بريتانيا پرەمەرى دەۆيد كەمەرون پارلامەنتتە ءسوز سويلەپ, بۇكىل ەلدى قامتىعان كوشەدەگى تارتىپسىزدىكتەرگە قارسى كۇرەستىڭ جوسپارىن ۇسىندى.
لوندون ءتارتىپ ساقشىلارىنا سۋاتقىشتاردى, رەزەڭكە وق پەن كوز جاساۋراتقىش گازدى بەلسەندى پايدالانۋعا رۇقسات ەتە وتىرىپ, بۇزاقى جاستاردى اۋىزدىقتاۋ ءۇشىن پوليتسيانىڭ قۇزىرىن كۇشەيتپەك نيەتتە. 2012 جىلى لوندوندا وتەتىن وليمپيادا قارساڭىندا ءبىز بۇزاقىلاردىڭ بريتان ۇلتىنىڭ دا, ءبىزدىڭ جاستارىمىزدىڭ دا وكىلدەرى ەمەس ەكەندىگىن بۇكىل الەمگە دالەلدەۋىمىز كەرەك, دەپ مالىمدەدى ول.
اپپارات سىناقتان وتپەي قالدى
اقش-تا الەمدەگى ەڭ جىلدام ۇشاتىن Falcon HTV-2 ۇشۋ اپپاراتىن سىناۋ وسىمەن ەكىنشى رەت ءساتسىز اياقتالدى.
جاقىندا كاليفورنياداعى امەريكالىق «ۆاندەنبەرگ» اسكەري-اۋە بازاسىنان ارنايى زىمىران تاسىعىشتىڭ كومەگىمەن ۇشىرىلعان اپپارات تىنىق مۇحيتقا قۇلادى, دەلىنگەن وسى اپپاراتتى جاساۋمەن اينالىسقان قورعانىس مينيسترلىگىنىڭ پەرسپەكتيۆالى زەرتتەۋ باعدارلامالارى باسقارماسىنىڭ حابارىندا. ۇزىندىعى 3,7 مەتردى قۇرايتىن, ساعاتىنا 21 مىڭ شاقىرىم شاپشاڭدىقپەن ۇشاتىن اتالمىش ۇشاق پەنتاگوننىڭ نيەتىنشە يادرولىق بومبانى پلانەتانىڭ كەز كەلگەن نۇكتەسىنە ءبىر ساعاتقا جەتپەيتىن ۋاقىتتا جەتكىزۋگە ءتيىس بولاتىن.
ليۆيا ەلشىلىگىنە شابۋىل
شۆەتسيانىڭ پوليتسياسى ستوكگولمدەگى ليۆيا ەلشىلىگىن شابۋىل جاساي وتىرىپ, باسىپ الدى.
جەتى ادام تۇتقىندالدى. وسىنىڭ الدىندا بەلگىسىز بىرەۋلەر ليۆيا وپپوزيتسياسىن قولدايتىن ۇرانداردى داۋىستاي وتىرىپ, عيماراتتى باسىپ العان بولاتىن. ولار ءوزدى-وزىمىزگە قول جۇمسايمىز نەمەسە ەلشىلىكتى ورتەپ جىبەرەمىز دەپ قورقىتتى. پوليتسيا العاشىندا ءتارتىپ بۇزۋشىلارمەن كەلىسسوز جۇرگىزگەن بولاتىن. بىراق قىلمىسكەرلەردىڭ ءبىرى تۇتانعىش سۇيىق قۇيىلعان شولمەكتى تەرەزەدەن لاقتىرعان ساتتە بىردەن شتۋرم باستالدى.
رۋمىن ازاماتتارىنا شەكتەۋ قويىلدى
ەۋروكوميسسيا يسپانيانىڭ وسى جىلدىڭ 1 تامىزىنان باستاپ 2012 جىلدىڭ 31 جەلتوقسانىنا دەيىن ەلدىڭ جۇمىس كۇشى رىنوگىنا رۋمىنيا ازاماتتارىنىڭ كەلۋىنە ۋاقىتشا شەكتەۋ قويۋ جونىندەگى شەشىمىن قۋاتتادى.
وندا اتالعان شەشىمنىڭ يسپانيادا قازىرگى كەزدە جۇمىس ىستەپ جۇرگەن رۋمىندارعا قاتىسى جوق ەكەندىگى, بىراق بولاشاقتا ونىڭ ەلدىڭ بۇكىل وڭىرلەرى بويىنشا كۇشىندە بولاتىنى اتاپ كورسەتىلگەن. وعان ەلدەگى ءىجو-ءنىڭ بۇرىن-سوندى بولماعان دارەجەدە قۇلدىراۋى جانە جۇمىسسىزدىق دەڭگەيى سەبەپكەر بولعان. دەگەنمەن, يسپاندىق ساراپشى-رەكرۋتشىلار ەلدىڭ جۇمىس كۇشى رىنوگىن بۇدان بىلاي قىتاي, بولگاريا جانە مولدوۆا سياقتى ەلدەردەن كەلگەن ەڭبەك رەسۋرستارى باسادى دەگەندى ايتىپ وتىر.
تيموشەنكونىڭ كىسى ولىمىنە قاتىسى بار ما؟
اقش پروكۋراتۋراسىندا قازىرگى كەزدە 2009 جىلى رەسەيمەن اراداعى گاز كەلىسىمىندە وكىلەتتىگىن اسىرا پايدالانعان ءۇشىن سوتتا ءىسى قارالىپ جاتقان ەكس-پرەمەر يۋليا تيموشەنكونىڭ اتىشۋلى كىسى ولىمىنە قاتىسى بولۋىنىڭ مۇمكىندىگى تۋرالى اقپارات بار.
بۇل جونىندە ۋكراينا باس پروكۋرورىنىڭ ءبىرىنشى ورىنباسارى رەنات كۋزمين حابارلاعان. اڭگىمە 1996 جىلى دونەتسك اۋەجايىندا ايەلىمەن اتىپ ولتىرىلگەن پارلامەنت دەپۋتاتى ەۆگەني ششەربان تۋرالى بولىپ وتىر. بۇل قىلمىس ءالى كۇنگە دەيىن اشىلعان جوق. ۋكراينانىڭ باس پروكۋراتۋراسى قازىرگى كۇنى قىلمىستارى ءۇشىن اقش-تا جازاسىن وتەپ جاتقان ەكس-پرەمەر پاۆەل لازارەنكونى وسى ىسكە تاپسىرىس بەرۋشى دەپ ايىپتايدى. ال تيموشەنكو بولسا 1990 جىلدارى لازارەنكومەن ىسكەرلىك جانە ساياسي قارىم-قاتىناستاردا بولعان.
ۇمىتكەرلەر سانى 54-كە جەتتى
قىرعىزستاندا 54 ۇمىتكەر ەلدىڭ جوعارى مەملەكەتتىك لاۋازىمى ءۇشىن رەسمي تۇردە ورتالىق سايلاۋ كوميسسياسىنا ءوز وتىنىشتەرىن بەرگەن.
بۇل تۋرالى جۇما كۇنى ريا نوۆوستي اگەنتتىگىنە قىرعىزستان ورتالىق سايلاۋ كوميسسياسىنىڭ وكىلى حابارلاعان كورىنەدى. ەلدەگى پرەزيدەنت سايلاۋى 30 قازانعا بەلگىلەنگەن. بۇل سايلاۋ قۇرمانبەك باكيەۆتى تاعىنان تايدىرعاننان كەيىنگى بيلىكتى زاڭداستىرۋ باعىتىنداعى كەزەكتى ساتى بولماق. قازىرگى ۋاقىتتا رەسپۋبليكانى باسقارىپ وتىرعان وتپەلى كەزەڭ پرەزيدەنتى روزا وتۋنباەۆانىڭ وكىلەتتىگى 31 جەلتوقساندا اياقتالادى. پرەزيدەنت لاۋازىمىنا كانديداتتار ۇسىنۋ 16 تامىزعا دەيىن جالعاسادى.
كەلىسىمگە قول قويىلارىنا ءۇمىتتى
كورەيا حالىق دەموكراتيالىق رەسپۋبليكاسى تاياۋ ۋاقىتتاردا جاڭادان يادرولىق سىناقتار وتكىزۋدى جوسپارلاپ وتىرعان جوق.
وڭتۇستىك كورەيانىڭ سىرتقى ىستەر ءمينيسترى كيم سون حۆاننىڭ مالىمدەۋىنشە, ەل ۇكىمەتى سولتۇستىك كورەيانىڭ يادرولىق تالداۋلار سالاسىنداعى قىزمەتىن مۇقيات قاداعالاپ وتىر. سول سەبەپتى كحدر-دىڭ ءۇشىنشى رەت يادرولىق سىناق وتكىزۋگە دايىندالىپ جاتقاندىعى تۋرالى اقپارات جوق. سولتۇستىك كورەيانىڭ يادرولىق قارۋدى تاراتپاۋ جونىندەگى كەلىسىمنەن شىعاتىنىن مالىمدەگەن جالعىز مەملەكەت ەكەنىن ايتا وتىرىپ, مينيستر كحدر-دىڭ يادرولىق سىناقتارعا تىيىم سالاتىن كەلىسىمگە تەز ارادا قول قوياتىنىنا سەنىم ءبىلدىردى.
سولشىل راديكالدىڭ ارەكەتى
پوليتسيا ەستونيا قورعانىس مينيسترلىگى عيماراتىندا قارۋدان وق اتقىلاعان ادامنىڭ ەسىمىن اتادى.
ول 57 جاستاعى ارمەنيالىق ازامات بولىپ شىقتى. ەستونيا پرەمەرى اندرۋس ءانسيپتىڭ ايتۋىنشا, ول ادام زاڭگەر بولىپ جۇمىس ىستەگەن جانە بىرلەسكەن سولشىل پارتيانىڭ مۇشەسى بولعان. وقيعا 11 تامىز كۇنى ورىن العان بولاتىن. ەر ادام قورعانىس مينيسترلىگىنە كىرىپ كەلىپ, وق اتا باستاعان جانە كۇزەتشىنى كەپىلدىككە العان. وقيعا بولعان جەرگە پوليتسيا كۇشتەرى تارتىلىپ, ارنايى ءبولىم قىزمەتكەرلەرى شابۋىل جاساماق بولعان كەزدە قىلمىسكەر ءوزىن-ءوزى اتىپ ولتىرگەن. زارداپ شەككەن ەشكىم جوق.
ينتەرنەت ماتەريالدارى نەگىزىندە ازىرلەندى.