نورۆەگيا استاناسى – وسلا قالاسىنداعى پارلامەنت عيماراتى الدىنداعى جارىلىستان جەتى ادام قازا تاپتى. ارتىنشا وسى ەل استاناسىنان 40 شاقىرىم جەردەگى ۋتويا ارالىندا تەررورشى 86 ادامدى اتىپ ءولتىرىپ, تاعى 96-سىن جارالاعان.
اندەرس برەيۆيك ەكى قىلمىستى دا ءوزى جاساعاندىعىن مويىنداعانمەن, راقىمشىلىقتان ۇمىتتەنەدى, دەپ جازادى Guardian باسىلىمى. ول 1500 بەتتەن تۇراتىن «2083 جىلعى ەۋروپا تاۋەلسىزدىگىنىڭ دەكلاراتسياسى» مانيفەستىن جازعان كورىنەدى. فرانتسياداعى اكەسى يەنس برەيۆيك جۋرناليستەردەن كوز تاسالاپ, يسپانياعا كەتىپتى. ول ءوز ۇلىن 15 جىلدان بەرى كورمەگەندىگىن ايتادى. كەشە تەررورشىعا قاتىستى سوت باستالدى.
ۋگو چاۆەس قايتاتىن ەمەس
جاقىندا كۋبادا ەمدەلۋدەن وتكەن ۆەنەسۋەلا پرەزيدەنتى ۋگو چاۆەس 2012 جىلعى كەزەكتى پرەزيدەنتتىك سايلاۋعا تاعى تۇسەتىندىگىن مالىمدەدى. ول ءوزىنىڭ بۇل ويىن مەملەكەتتىك گازەتكە بەرگەن سۇحباتىندا ايتقان.
1998 جىلى پرەزيدەنت بولىپ سايلانعان 56 جاستاعى چاۆەس ءوزىنىڭ راك اۋرۋىن جەڭگەندىگىن حابارلادى. ونىڭ سوزىنە قاراعاندا, سوڭعى تەكسەرۋلەر ونىڭ دەنساۋلىعىنىڭ ءبىرشاما جاقسارعانىن كورسەتكەن. ەندى ۋگو چاۆەس ءوز كانديداتۋراسىن ءتورتىنشى مەرزىمگە ۇسىناتىن بولادى.
سيريادا كوپپارتيالىلىق زاڭى ازىرلەندى
سيريادا كوپپارتيالىلىق تۋرالى زاڭ جوباسى ازىرلەنىپ, تەك كونستيتۋتسيانى قادىرلەپ, دەموكراتيالىق قاعيداتتاردى ۇستاناتىن, ەلدىڭ زاڭدارىنا باعىناتىن پارتيالارعا عانا جۇمىس ىستەۋگە رۇقسات بەرمەك. بۇل ەلدە 1963 جىلدان بەرى قۇرىلعان «بااس» پارتياسىنان وزگە پارتيا بولماعان.
زاڭ ساياسي قۇرىلىمداردى دىندىك, ۇلتتىق, ايماقتىق نەمەسە كاسىبي تەگىنە قاراي قۇرۋعا مۇمكىندىك بەرمەيدى دەگەن نورمالارمەن قامتىلعان. كەز كەلگەن پارتيا ءوز جۇمىسىن اشىق جۇرگىزۋى ءتيىس جانە قارجىلىق كوزدەرى دە بەلگىلى بولۋى قاجەت. ال ازىرگە سيريا بيلىگى قارسىلىق كورسەتۋشىلەردى اسكەردىڭ كۇشىمەن باسۋدا, سونىمەن قاتار ساياسي رەفورمالار جاسايتىندىقتارىن دا ءجيى قايتالاپ كەلەدى.
جيىرمادان استام بويجەتكەن قۇتقارىلدى
مەكسيكا پوليتسياسى ەكى كۇندىك جەدەل وپەراتسيا بارىسىندا اقش-تىڭ تەحاس شتاتىمەن شەكارالاس جاتقان سيۋداد-حۋارەس قالاسىندا ادام ساۋداسىمەن اينالىسقان دەگەن مىڭداعان كۇدىكتىنى تۇتقىندادى. شاھار مەكسيكانىڭ قىلمىستىق استاناسى دەگەن اتاۋعا دا يە.
بيلىك وكىلدەرىنىڭ مالىمەتىنشە, پوليتسيانىڭ وسىنداي ارەكەتى ناتيجەسىندە 20 بويجەتكەن قىزدى قۇتقارىپ قالۋعا قول جەتكىزىلگەن. جوعالىپ كەتكەن ادامداردى ىزدەۋ ماقساتىندا قالا ورتالىعىنداعى ونداعان قوناق ۇيلەر مەن بارلار تەكسەرىلگەن. قۇقىق قورعاۋشىلار جاس ايەلدەردىڭ ءجيى جوعالىپ جاتقانى تۋرالى بۇدان بۇرىن دا تالاي دابىل قاققان بولاتىن.
پرەزيدەنتتىك سايلاۋ ەندى باستالدى
تامىزدىڭ بىرىنەن باستاپ رەسەيدە ميحايل پروحوروۆ باسشىلىق ەتەتىن «پراۆوە دەلو» پارتياسى جاپپاي جارناما جاساۋعا كىرىسەدى. «كوممەرسانت» گازەتىنىڭ جازۋىنشا, پروحوروۆ تۇرعىندار ءۇشىن ازىرگە بەلگىسىز تۇلعا رەتىندە قالىپ وتىر.
پارتيا باسشىلىعى قالا كوشەلەرىندە بيلبوردتار ورنالاستىرۋدى جوسپارلاپ وتىر. سونداي-اق جاڭادان قۇرىلعان ساياسي قۇرىلىم ءوز قاتارلارىنا جاڭا مۇشەلەردى قابىلدايتىن بولادى. وتكەن اپتادا «پراۆوە دەلو» اتىنان سايلاۋعا تەلەجۇرگىزۋشى الەكساندر ليۋبيموۆ پەن «ەسىرتكىسىز قالا» قورىنىڭ باسشىسى ەۆگەني رويزمان تۇسەتىندىكتەرىن مالىمدەدى.
لاتۆيا سەيمى تاراتىلاتىن بولدى
لاتۆيالىقتاردىڭ 95 پايىزى ەل پارلامەنتى – سەيمدى تاراتۋدى قولداپ داۋىس بەرگەن. ال ەل تۇرعىندارىنىڭ 5 پايىزى سەيمدى تاراتۋعا قارسى ەكەندىكتەرىن بىلدىرگەن. جالپى, رەفەرەندۋمعا سايلاۋ قۇقى بار ازاماتتاردىڭ 44 پايىزى قاتىسقان.
پارلامەنتتى تاراتۋ تۋرالى رەفەرەندۋم وتكىزۋ باستاماسىن مامىر ايىندا وسى ەلدىڭ سول كەزدەگى پرەزيدەنتى ۆالديس زاتلەرس كوتەرسە, ول بۇل ويىن دەپۋتاتتاردىڭ ەل مۇددەسىنەن گورى جەكە توپتار مەن ناقتى ءبىر ادامنىڭ قامىن جوعارى قوياتىندىعىمەن بايلانىستىرعان. كەيبىر بايقاۋشىلار مۇنداي قادامدى زاتلەرس الداعى پرەزيدەنتتىك سايلاۋدا جەڭۋ ءۇشىن جاسادى دەگەن جورامال ايتادى. الايدا, ول پرەزيدەنتتىك سايلاۋدا جەڭىلىس تاپقان بولاتىن.
تىڭشىنى تۇتقىندادى
ارمەنيا ۇلتتىق قاۋىپسىزدىك قىزمەتىنىڭ قىزمەتكەرلەرى ازەربايجان ارنايى قىزمەت ورىندارىمەن بايلانىسى بار دەگەن كۇدىكپەن 31 جاستاعى ەرەۆان تۇرعىنىن ۇستادى. اتالعان كۇدىكتىنى گرۋزيامەن شەكارالاساتىن اۋماقتا قولعا تۇسىرگەن.
ۇقك قىزمەتكەرلەرىنىڭ دەرەكتەرىنە قاراعاندا, تۇتقىندالعان كارەن مەگرابيان ۇزاق ۋاقىتتان بەرى تاۋلى قاراباقتىڭ اسكەري الەۋەتى تۋرالى اقپاراتتى جيناپ, ونى قارسى جاققا جونەلتىپ وتىرعان. ول سونداي-اق ەل ازاماتتارى مەن اسكەريلەرىن وسى مۇددەسى ءۇشىن پايدالانباق تا بولىپتى.
قىسقا قايىرىپ ايتقاندا:
*اقش-تا قۋىرشاق جاساۋشى Mattel كومپانياسىنىڭ نەگىزىن قالاۋشىلاردىڭ ءبىرى – ەلليوت حەندلەر قايتىس بولدى. اتالعان كومپانيا ءوزىنىڭ باربي قۋىرشاقتارىن جاساۋىمەن الەمگە ايگىلى. حەندلەر 95 جاسقا قاراعان شاعىندا دۇنيە سالدى.
*قىتايدىڭ حانچجوۋ قالاسىنان فۋچجوۋ قالاسىنا جول تارتقان D3115 جۇردەك پويىزىنا جاي ءتۇسىپ, ونى توقتاتىپ تاستاعان. سونىڭ سالدارىنان ارتىندا كەلە جاتقان پويىز الدىنعىسىنا سوقتىعىسقان. وقيعاعا بايلانىستى ءۇش لاۋازىم يەسى ورنىنان الىندى.
*ماروككو استاناسى رابات قالاسىندا بىرنەشە جۇزدەگەن ادام كوشەگە شىعىپ, جاقىندا ەنگىزىلگەن كونستيتۋتسيالىق رەفورمالاردى كوزبوياۋشىلىق دەي وتىرىپ, الەۋمەتتىك رەفورمالاردى قولعا الۋدى تالاپ ەتتى.
يەمەننىڭ ادەن قالاسىندا جانكەشتى جارىلعاش زات تولتىرىلعان اۆتوكولىكتى جارىپ جىبەرۋىنەن سەگىز اسكەري قازا تاۋىپ, تاعى 15-ءى جارالاندى. جارىلىس اسكەري لاگەردەن جاۋىنگەرلەر مىنگەن اسكەري كولوننا شىعا بەرگەندە جاسالعان.
*ۆيلنيۋستە ادولف گيتلەردىڭ تۋعان كۇنىن اتاپ ءوتۋ اكتسياسىنا قاتىسقان 10 ادام ۇستالدى. گيتلەردىڭ تۋعان كۇنى قارساڭىندا بەلگىسىز بىرەۋلەر كاسىپوداق ۇيىمى عيماراتىنا ءۇشىنشى رەيحتىڭ جالاۋىن ءىلىپ كەتكەن. ازىرگە ولار ءوز ايىپتارىن مويىنداماي وتىر.
ينتەرنەت ماتەريالدارى نەگىزىندە ازىرلەندى.