«دالا قىرانى» حالىقارالىق وقۋ-جاتتىعۋلارى مارەگە جەتۋگە جاقىن. وسىمەن توعىزىنشى رەت وتكىزىلىپ وتىرعان بۇل جاتتىعۋلارعا قازاقستان, ۇلىبريتانيا, اقش, ليتۆا جانە قىرعىز رەسپۋبليكاسى قارۋلى كۇشتەرىنىڭ اسكەري قىزمەتشىلەرى قاتىسىپ جاتىر.
14 تامىزدان باستاپ كوپ ۇلتتى كۇشتەردىڭ اسكەري كونتينگەنتى شارتتى قاقتىعىس ايماعىندا بىتىمگەرشىلىك وپەراتسيالارىن تاجىريبە ءتۇرىندە پىسىقتاۋ ۇستىندە.
بىتىمگەرشىلىك كۇشتەرى جەكسەنبى كۇنى ەرتەمەن بەلگىلەنگەن اۋماققا جەتىپ, وزدەرىنە جۇكتەلگەن تاپسىرمالاردى ورىنداۋعا كىرىستى. ولار ەكى كۇن بويى جاعدايدى تۇراقتاندىرىپ قانا قويماي, گۋمانيتارلىق وپەراتسيالاردى دا جۇرگىزۋدە. جاۋاپتى اۋماقتاعى ءىس-قيمىلداردى باقىلاۋعا الىپ, بەكەتتەردە, جىلجىمالى پاترۋلدە كەزەكشىلىك جۇرگىزىپ, بوسقىنداردىڭ كوشى-قونىن باقىلايدى.
اسكەري قىزمەتشىلەر جارىلعىش زاتتاردى زالالسىزداندىرىپ, زاڭسىز قارۋلانعان باندى قۇرامىنىڭ كوزىن جويدى.
جاتتىعۋلاردىڭ باستى تاپسىرمالارىنىڭ ءبىرى – بولىمشەلەردىڭ شوعىرلانۋى جانە ءىس-قيمىلداردىڭ ايقىندىعى, سۋ كەدەرگىلەرىنەن ءوتۋ, ءار ءتۇرلى جۇكتەردى الىپ ءجۇرۋ, ەڭ باستىسى, قاۋىپسىزدىكتى قامتاماسىز ەتۋ بويىنشا وپەراتسيالار جۇرگىزۋ. وسى قيمىلداردىڭ ءبارى بۇگىن, 16 تامىزدا قايىرا پىسىقتالاتىن بولادى.
اسكەري باقىلاۋشىلار مەن شەت مەملەكەتتەردەن كەلگەن ساراپشىلار قازاقستاندىق جاۋىنگەرلەر وزدەرىنىڭ بىلىكتىكتەرىمەن جانە ءتارتىبىمەن ەرەكشەلەنەتىنىن ايتۋدا.
بۇل جاتتىعۋلار بەيبىتشىلىكتى قولداۋ وپەراتسيالارىنداعى «قازبريگتىڭ» جەدەل قيمىل جاساۋداعى جەتىستىگى مەن قازاقستاندىق بىتىمگەرلىك بولىمشەنىڭ كوپ ۇلتتى قۇرامدا تاپسىرمالاردى ورىنداۋ قابىلەتىن تەكسەرۋ بولىپ تابىلادى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ قىزمەتكەرى.
––––––––––––––––
سۋرەتتى تۇسىرگەن ەرمەك سارباسوۆ.