جاقىندا ەلورداداعى پرەزيدەنتتىك مادەنيەت ورتالىعىندا مۇمكىندىگى شەكتەۋلى جاس تالانتتاردىڭ «مەنىڭ الەمىم» اتتى سۋرەت كورمەسى اشىلدى. وعان قولداۋ كورسەتكەن «بيىك سامعاۋ» قوعامدىق قورى, مادەنيەت مينيسترلىگى جانە پرەزيدەنتتىك مادەنيەت ورتالىعى.
مۇمكىندىگى شەكتەۋلى بالالار – ءومىردىڭ قاتال سىناعىنا ۇشىراعان جاندار. سوندىقتان ولار قوعامنىڭ وزدەرىنە دەگەن ايرىقشا نازارىنا قاشاندا ءزارۋ. ونى ءتۇسىنىپ ءتۇيسىنۋ ارقايسىمىزدىڭ بورىشىمىز بولسا كەرەك. ءيا, ءبىزدىڭ مەملەكەتىمىزدە مۇنداي بالالارعا جان-جاقتى قولداۋ كورسەتۋ ءىسى جاقسى جولعا قويىلعان. وسى ورايدا ەلباسىمىزدىڭ: «ولاردىڭ بولاشاق قامىن ويلاپ, جۇمىلا جاردەم بەرۋ – بارشامىزدىڭ پارىزىمىز», – دەگەن ءسوزى ويعا ورالادى.
مۇمكىندىگى شەكتەۋلى بالالار الەمدى, قورشاعان ورتانى وزدەرىنشە ءتۇسىنىپ, ءبىز كوڭىل بولە بەرمەيتىن ەلەۋسىز وقيعالاردان, قۇبىلىستاردان ءبىر ەرەكشەلىك بايقاپ, جانىنا ءتۇيىپ جۇرەدى. بۇل – ولاردىڭ جان-ءدۇنيەسىنىڭ اركەز سەرگەك جۇرەتىنىن بىلدىرسە كەرەك.
جاس تالانت سۋرەتشىلەردىڭ ىشكى جان-دۇنيەسى مەن جۇرەك بۇلقىنىستارىن وزدەرى سالعان دۇنيەلەردەن زەر سالا قاراساڭ, ايقىن اڭعارۋعا بولادى. تامىرشىداي تاپ باسىپ وي ءيىرىمىن اق قاعازعا تۇسىرگەندە, كوز الدىنا الۋان ءتۇرلى قۇبىلىستاردى اكەلەدى. وسى ارقىلى ولاردى مەملەكەتتىڭ تولىققاندى ازاماتى رەتىندە تانۋعا بولادى. ءتىپتى ءوزدەرىن ءبىر الەم دەسەك جاراساتىنداي.
بۇل كورمەگە بالالاردىڭ 25 تۋىندىسى قويىلعان ەكەن. جاعالاي قاراپ شىققاندا مىنا جالعاننىڭ بۇكىل بولمىسى وسى سۋرەتتەرگە سىيىپ كەتكەندەي اسەر الاسىڭ. ءاسىرەسە بولىس جانارىس, بيبىگۇل نۇرماعامبەت, ۆيكتور رامپەل, الەكساندرا مازۋرەنكو, داليا سۋروۆا, ۆيكتور كيل, ەليزاۆەتا دانيلوۆا, ءلاززات سۇلتانوۆا, ارلان امانگەلدينوۆ, انجەليكا شاپەدكو سىندى اۆتورلاردىڭ جۇمىستارى كوز جاۋىن الادى.
كورمەنىڭ اشىلۋىنا ءتيىستى لاۋازىم يەلەرى, ەلشىلىك وكىلدەرى, شەتەلدىك قوناقتار قاتىسىپ, جاس قىلقالام شەبەرلەرىنىڭ ءتاي-ءتاي باسقان تىڭ تۋىندىلارىنا ءتانتى بولعاندارىن, ولاردىڭ بولاشاعىنان زور ءۇمىت كۇتۋ قاجەتتىگىن ەسكە سالىپ, ۇيىمداستىرۋشىلاردىڭ ازاماتتىعىنا العىستارىن ءبىلدىردى. بۇل كورمە وسى ايدىڭ سوڭىنا دەيىن جۇرتشىلىققا ۇسىنىلاتىنىن ايتا كەتسەك دەيمىز.
سۇلەيمەن مامەت.