بۇعان دەيىن حابارلاعانىمىزداي, وتكەن دۇيسەنبى, سەيسەنبى كۇندەرى پارلامەنت ءماجىلىسىنىڭ توراعاسى ورال مۇحامەدجانوۆ جۇمىس بابىنداعى ساپارمەن اقمولا وبلىسىندا بولدى. ءماجىلىس سپيكەرى ەلباسى ن.ءا.نازارباەۆتىڭ حالقىمىزعا ارناعان جولداۋىنان تۋىندايتىن مىندەتتەردىڭ ورىندالۋ بارىسىمەن تانىسۋ ماقساتىندا شورتاندى, بۇلاندى جانە زەرەندى اۋداندارىن ارالاپ, بىرقاتار الەۋمەتتىك-ەكونوميكالىق ماڭىزى بار نىسانداردا بولىپ, ەڭبەك ۇجىمدارىمەن جۇزدەستى. ءماجىلىس توراعاسىنىڭ ساپارى بارىسىندا اقمولا وبلىسىنىڭ اكىمى سەرگەي دياچەنكو بىرگە بولدى.
ورال بايعونىس ۇلى الدىمەن شورتاندىداعى ا.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنا اتباسىن تىرەدى. سولتۇستىك ءوڭىردىڭ باستى عىلىمي ورتالىعى اۋىل شارۋاشىلىعى ءوندىرىسىن دامىتۋ بارىسىندا ىرگەلى جەتىستىكتەرگە قول جەتكىزۋدە. ورتالىق ديرەكتورى جەكسەنباي قاسقارباەۆ ەگىنشىلىك مادەنيەتىن كوتەرۋدەگى وزىق تەحنولوگيانى ەنگىزۋ قادامدارى, ءونىمدىلىگى جوعارى جاڭا تۇقىمداردى سىناقتان وتكىزىپ, قولدانۋ بارىسى, اۋىل شارۋاشىلىعى ماماندارى مەن شارۋا قوجالىقتارىنىڭ وكىلدەرىنىڭ بىلىكتىلىگىن ارتتىرۋ جۇمىستارى تۋرالى كەڭىنەن اڭگىمەلەدى. ءماجىلىس توراعاسى وسىنداعى مۇراجاي جادىگەرلەرىمەن تانىسىپ, قۇرمەتتى قوناقتار كىتابىنا قولتاڭبا قالدىردى.
«باي-ازات» جشس – اۋدانداعى ءوندىرىسى ورگە دومالاپ تۇرعان شارۋاشىلىقتاردىڭ ءبىرى. مۇندا 2010 جىلى 259,1 ميلليون تەڭگەنىڭ ءونىمى شىعارىلسا, بيىلعى التى ايدا 143 ميلليون تەڭگەنىڭ ءونىمى ءوندىرىلىپ, وبلىس پەن استانا تۇتىنۋشىلارىنا جونەلتىلدى. ءماجىلىس توراعاسى سەرىكتەستىكتەگى 49 ادامنىڭ ايلىق جالاقىسى 45-50 مىڭ تەڭگەنى قۇرايتىنى بولاشاق قادامداردىڭ وڭ ىرعاعىن قامتاماسىز ەتەتىندىگىمەن بايلانىستىردى.
ورال مۇحامەدجانوۆ شورتاندى كەنتىندەگى قازاقستان پرەزيدەنتىنىڭ «100 مەكتەپ, 100 اۋرۋحانا» باعدارلاماسىمەن سالىنعان 1200 ورىندىق مەكتەپ جۇمىسىنا ايرىقشا ىقىلاس قويدى. مەملەكەت قامقورلىعىنا جاۋاپ رەتىندە مەكتەپ تۇلەكتەرى بيىلعى ءبىرىڭعاي ۇلتتىق تەستىلەۋدى 80 باللدىق كورسەتكىشپەن اياقتاعان. قۇرمەتتى مەيمان بالالارمەن ەمەن-جارقىن اڭگىمەلەسىپ, ولارعا ءوزىنىڭ كىتاپتارىن سىيلادى.
تابيعاتى تامىلجىعان بۇلاندى اۋدانى بىتىك ەگىن ءوسىرىپ, مال شارۋاشىلىعىن جاڭا تەحنولوگيامەن دامىتۋدا جەمىستى جولدا كەلەدى. ورال بايعونىس ۇلى بىلىكتى مامان نوريك ۆاردانيان باسقاراتىن «فيرما نانار» جشس-ىندە بولىپ, ءوندىرىستى ءارتاراپتاندىرۋ باعىتىنا وڭ باعاسىن بەردى. فيرما وسىدان ءتورت جىل بۇرىن كورشىلەس «نوۆوبراتسكي» اسىل تۇقىمدى شارۋاشىلىعىنان 86 اق باس تۇقىمدى ءىرى قارا ساتىپ العان ەدى. قازىر ونىڭ سانى 250-گە جەتىپ, انالىق مال 185 باسقا جەتىپتى. جەمشوپتىڭ 1,5 جىلدىق قورىن دايىنداعان شارۋاشىلىق ەت ءوندىرۋدە وزاتتار قاتارىنان كورىنۋگە سەنىمدى. اۋدان باسشىلىعىنىڭ كومەگىمەن «ناناردىڭ» شابىندىعى مەن جايىلىمىنىڭ كولەمى 1700 گەكتارعا ارتتىرىلىپتى. سونداي-اق, جىل سايىن وندىرىسكە 23-25 ميلليون تەڭگە ينۆەستيتسيا قۇياتىن سەرىكتەستىك 14 000 گەكتارعا بيداي, 500 گەكتارعا ارپا, 400 گەكتارعا قاراقۇمىق جانە 100 گەكتارعا سۇرلەمدىك جۇگەرى ءوسىرىپ وتىر. اۋىل ىرگەسىندەگى №67 القاپتىڭ بەلۋاردان كەلەتىن ەگىن ماساقتارىن سالماقتاپ كورگەن سپيكەر ديقاندار ءجۇزىنىڭ نۇرلانا تۇسۋىنە تىلەكتەستىك ءبىلدىردى.
كەزىندە ايگىلى سەگىز قىرلى ساڭلاق بالۋان شولاق ءدۇبىرلەتكەن ءوڭىر الەۋمەتتىك دامۋدا دا الدا كەلەدى. بىلتىرعى جەلتوقسان ايىندا ءزاۋلىم «بالدىرعان» بالاباقشاسى پايدالانۋعا بەرىلسە, بۇگىن پارلامەنت ءماجىلىسىنىڭ ءتوراعاسى ورال مۇحامەدجانوۆ پەن وبلىس اكىمى سەرگەي دياچەنكو پرەزيدەنتتىك «بالاپان» باعدارلاماسىمەن سالىنعان 140 ورىندىق قوس قاباتتى «بالداۋرەن» بالاباقشاسىن اشتى. سالتاناتتا قۇتتىقتاۋ ءسوز سويلەگەن ءماجىلىس سپيكەرى قازىرگى كەزدە ەلىمىزدىڭ تۇكپىر-تۇكپىرىندە وسىنداي بالالار باقشاسى, ەمدەۋ ورىندارى, مادەني-تۇرمىستىق مەكەمەلەر كوپتەپ اشىلىپ جاتىر. مۇنى ەلباسىنىڭ ەلگە قامقورلىعى رەتىندە باعالايمىز. بۇگىن مۇنداي نىساندار ۇلكەن قاجەتتىلىككە اينالدى. بۇلاندى اۋدانىندا مەكتەپ جاسىنا دەيىنگى مەكەمەگە سۇرانىستىڭ 90 پايىزى قامتاماسىز ەتىلگەنى زور جەتىستىك. ەل قۋانىشى كوبەيگەنى مەملەكەتىمىزدىڭ قۋاتتانعانىنىڭ, مەرەيىمىزدىڭ وسكەنىنىڭ ايعاعى, دەگەن ورال بايعونىس ۇلى بارلىق قولايلىلىقتار قاراستىرىلعان بالالار باقشاسىن ارالاپ, سابيلەر بايعازىسىنا ۇلكەن تەلەديدار بايلادى.
جينالعان قاۋىم اۋدان اكىمى ەرمەك نۇعىمانوۆقا, قۇرىلىس ءىسىن قىسقا مەرزىمدە ءارى ساپالى اياقتاعان «اقمولا ترانس سەرۆيس-3» جشس ديرەكتورى مارات بەيسەنوۆكە, بۇلاندى اۋدانىنىڭ قۇرمەتتى ازاماتى بيگەلدى عابدۋللينگە العىس ايتىپ, الداعى جۇمىستارىنا تابىس تىلەدى. ماقتاسا, ماقتايتىنداي بار. «ءبالداۋرەننىڭ» جاتىن بولمەلەرى, دەمالىس جانە ويىن بولمەلەرى, ءدارىگەرلىك بولمەسى, اسحانا, مۋزىكا جانە سپورت زالدارى كوز تارتادى. بالاباقشا بۇلدىرشىندەرگە قازاق تىلىندە ءتالىم-تاربيە بەرەتىن بولادى. قازىر مۇندا 47 ادام جۇمىس ىستەسە, ونىڭ 19-ى پەداگوگ ماماندار ەكەن. جينالعان قاۋىم زامزاگۇل ماقشانايقىزى مەن باقىتگۇل قوجابەرگەنوۆانىڭ ءبۇلدىرشىن شاكىرتتەرىنىڭ كونتسەرتىنە قوشەمەتپەن قول سوقتى.
بۇدان كەيىن مارتەبەلى مەيمان زەرەندى اۋدانىندا سالىنىپ جاتقان دەنە شىنىقتىرۋ-ساۋىقتىرۋ كەشەنىنىڭ قۇرىلىسىندا بولىپ, وسىنداعى پارتيالىق باقىلاۋ بەكەتىنىڭ قىزمەتىمەن تانىستى.
ءماجىلىس توراعاسىنىڭ ەكىنشى كۇنگى جۇمىسى دا قاۋىرت ءارى كەڭ اۋقىمدى بولدى. ول ۇدەمەلى يندۋستريالىق-يننوۆاتسيالىق جوبامەن جۇمىس ىستەيتىن «اگريمەر استىق» جشس ۇن تارتۋ كەشەنىنىڭ, «كوكشەتاۋ مينەرالدى سۋلارى» جشس-ءنىڭ جاڭا جەلىلەرىنىڭ, «ەنكي» جشس-ءنىڭ كەراميكالىق كىرپىش شىعارۋ تەحنولوگياسىمەن تانىستى.
پارلامەنت ءماجىلىسىنىڭ ءتوراعاسى, «نۇر وتان» حدپ دەپۋتاتتىق فراكتسياسىنىڭ جەتەكشىسى ورال مۇحامەدجانوۆ پارتيانىڭ وبلىستىق فيليالىندا تۇرعىنداردى قابىلداپ, وبلىس اكتيۆىنىڭ جينالىسىندا ءسوز سويلەدى.
باقبەرگەن امالبەك, اقمولا وبلىسى.
سۋرەتتە: «فيرما نانار» جشس-ءنىڭ ەگىستىك القابىندا.