سول جىلى بەلارۋستىڭ موزىر قالاسى ءۇشىن بولعان شايقاستا ەرلىكپەن قازا تاپقان باتىردىڭ دەنەسى موزىر قالاسىنداعى باۋىرلاستار زيراتىنا جەرلەنەدى. باتىر ەسىمىن ەستە ساقتاۋ ماقساتىندا ماڭعىستاۋ وبلىسىندا ج.قالدىقاراەۆ اتىنا مەكتەپ, كوشە اتتارى بەرىلىپ, بەينەۋ كەنتىندە ەسكەرتكىش ورناتىلعان.
مەملەكەت باسشىسىنىڭ «بولاشاققا باعدار – رۋحاني جاڭعىرۋ» ماقالاسى اياسىندا بيىل باتىر ۇرپاقتارى مەن تۋىستارى ەر رۋحىنا تاعزىم ەتۋ ءۇشىن ۇلكەن ىسكە بىلەك سىبانا كىرىسكەن بولاتىن. 4 مامىر كۇنى 25 ادام وتىرعان 2 شاعىن اۆتوبۋس 10 مىڭ شاقىرىم جول ءجۇرىپ, رەسەي, بەلارۋستىڭ قالالارىن ارالاپ, مايداندا قازا تاپقاندار رۋحىنا زيارات ەتتى.
ماڭعىستاۋلىق ەكسپەديتسيا مۇشەلەرى وزدەرىن ريزاشىلىقپەن قارسى العان جانە زيراتتا جەرلەنگەن 80 شامالى قازاق جاۋىنگەرلەرىنە دەگەن شەكسىز قۇرمەتى ءۇشىن بەلارۋس ەلىنىڭ ازاماتتارىنا ريزا بولىپ ورالدى. تۋعان جەرىنىڭ توپىراعىن اپارىپ باتىر زيراتىنا قويعان ۇرپاقتارى, باتىردىڭ زيراتىنان اكەلىنگەن توپىراقتى اقتاۋ قالاسىنداعى داڭق اللەياسىنداعى باتىرعا ارنالعان ستەلاعا قويدى. سالتاناتتى شاراعا ماڭعىستاۋ وبلىسىنىڭ اكىمى ە.توعجانوۆ, اقتاۋ قالاسىنىڭ اكىمى س.تۇرىموۆ, باتىر ۇرپاقتارى مەن قالا تۇرعىندارى قاتىستى.
«بابالاردىڭ تاۋەلسىزدىك ءۇشىن توككەن قانى مەن ەرلىگىن قاي كەزەڭدە ايتساق تا ارتىق بولمايدى. سەبەبى, ول كىسىلەردىڭ ەڭبەگىن ۇمىتۋعا حاقىمىز جوق. جۇماعالي بابامىزدىڭ رۋحى شالقىپ جاتقان بولار, اتا ارۋاعى الدىندا ۇلكەن ءىس تىندىرعان باتىر ۇرپاقتارىنا العىسىم شەكسىز», دەدى وبلىس اكىمى ە.توعجانوۆ.
گۇلايىم شىنتەمىرقىزى, «ەگەمەن قازاقستان»
سۋرەتتى تۇسىرگەن سەرىك مايەمەروۆ