استانادا جاسوسپىرىمدەر اراسىنداعى الەم چەمپيوناتىنىڭ جالاۋى جەلبىرەدى.
سەنبى كۇنى «قازاقستان» سپورت سارايىندا جارىستىڭ اشىلۋ سالتاناتى ءوتىپ, الەمنىڭ 48 ەلىنەن كەلگەن بوزبالا بوكسشىلار العاشقى جەكپە-جەكتەرىن باستاپ كەتتى.
قازاقستان قۇراماسى العاشقى ەكى كۇندە ءتورت رەت جەڭىسكە جەتتى. وسى كۇندەرى الىپ سارايدىڭ ىشىندە كەرىلگەن شارشى الاڭعا ءتورت بوكسشىمىز شىعىپ, تورتەۋى دە قارسىلاستارىن تىزە بۇكتىردى. بۇل سىندا ءبىرىنشى بولىپ 57 كيلو سالماقتاعى ەربولات ەرمەكوۆ قولعاپ ءتۇيىستىردى. ول تاجىك شاۆكات راحيموۆتى ايقىن باسىمدىقپەن ۇتتى. ودان كەيىن كەلەسى كۇنى ەربولاتتىڭ جولىن ءارى قاراي ولجاس قالاۋبەك (46 كگ.), ايان قاليبەكوۆ (60 كگ.), بەكجان كىبىتقاليەۆ (54 كگ.) جالعاستىردى. ولجاس جاپون يۋكي ناكادجيمانا, ايان بەلارۋس ارتەم لياپكونى, ال بەكجان سيريالىق الشاۆا ابدۋلۆاحابدى وڭاي جەڭدى.
شۇكىر, قازىر ءبىزدىڭ بالالاردىڭ اياق الىسى جامان ەمەس. قۇرامانىڭ مەنەدجەرى, وليمپيادا چەمپيونى ەرماحان ىبىرايىموۆتىڭ ءوزىنىڭ جارىسقا دايىندىعىنا, جەڭىسكە دەگەن جىگەرلىگىنە ريزا ەكەنىن چەمپيونات كەزىندە بىرنەشە رەت بايقاپ قالدىق. چەمپيوناتتىڭ اشىلۋ سالتاناتىنان كەيىن اتاقتى بوكسشىنى جارىس تۋرالى اڭگىمەگە تارتىپ كورگەنبىز. سوندا ەرماحان ىبىرايىموۆ وسى الەمدىك باسەكەدە بالالارىمىزدىڭ بىرنەشە التىن جۇلدەنى الىپ بەرەتىنىنە سەندىرگەن. دەگەنمەن, بىزبەن يىق تەڭەستىرىپ باسەكەلەسەتىن كوماندالاردىڭ دا بار ەكەنىن جاسىرماعان. چەمپيوناتتىڭ العاشقى ايقاستارىنا قاراپ وتىرساق, شىنىمەن دە كۋبا بولماسا دا بىرنەشە ەلدىڭ التىن جۇلدەنى كوپتەپ ج ۇلىپ الاتىندارىن بايقاتقانىن كورۋگە بولادى. مىسالى, الا تاقيالى اعايىنداردىڭ ءوزى استانادان بوس قايتپايتىندارىن كەشەگى ايقاستاردا كورسەتىپ بەردى. سول سياقتى رەسەي, ۋكراينا, ازەربايجان بوكسشىلارى دا باس جۇلدەگە ءدامەلى ەكەندەرىن بايقاتىپ وتىر.
قازىر چەمپيوناتتىڭ ءۇش كۇنىندە توسىن وقيعالار بولماسا دا, بوكسشىلاردىڭ جەكپە-جەكتەرى قىزىقتى جانە تارتىستى ءوتۋدە. مىسالى, سەنبى كۇنى ازەربايجان مەن ارمەنيا بوكسشىلارى ءوزارا كەزدەسىپ, شارشى الاڭنىڭ شاڭىن ءبىراز قاقتى. وسى كۇنگى ەكى كورشىلەس ەلدىڭ اراسىنداعى جەكپە-جەك جانكۇيەرلەر ەڭ قىزىعا تاماشالاعان ايقاس بولعانى ءسوزسىز. بۇل ەكەۋىنىڭ كەزدەسۋى 48 كيلو سالماق دارەجەسىندە ءوتتى. ارمەنيا جاعىنان شارشى الاڭعا ەريك پەتروسيان, ال ازەربايجان قۇراماسىنان ماسۋد يۋسيفزادە قولعاپ ءتۇيىستىردى. وسى سىندا كاۆكاز ەلدەرىنىڭ جانكۇيەرلەرى تۋلارىن جالاۋلاتىپ, ءوز انا تىلدەرىندە ءبىر-بىرىمەن ايتىسىپ, تارتىسقانىنا دا كۋا بولدىق. ءبىراق جانكۇيەرلەر سول كەزدەسۋدە وزدەرىن ۇستاپ, قىزۋقاندى مىنەزدەرىن كورسەتكەنىمەن, جارىس قوجايىندارىنا قۇرمەت رەتىندە ءسوز تالاستىرۋدان ارىعا بارماي, تاراپ كەتتى. ال كەزدەسۋدىڭ ءوزى ارمەنيا بوكسشىسىنىڭ پايداسىنا شەشىلدى. ارميانداردىڭ ەريك پەتروسيان دەگەن بالاسى جەكپە-جەكتە ساۋاتتى قورعانا ءجۇرىپ, قارسىلاسىنا ءدال سوققىلار دارىتىپ, ۇپاي سانى بويىنشا جەڭىستى ج ۇلىپ اكەتتى. ەندى كەلەسى كەزەڭدە قوس ەلدىڭ بوكسشىلارى تاعى دا كەزدەسىپ جاتسا, ازەربايجاندار كەشەگى جىبەرگەن ەسەنى قايتارۋعا تىرىساتىنى ءسوزسىز. بۇل سىنعا ازەربايجان 17 بالاسىن قاتىستىرىپ وتىر. ال ارمەنيا ءبىزدىڭ ەل سياقتى 13 بوكسشىسىن اكەلدى.
قازىر جۇلدەلى ورىنداردى ادامنىڭ سانى ەمەس, ساپاسىمەن جەڭىپ الۋعا بولاتىنىن بارلىق جارىستاردان كورىپ ءجۇرمىز. بۇل جاعدايدى وتكەن الەم چەمپيوناتتارى دا كورسەتىپ بەرگەن. مىسالى, 2009 جىلى ەرەۆاندا ءجاسوسپىرىمدەر اراسىنداعى الەمدىك باسەكە العاش رەت حالىقارالىق بوكس قاۋىمداستىعىنىڭ اياسىندا وتكىزىلگەندە 47 ەلدەن كەلگەن 283 بوكسشىنىڭ ىشىندە ەۋروپا, ازيا قۇرامالارىنىڭ جۇلدەگە ابدەن لايىق بالالارىن كوپتەپ كەزدەستىرگەن ەدىك. سونىڭ ىشىندە ارمەنيا ءوز الاڭىندا تۇڭعىش رەت جالپى كوماندالىق ەسەپتە قولا جۇلدەگە يە بولعانىن بىلەمىز. ال باس جۇلدەنى رەسەي, كۇمىس جۇلدەنى كۋبا بوكسشىلارى قانجىعاسىنا بايلاپ كەتكەن بولاتىن. سول سىندا ءبىزدىڭ بوكسشىلار توعىزىنشى ورىن الىپ, جۇلدەسىز قايتقانى ەسىمىزدە.
جالپى, قازاقستان قۇراماسى الەم چەمپيوناتى وتكىزىلە باستاعان 2001 جىلدان بەرى 8 التىن, 8 كۇمىس جانە 18 قولا جۇلدە جيناپ ۇلگەرگەنىن ايتۋ كەرەك. ءبىز ءجۇلدەلەر سانى بويىنشا رەسەي مەن ۋكراينادان كەيىن ءۇشىنشى ورىندا كەلەمىز.
داستان كەنجالين.