بۇعان دەيىن قازاقستاندىق تەننيسشى گالينا ۆوسكوبوەۆانىڭ تورونتودا اياقتالعان كانادانىڭ اشىق بىرىنشىلىگىندە شيرەك فينالعا جەتكەنىن حابارلاعان بولاتىنبىز. وكىنىشكە قاراي, جارتىلاي فينالعا جولداما بەرەتىن كەزدەسۋدە ول بەلورۋسسيالىق تەننيسشى, الەمنىڭ ءتورتىنشى راكەتكاسى ۆيكتوريا ازارەنكادان ۇتىلىپ قالدى. دەي تۇرعانمەن, گ.ۆوسكوبوەۆا ءۇشىن وسىنىڭ ءوزى ايتارلىقتاي تابىستى تۋرنير بولعانىن ايتا كەتۋ كەرەك. ءسويتىپ, ول الەمدىك رەيتينگتەگى 146-شى ورىننان 100-دىككە كوتەرىلدى.
جارتىلاي فينالداعى كەزدەسۋلەر تومەندەگىشە اياقتالدى. جاراقاتىنا بايلانىستى ءبىر جىلدىق ۇزىلىستەن سوڭ كورتقا شىققان امەريكالىق سەرەنا ۋيليامس ۆيكتوريا ازارەنكانى ەكى سەتتە وڭاي جەڭدى. اۆستراليالىق سامانتا ستوسۋر پولشالىق تەننيسشى اگنەشكا رادۆانسكادان باسىم ءتۇستى. ال فينالدا س.ستوسۋر س.ۋيليامسقا ءجوندى قارسىلىق كورسەتە الماي, ەكى سەتتە (6:4, 6:2) جەڭىلىس تاپتى.
ءسويتىپ, سىياقى قورى 2 ميلليون دوللاردان اساتىن كانادانىڭ اشىق چەمپيوناتىندا جەڭىمپاز س.ۋيليامس 360 مىڭ دوللارعا يە بولدى. فينالعا شىققان س.ستوسۋر وسىنىڭ جارتىسىنداي اقشاعا قول جەتكىزدى. جارتىلاي فيناليستەر – ا.رادۆانسكا مەن ۆ.ازارەنكانىڭ تابىسى 85 مىڭ دوللاردان اينالدى. شيرەك فينالعا شىققانداردىڭ دا سىياقىسى ايتارلىقتاي قوماقتى. ماسەلەن, گ.ۆوسكوبوەۆا 42,5 مىڭ دوللار الىپ قايتتى.
«ەگەمەن-اقپارات».