجات ەسەبىنەن ساتىپ الىپتى. بۇگىنگى تاڭدا شارۋاشىلىقتاعى ءىرى قارا سانى ونىڭ جەكە مالىمەن قوسا ەسەپتەگەندە 2 127 باسقا جەتىپ وتىر.
«جاڭا-بەرەكە» شق جوبانى تۇراقتى نەگىزدە دامىتۋ ءۇشىن ءوز قاراجاتىن دا جۇمسادى. مالداردى زەرتتەۋ جانە ۆەتەرينارلىق, سانيتارلىق تالاپتاردى ساقتاۋ ءۇشىن قاجەتتى ارناۋلى جابدىقتار, ۆاكتسينالار, ءدارى-دارمەكتەر مەن ءدارۋمەندەر, مالدىڭ تۇقىمىن جاقسارتۋ مەن ولاردى جەرگىلىكتى جاعدايعا بەيىمدەۋ ءۇشىن قاجەتتى زاتتار ساتىپ الىندى. مالداردى باعىپ-كۇتۋ ءۇشىن قازاقستاننىڭ بارلىق جەرلەرىنەن ماماندار ىرىكتەلدى. ءتىپتى, الىستاعى بەلورۋسسيادان ماماندار تارتىلدى.
اۋىلدا شارۋاشىلىقتىڭ ماماندارىنا ارنالىپ 5 تۇرعىن ءۇي سالىندى. جالپى, اتالعان جوبانى ىسكە اسىرۋ ماۋسىمدىق جۇمىسقا تاۋەلدى ەمەس 50-دەن استام تۇراقتى جاڭا جۇمىس ورنىن قۇرۋعا ىقپالىن تيگىزدى.
سۇڭعات ءالىپباي,
«ەگەمەن قازاقستان»