بايبوسىن تاماباەۆ – بيىل ءجۇز جىل تولعان 1916 جىلعى ۇلت-ازاتتىق كوتەرىلىسىنە قاتىسىپ, تۋعان حالقىنىڭ بوستاندىعى ءۇشىن كۇرەسكەن باتىر بابامىز. تاريحتان بەلگىلى, سول كەزدەگى بۇكىل قازاق جەرىندە بۇرق ەتكەن تولقۋ ۆەرنىي ۋەزىن دە قامتىدى. سونداي ۇلكەن باس كوتەرۋلەردىڭ ءبىرى ۇشقوڭىر تاۋى ماڭىندا ورىن الىپ, وعان اتاقتى بەكبولات اشەكەەۆتىڭ باسشىلىق ەتكەنى ءمالىم. مىنە, بايبوسىن اتامىز قاسىنا ەرتكەن قىرىق جىگىتىمەن بەكبولاتتىڭ قولىنا قوسىلىپ, ەل ەركىندىگى ءۇشىن باسىن بايگەگە تىككەن. بۇل كوتەرىلىسشىلەردىڭ دە مۇزداي قارۋلانعان جازالاۋشىلار وتريادىنا قارسى تۇرا الماي جەڭىلىسكە ۇشىراعانىن بىلەمىز.
سونىمەن, 1916 جىلى 8 قىركۇيەكتە بورالداي بيىگىندە بەكبولات اشەكەەۆپەن بىرگە بايبوسىن تاماباەۆ تا دارعا اسىلعان. سول سياقتى, دۇيسەبەك قاسىمبەكوۆ, ەكەيباي ساتقىنوۆ, ابىلەش بەكباتىروۆ, ءابدىراشوۆ, سىپاتاەۆ ءولىم جازاسىنا كەسىلگەن.
ب.تاماباەۆ 1856 جىلى تۋعان. ۆەرنىي ۋەزى, ۇلكەن الماتى بولىسىنىڭ №1 اۋىلىندا دۇنيەگە كەلگەن. كەزىندە بي دە, بولىس تا بولعان داۋلەتتى ادام ەكەن. بىراق, باي بولسا دا, بار بولسا دا حالىق جاعىنا شىعىپ, پاتشا جارلىعىنا قاتتى قارسىلىق بىلدىرگەندەردىڭ قاتارىنا كىرگەن.
...قاراتوبە اۋىلىنداعى ورتا مەكتەپ قازىر ب.تاماباەۆ اتىندا. مەكتەپ ۇجىمى ديرەكتورى كۇلپان يساباەۆانىڭ باسشىلىعىمەن, وكرۋگ اكىمى باقىتگۇل جۇمانباەۆا جانە ق.قوسشىعۇلوۆتىڭ كومەك-قولداۋىمەن, وسى ۋاقىتقا دەيىن باتىر ەسىمى مەن رۋحىنا ارنالعان ءبىرتالاي ءىس-شارانى جۇزەگە اسىرىپتى. ەندى, مىنە, قولا ءمۇسىنى ورناتىلدى. ونى جاساتقان بابامىزدىڭ تىكەلەي ۇرپاقتارى, اعايىندارى ەكەن.
ايتقانداي, باتىردىڭ ۇلى وتان سوعىسىنا قاتىسقان بەردىباي امىرە ۇلى دەگەن نەمەرەسى بولعان. ال ول كىسىنىڭ زايىبى, ياعني, بايبوسىننىڭ نەمەرە كەلىنى ءماريا اجە بايمولداقىزىنىڭ قازىر كوزى ءتىرى, جاسى 94-تە. بۇگىندە وسى بەردىباي مەن ءماريانىڭ ۇل-قىزدارى , نەمەرەلەرى ءوسىپ, وركەن جايىپ وتىر.
سوڭىنان باتىر رۋحىنا ارنالىپ اس بەرىلدى.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى