ەلورداداعى «بايتەرەك» حالىقارالىق مەديا ورتالىعىندا قاسيەتتى رامازان ايىنا بايلانىستى باسپاسوز ءماسليحاتى ءوتتى. وعان «نۇر استانا» ورتالىق مەشىتىنىڭ يمامدارى, سونداي-اق باق وكىلدەرى قاتىستى.
كۇللى مۇسىلمان بالاسى اسىعا كۇتكەن رامازان ايىنا ساناۋلى كۇندەر قالدى. رامازان – ساعىنا كۇتىپ, قيماي قوشتاساتىن قۇران كارىمنىڭ اسىل اياتتارى تۇسە باستاعان قاسيەتتى اي. بۇل ايدا جاراتۋشىنىڭ راقىمىنان ءۇمىت ەتىپ, اۋىز بەكىتىپ, قۇلشىلىق جاساعان ادامنىڭ تىلەگى قابىل بولىپ, جاپىراقتارى توگىلگەن كۇزگى اعاشتاي كۇنالارىنان ارىلادى. ادام جانىنا سەرگەكتىك سىيلاپ, جۇرەگىن جىلىلىققا ءبولەيتىن بۇل كەزەڭ كىسىنى بارشا جاعىمسىز قىلىقتاردان: كىسىمسۋدەن, داڭدايسۋدان, ءتاكاپپارلىقتان الشاقتاتادى.
ورازا ايىنىڭ جاي-جاپسارىن بۇقارا حالىققا تانىستىرۋ ءۇشىن «نۇر استانا» ورتالىق مەشىتىنىڭ باس يمامى قاليجان زاڭقوەۆ, ورتالىق مەشىتتىڭ نايب يمامى ءتولەبي وسپان, سونداي-اق يمام اسحات ءسالىموۆ جۋرناليستەر تاراپىنان قويىلعان سۇراقتارعا جاۋاپ بەردى. بۇل رەتتە قاليجان زاڭقوەۆ: «تامىزدىڭ 1 جۇلدىزىنا ءسايكەس كەلىپ وتىرعان رامازان ايى مۇسىلماندىق اي كۇنتىزبەسى بويىنشا 29 كۇنگە سوزىلماق. تامىزدىڭ 26-نان 27-نە, ياعني جۇمادان سەنبىگە قاراعان ءتۇن – قاسيەتتى قادىر ءتۇنى. ال ورازا ايت نامازى 30 تامىز كۇنى استانادا تاڭعى جەتىدە وقىلادى. بۇل ۋاقىتتى قازاقستان مۇسىلماندارى ءدىني باسقارماسىنىڭ ءپاتۋا ءبولىمى ءازىرلەپ بەكىتكەن. الايدا, ايت نامازىنىڭ ۋاقىتى ءار قالادا ءار ءتۇرلى بولۋى مۇمكىن», – دەپ ەسكەرتتى.
استانا قالاسى بويىنشا ءسارەسى ۋاقىتى تاڭعى ساعات 03:00-دە بولسا وسى ۋاقىتقا ون مينۋت قالعاندا سارەسىنى ءىشىپ ءبىتۋ كەرەك. سونىمەن بىرگە ءار كۇننىڭ ورازاسى ءۇشىن نيەت ەتۋ قاجەتتىگىن دە اتاپ ءوتتى. ورازا نيەتى: «اللا ريزالىعى ءۇشىن تاڭنان كۇن باتقانعا دەيىن رامازان ايىنىڭ ورازاسىن ۇستاۋعا نيەت ەتتىم», – دەلىنەدى. العاشقى كۇنى اۋىزاشار ۋاقىتى استانا قالاسى بويىنشا 21:07-دە. ال «نۇر استانا» ورتالىق مەشىتىنىڭ نايب يمامى تولەبي وسپان بولسا, استانا ۋاقىتى بويىنشا بيىلعى جىلى 30 مىڭنان اسا رامازان ايىنىڭ ورازا ۇستاۋ مەن ناماز وقۋ كەستەسى شىعارىلعاندىعىن, ول كەستەلەردىڭ مەشىتتەرگە تەگىن تاراتىلعاندىعىن تىلگە تيەك ەتە كەلە, سوڭىندا مەشىتتىڭ اتاۋى جازىلعان كەستەنىڭ دۇرىستىعىن باسا ايتتى. سەبەبى, ورازا قارساڭىندا كوپتەگەن اقپارات كوزدەرىنەن الىنعان كەستەلەردىڭ ۋاقىتى جەرگىلىكتى ايماقتارعا سايكەس كەلمەيتىن كورىنەدى. ياعني, 10-15 مينۋتتىق ايىرماشىلىقتار بار كورىنەدى.
بيىلعى جىلعى رامازان ايىنداعى ءپىتىر ساداقا مولشەرى استانا قالاسى مەن اقمولا, قاراعاندى جەزقازعان, وسكەمەن, سەمەي, پاۆلودار, پەتروپاۆل, قوستاناي وبلىستارىندا 150 تەڭگە بولسا, الماتى قالاسى, وڭتۇستىك قازاقستان, جامبىل وبلىستارىندا 100 تەڭگە بولىپ بەكىتىلىپ وتىر. ايتا كەتكەنىمىز ءجون بولار, ءپىتىر ساداقاسى – ادام بولىپ جاراتىلعانىمىزعا شۇكىرشىلىك ەتۋ جانە مول ساۋاپقا كەنەلۋ ماقساتىندا بەرىلەدى. قاليجان زاڭقوەۆ قاسيەتتى قادىر تۇنىنە دە توقتالىپ ءوتتى. بۇگىندە قمدب بۇل ءتۇندى جۇيەلى تۇردە اتاپ ءوتۋدى جولعا قويعان ەكەن. انىقتاپ ايتقاندا, بۇل ءتۇنى مەشىتتەرگە مۇسىلماندار جينالىپ, مەشىت قىزمەتكەرلەرى ولارعا ۋاعىز-ناسيحات ايتۋ, جاماعات سۇراقتارىنا جاۋاپ بەرۋ, كوپشىلىكپەن ناماز وقۋ سياقتى عيباداتتار جاسالىپ جۇرگەن كورىنەدى. قمدب-نىڭ توراعاسى, باس ءمۇفتي ءابساتتار قاجى دەربىسالى حازرەت جۋىردا «جارىلقاۋشى ايدا جۇرتقا جەڭىلدىك جاسايىق» اتتى ءۇندەۋى جاريالاپ, رامازان ايىنىڭ قۇرمەتىنە ەل كاسىپكەرلەرى مەن ءتيىستى مەكەمەلەردى ازىق-ءتۇلىكتىڭ, قوناق ۇيلەر مەن قوعامدىق قىزمەتتەردىڭ باعاسىن 10 پايىزعا جەڭىلدەتۋگە شاقىرعانى ءوزىمىزگە بەلگىلى. وسىعان وراي, «نۇر استانا» ورتالىق مەشىتى استانا قالاسىنداعى ساۋدا ورتالىقتارى مەن ءتيىستى مەكەمە باسشىلارىمەن جولىعىپ, رامازان ايى قارساڭىندا ەل مۇسىلماندارىنا جەڭىلدىك جاساپ, ۇندەۋگە ءۇن قوسۋعا شاقىرۋدا ەكەن.
جۇلدىز ءبايدىلدا.