استانا قالاسىنىڭ الەۋمەتتىك سالاسىن نىعايتۋ ماقساتىنداعى مىندەتتەر شەڭبەرىندە دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق جاعدايىن جاقسارتۋ ءماسەلەسىنىڭ دە ماڭىزدىلىعى زور. ەلوردا تۇرعىندارىنىڭ دەنساۋلىعىن جاقسارتۋ قالا اكىمدىگىنىڭ الەۋمەتتىك سالادا اتقاراتىن جۇمىستارىنىڭ ەڭ باسىم باعىتتارىنىڭ ءبىرى ەكەندىگى دە تالاس تۋدىرمايدى. استانا قالاسى مەديتسينالىق كلاستەرى كەشەنىنىڭ قۇرامىنا كىرەتىن كلينيكالاردىڭ بۇگىنگى زامان مەديتسيناسىنىڭ وزىق قۇرالدارى جانە تەحنولوگيالارىمەن جابدىقتالۋى الەمدىك دەڭگەيدەگى جوعارى تالاپتارعا تولىق جاۋاپ بەرەدى.
جاقىندا قالامىزداعى مەديتسينالىق كەشەندەر قاتارى تاعى ءبىر زاماناۋي ورتالىقپەن تولىقتى. «سالاماتتى قازاقستان» مەملەكەتتىك باعدارلاماسى شەڭبەرىندە استاناداعى تراۆماتولوگيا ءجانە ورتوپەديا عىلىمي-زەرتتەۋ ينستيتۋتىندا 4 قاباتتى جاڭا وپەراتسيالىق (وتا جاساۋ) كەشەنىنىڭ اشىلۋ سالتاناتى بولىپ ءوتتى. دەنساۋلىق ساقتاۋ مينيسترلىگىنىڭ مالىمەتى بويىنشا 8726 شارشى مەتر اۋماقتى الىپ جاتقان بۇل جاڭا وپەراتسيالىق كەشەننىڭ جوبالىق قۇنى 2 ميلليارد 682 ميلليون تەڭگە تۇراتىن كورىنەدى.
ەلىمىزدەگى مەديتسينالىق ورتالىقتار ىشىندە تراۆماتولوگيا مەن ورتوپەديا سالاسىندا تەڭدەسى جوق بۇل استانا عىلىمي-زەرتتەۋ ينستيتۋتى 2001 جىلى قۇرىلعان بولاتىن-دى. ەمدەۋ جانە عىلىمي زەرتتەۋلەردى قاتار جۇرگىزەتىن ينستيتۋتتىڭ باسشىلىعىنا ەلىمىزدىڭ باس تراۆماتولوگ-ورتوپەدى, مەديتسينا عىلىمدارىنىڭ دوكتورى, پروفەسسور نۇرلان باتپەنوۆ بەكىتىلگەن بولاتىن. وسى جىلدار ىشىندە بۇل مەديتسينالىق ورتالىق ەگەمەن ەلىمىزدىڭ تۇرعىندارىنا مەديتسينالىق قىزمەت كورسەتۋ, سىنىقتارعا جانە ومىرتقا زاقىمدارىنا بۇگىنگى زاماننىڭ وزىق تەحنولوگيالارى بويىنشا وتا جاساۋ جانە ەمدەۋ ماسەلەلەرى بويىنشا ەرەن جۇمىستار اتقاردى. اقيقاتىن ايتساق, وسى جىلدار ىشىندە بۇل ەمدەۋ ورتالىعىندا ونداعان وتانداستارىمىز ەمىنە شيپا, دەرتىنە داۋا الدى.
استانا تراۆماتولوگيا جانە ورتوپەديا عىلىمي-زەرتتەۋ ينستيتۋتىنىڭ 13 كلينيكالىق ءبولىمدەرىندە ءبىر مەزگىلدە 400 ادام ەمدەلەدى. ينستيتۋتتىڭ ماتەريالدىق-تەحنيكالىق بازاسى دا جىلدان جىلعا نىعايىپ كەلەدى. ينستيتۋت كلينيكالارى وسى زامانعى وزىق قۇرال-جابدىقتارمەن جاراقتاندىرىلعان. كلينيكالارداعى 144 بىلىكتى دارىگەر ادام دەنساۋلىعىنا اراشا تۇرىپ كەلسە, ينستيتۋت قابىرعاسىنداعى 11 مەديتسينا عىلىمدارىنىڭ دوكتورى جانە 31 عىلىم كانديداتى ەمدەۋ ۇدەرىستەرى مەن عىلىمي-زەرتتەۋ جۇمىستارىن قاتار ۇشتاستىرادى. تراۆماتولوگيا جانە ورتوپەديا سالاسىندا ۇلكەن جەتىستىكتەرگە جەتىپ وتىرعان استانا عىلىمي-زەرتتەۋ ينستيتۋتىنىڭ اتاعى مەن ءتاجىريبەسى بۇگىندە ەلىمىزدەن تىسقارى ايماقتارعا دا كەڭىنەن تانىلدى.
ينستيتۋت ەرتەڭىنىڭ ەرەكشە بولاتىندىعىنا بۇگىن پايدالانۋعا بەرىلىپ وتىرعان وپەراتسيالىق ورتالىق دالەل بولماق. بۇل ورتالىق مەديتسينا سالاسىنىڭ ەڭ وزىق جابدىقتارىمەن جاراقتاندىرىلعان 9 وتا جاساۋ زالىنان تۇرادى. وپەراتسيالىق ورتالىققا ورناتىلعان جابدىقتاردىڭ ىشىندە ومىرتقا جانە بۋىندارعا وپەراتسيا جاساۋعا ارنالعان ەندوسكوپيالىق قۇرالداردى جانە ميكروحيرۋرگيالىق جابدىقتاردى ەرەكشە اتاپ وتۋگە بولادى.
ستاتيستيكالىق دەرەك بويىنشا, ەلىمىزدە جىلىنا 600 مىڭنان استام ادام ءارتۇرلى دارەجەدەگى جاراقات الادى ەكەن. ەندەشە, استانا تراۆماتولوگيا جانە ورتوپەديا عىلىمي-زەرتتەۋ ورتالىعىندا بوي كوتەرگەن بۇل جاڭا وپەراتسيالىق ورتالىقتىڭ حالىق دەنساۋلىعىن ساقتاۋعا قوساتىن ۇلەسى ولشەۋسىز بولماق.
جىلقىباي جاعىپار ۇلى.