*سولتۇستىك كورەيا كوسەمى كيم چەن ير كەشە ءوزىنىڭ بروندى پويىزىمەن بۋرياتياعا كەلدى. وندا ول رەسەي پرەزيدەنتى دميتري مەدۆەدەۆپەن كەزدەسىپ, كەلىسسوز جۇرگىزبەكشى. كەلىسسوزدىڭ نەگىزگى تاقىرىبى ەكى ەلدىڭ ەنەرگەتيكا سالاسىنداعى ىنتىماقتاستىعى بولماق.
*يراك اۋماعىنداعى اۋە جانە جەر وپەراتسيالارى ناتيجەسىندە تۇرىك اسكەريلەرى التى كۇننىڭ ىشىندە شامامەن 100 شاقتى كۇرد جاساقتارىنىڭ كوزىن جويدى. 80 شاقتى جاساق ءتۇرلى دەڭگەيدە دەنە جاراقاتتارىن العان.
*بۇعان دەيىن كوتەرىلىسشىلەردىڭ ليۆيا استاناسى – تريپولي قالاسىن ءوز باعىنىسىنا العانى تۋرالى اقپارات تاراعان ەدى. ەندى بۇعان كۇمان تۋىپ وتىر. ويتكەنى, تۇتقىنعا الىندى دەلىنگەن ليۆيا باسشىسىنىڭ بالاسى سەيف ءال-يسلام كەشە شەتەلدىك اگەنتتىكتەردىڭ جۋرناليستەرىمەن كەزدەسىپ, ولاردى قالانى ارالاۋعا شاقىرعان. سەيف ءال-يسلامنىڭ سوزىنە قاراعاندا, تريپولي ءالى دە وزدەرىنىڭ باقىلاۋىندا. بىراق كاددافيدىڭ قالادا بار-جوعى بەلگىسىز.
*ۆارشاۆانىڭ اسكەري پروكۋراتۋراسى پولشانىڭ بۇرىنعى پرەزيدەنتى لەح كاچينسكيدىڭ تۋ-154 ۇشاعىن ۇشۋعا دايىنداعان ەكى پولياك وفيتسەرىن كىنالى دەپ تاۋىپ وتىر. ايىپ تاعىلعانداردىڭ اتى-جوندەرى ازىرشە ايتىلمايدى. ل.كاچينسكي مىنگەن اتالعان ۇشاقتىڭ بىلتىر رەسەي اۋماعىندا اپاتقا ۇشىراپ, ونىڭ بورتىنداعى 96 ادامنىڭ بارلىعى قازا تاپقانى بەلگىلى.
*حالىقارالىق ۆاليۋتا قورىنىڭ بۇرىنعى باسشىسى دومينيك ستروسس-كانعا ايەل زورلاماق بولدى دەگەن ايىپ تاعىلعانى ءمالىم. بىراق كىنا ءدالەلدەنبەدى. سوندىقتان پروكۋراتۋرا ودان ايىپتاۋدى الىپ تاستاۋمەن كەلىستى. فرانتسيا پرەزيدەنتتىگىنەن ءۇمىتكەردىڭ ساياسات ويىنىنىڭ قۇربانى بولعانى انىق.
*سوت بورتىندا امەريكالىقتار بار ياحتانى باسىپ الۋعا قاتىسقان ەكى سوماليلىق پيراتتى ءومىر باقي تۇرمەدە وتىرۋعا كەستى. 30 جاستاعى ءالي ءابدي موحامەد پەن 31 جاستاعى بۋرحان ءابدىراحمان يۋسۋفكە ۇكىمدى اقش-تىڭ ۆيردجينيا سوتى شىعاردى.
*گەرمانيالىق ەكى تۋريست اۋعانستاننىڭ سولتۇستىگىندەگى تاۋلاردا جوعالىپ كەتكەن. پوليتسيا نەمىس ەلشىلىگىمەن بىرلەسىپ, تۋريستەردىڭ ءىز-ءتۇزسىز جوعالۋىن تەكسەرۋدە. ەكى نەمىس ازاماتى اۋعانستانداعى تاۋ شىڭدارىنىڭ ءبىرىن باعىندىرۋعا اتتانسا كەرەك.
*يراندا ەكى امەريكالىق 8 جىلعا باس بوستاندىقتارىنان ايىرىلدى. شەين باۋەر مەن دجوش فەتتال ەلگە زاڭسىز ەنگەنى ءۇشىن ءۇش جىلدان السا, شپيوندىق ارەكەتتەرى ءۇشىن ارقايسىسىنا بەس جىلدان بەرىلدى. ولار بەلگىلەنبەگەن يراك پەن يران شەكاراسىندا 2009 جىلدىڭ جازىندا تۇتقىندالعان ەدى. ۇكىم ەندى شىعارىلىپ وتىر.
*اۆستراليا پوليتسياسى بۇرىنعى مەديتسينا قىزمەتكەرلەرى كاسىپوداعىنىڭ باسشىسى كرەيگ تومسونعا قاتىستى تەرگەۋ ءىسىن باستادى. ول بۇگىندە اۆستراليا پارلامەنتىنىڭ دەپۋتاتى بولىپ تابىلادى. ك.تومسون كاسىپوداق باسقارىپ جۇرگەن كەزىندە ۇيىمنىڭ اقشاسىن جەزوكشەلەرگە جۇمساسا كەرەك.
*اقش-تىڭ فلوريدا شتاتىنداعى سەمينول قالاسىنىڭ تۇرعىنى دجەسسيكي ماري بيرس اسىراۋىنداعى بەس جاسار ۇل بالانى ساتۋعا ارەكەت جاسادى دەگەن كۇدىكپەن تۇتقىنعا الىندى.
اقپارات اگەنتتىكتەرى ماتەريالدارىنىڭ نەگىزىندە ازىرلەندى.