«لاگەرلەردىڭ جازعى دەمالىس ماۋسىمىنا دايىندىعىن كورۋ ءۇشىن وبلىستىق ءبىلىم بەرۋ باسقارماسىنىڭ ماماندارى 14 لاگەردىڭ بارلىعىندا بولىپ, ولاردىڭ جۇمىسىن كوزىمەن كورىپ كەلدى. لاگەرلەردىڭ بارلىعىندا جوندەۋ, توڭىرەكتى سانيتارلىق تازالاۋ جۇمىستارى ءجۇرىپ جاتىر.تەك اۋىز سۋ ماسەلەسى عانا جارىم-جارتىلاي شەشىمىن تاپپاي تۇر. ون ءتورت لاگەردىڭ بەسەۋىندە اۋىز سۋ تاسىپ جەتكىزىلەتىن بولادى», دەدى وبلىستىق ءبىلىم بەرۋ باسقارماسىنىڭ باسشىسى ءباتيما داۋىموۆا.
جاز ماۋسىمىندا وسى 14 لاگەردە 11 000 بالا تابيعات اياسىندا دەمالاتىن بولادى. التىنسارين اۋدانىنداعى «مەرەي» جانە ارقالىق قالاسىنا قاراستى «سترويتەل» بالالار جەكە مەنشىك دەمالىس لاگەرلەرى جوعارى دارەجەدە جابدىقتالعان. «مەرەي» ءبىر اۋىسىمدا 650 بالا قابىلداپ, جاز بويى 4500 بالانى ساۋىقتىرادى. لاگەردە تىنىس الۋ ورگاندارى اۋىراتىن بالالاردىڭ ەم قابىلداۋىنا بارلىق جاعداي جاسالعان.
باتيما داۋىموۆانىڭ ايتۋىنشا, سانيتارلىق-ەپيدەميولوگيالىق ستانسا مەن توتەنشە جاعدايلار دەپارتامەنتىنىڭ رۇقسات قاعازىنسىز بىردە ءبىر لاگەر جۇمىسىن باستامايدى. سونىمەن قاتار, وبلىستا كانيكۋل كەزىندە 113 دەمالىس الاڭى جانە 250 پالاتكالىق لاگەرى جۇمىس ىستەيدى. بالالار تەك دەمالىپ عانا قويماي, سپورتپەن شۇعىلدانادى, ءتىل ۇيرەنەدى, ەكولوگيالىق ءبىلىم الادى. وسىلاي بولسا دا, وبلىستا جىل سايىن بالالاردىڭ جازعى دەمالىسىن ۇيىمداستىرۋدا ايقىن وزگەرىستەر جوق. مەكتەپ وقۋشىلارىنىڭ تەك 10-11 پايىزى عانا تابيعات اياسىندا دەمالۋعا مۇمكىندىك الادى.
ءنازيرا جارىمبەتوۆا, «ەگەمەن قازاقستان»