...كوشپەلى عىلىمي كونفەرەنتسيا باستالدى
قوستاناي وبلىسىندا ەل ءتاۋەلسىزدىگىنىڭ 20 جىلدىعىنا ارنالعان كوشپەلى عىلىمي-پراكتيكالىق كونفەرەنتسيا باستالدى. ونى قوستاناي وڭىرلىك تاريحي زەرتتەۋ ينستيتۋتى مەن وبلىس اكىمدىگىنىڭ ىشكى ساياسات باسقارماسى ۇيىمداستىردى.
كونفەرەنتسيا الدىمەن دەنيسوۆ جانە قامىستى اۋداندارىندا باستالدى. وعان مەكتەپ مۇعالىمدەرى, اۋدانداعى مادەنيەت وشاقتارى مەن ارحيۆ قىزمەتكەرلەرى, وزدەرى تۇرعان ولكە تاريحى قىزىقتىراتىن تىلەك ءبىلدىرۋشىلەردىڭ بارلىعى دا قاتىستى. كونفەرەنتسيادا وبلىستاعى بەلگىلى عالىمدار, عىلىم دوكتورلارى مەن كانديداتتارى ا.كۇزەمباي ۇلى, ە.ءابىل, د.لەگكي, س.ساماركين, ا.شالعىنباەۆ, تاعى باسقالار ءسوز ءسويلەدى. عالىمدار تاۋەلسىزدىكتىڭ قاينار باستاۋى, پرەزيدەنتتىك بيلىكتىڭ دامۋى ءجانە ەكونوميكالىق, ساياسي, الەۋمەتتىك سالالارداعى تۇبەگەيلى جاڭارۋلاردى جۇزەگە اسىرۋداعى ونىڭ ءرولى تۋرالى اڭگىمەلەدى.
ءنازيرا جارىمبەتوۆا, قوستاناي.
...كوكشەتاۋعا ەلشى كەلدى
اقمولا وبلىسىنىڭ اكىمى سەرگەي دياچەنكو جۇمىس بابىنداعى ساپارمەن كەلگەن ۋكراينانىڭ توتەنشە جانە وكىلەتتى ەلشىسى ولەگ دەميندى قابىلدادى. كەزدەسۋ بارىسىندا ءوزارا ىنتىماقتاستىقتىڭ ءوزەكتى ماسەلەلەرى تالقىلاندى.
سوڭعى ەكى جىلدا اقمولالىقتاردىڭ باۋىرلاس ەلمەن اراداعى تاۋار اينالىمى 1,5 ەسە ءوسىپ, 3,5 ميلليون دوللاردى قۇرادى. كەزدەسۋگە قاتىسقان وبلىس كاسىپكەرلەرى 46 مىڭداي ۋكراين ۇلتىنىڭ وكىلى تۇرىپ جاتقان ءوڭىر ءۇشىن مۇنىڭ جەتكىلىكسىز ەكەندىگىنە نازار اۋدارىپ, بىرلەسكەن كاسىپورىندار قۇرۋ تۋرالى جاڭا جوسپار-جوبالارىمەن ءبولىستى. ۋكراينا ەلشىسى مۇنداي ۇسىنىستاردىڭ قۇندىلىعىن اتاپ ءوتتى.
باقبەرگەن امالبەك, اقمولا وبلىسى.
...جيدەبايدى ءان تەربەدى
ءتىلشى قوسىنا اباي اۋداندىق مادەنيەت ءۇيىنىڭ ادىسكەرى دانا سارسەمباەۆا حابارلاسىپ, سوڭعى وتىز جىلدان بەرى حالقىمىزدىڭ ءان ونەرىن تىنباي ناسيحاتتاپ كەلە جاتقان تاتيانا بۋرميستروۆا جۋىردا جيدەبايداعى اباي – ءشاكارىم كەسەنەسىندەگى امفيتەاتردا ءوزىنىڭ ەسەپتىك كونتسەرتىن وتكىزگەنىن جەتكىزدى. ەل تاۋەلسىزدىگىنىڭ 20 جىلدىق مەرەكەسى قۇرمەتىنە وراي وتكىزىلگەن تاماشا كەشتە تەك ءبىر تاتيانا عانا ەمەس, ونىمەن ىلەسە كەلگەن باسقا دا ورىس ءتىلدى ازاماتتار مەن ازاماتشالار اباي اندەرىن, جالپى قازاق اندەرىن بىرىنەن كەيىن ءبىرى شىرقاتا ورىنداپتى.
اسەرلى ءان كەشىنەن سوڭ اۋدان اكىمى تۇرسىنعازى ءمۇساپىربەكوۆ تاتياناعا حاكىم ۇرپاقتارى اتىنان ريزاشىلىق بىلدىرە كەلىپ, حالقىمىزدىڭ جورالعىسىمەن ونىڭ يىعىنا قامزول جاۋىپ, بورتپە ءشالى ءىلىپ, اباي كىتابى مەن ءوزىنىڭ العىس حاتىن قوسا تاپسىرىپتى.
داۋلەت سەيسەن ۇلى, شىعىس قازاقستان وبلىسى.