جىل سايىن اتىراۋداعى بەكىرە ءوسىرۋ زاۋىتىندا 7 ميلليون شاباق وسىرىلەدى. جاي بالىقتىڭ شاباعى ەمەس, بەكىرە تۇقىمداس بالىقتاردىڭ شاباعىن وسىرۋدە اتىراۋلىق بالىقشىلار اجەپتاۋىر تاجىريبە جيناقتاپ قالىپتى. بىلتىرعا دەيىن ارنايى زاۋىتتىڭ جاساندى سۋ توعاندارىندا بالىق شارۋاشىلىعى سالاسىنداعى عالىم-مامانداردىڭ باقىلاۋىمەن وسىرىلگەن شاباقتار العاش رەت كاسپي تەڭىزىنە جىبەرىلگەن بولاتىن. ەندى بيىل قايتادان سونداي شاباقتاردىڭ ءبىر بولىگى, دالىرەك ايتقاندا, 3,5 ميلليون داناسى جايىق وزەنىنىڭ ايدىنىنا جىبەرىلدى. زاۋىت ديرەكتورى راشيدين كاليمۋلليننىڭ ايتۋىنشا, بۇل شاباقتار 45 تاۋلىكتە 12-15 گرامدىق سالماق قۇرايدى ەكەن. بيىلعى جىلى دا مەملەكەتتىك تاپسىرىسپەن 7 ميلليون بەكىرە بالىقتارىنىڭ شاباعىن ءوسىرۋگە تاپسىرىس بەرىلگەن. وسىنشا كولەمدەگى تاپسىرىستى ورىنداۋعا اتالعان زاۋىتتىڭ تولىق مۇمكىندىگى بار.
جايىق وزەنىنە شاباق جىبەرۋ شاراسىنا قاتىسقان اۋىل شارۋاشىلىعى مينيسترلىگى بالىق شارۋاشىلىعى كوميتەتى ءتوراعاسىنىڭ ورىنباسارى باۋىرجان جۇماجانوۆتىڭ پىكىرىنشە, الداعى كەزەڭدە مەملەكەت تاراپىنان بەكىرە تۇقىمداس بالىقتار شاباعىن ءوسىرۋگە باسا كوڭىل بولىنگەلى وتىر. «2012 جىلى اتىراۋ وبلىسىندا جاڭادان بوي كوتەرەتىن شاباق ءوسىرۋ زاۋىتىنىڭ قۇرىلىسى باستالادى. بۇل زاۋىتتىڭ قۋاتى قازىرگى زاۋىتتارعا قاراعاندا الدەقايدا مولىراق بولادى. ياعني, جاڭا زاۋىتتا جىلىنا 30 ميلليون شاباق ءوسىرۋ كوزدەلۋدە. قازىر زاۋىت قۇرىلىسىنىڭ جوبالىق قۇجاتتارى مەن بيۋدجەتى ناقتىلانۋدا. بۇعان قوسا بۇرىننان جۇمىس جاساپ تۇرعان ەكى زاۋىت قايتا جاڭعىرتۋدان وتكىزىلمەك», دەدى ول.
ال زاۋىت ديرەكتورى راشيدين كاليمۋلليننىڭ ايتۋىنشا, الداعى ۋاقىتتا تاعى دا 3,5 ميلليون شاباق سۋ ايدىنىنا جىبەرىلەدى. بىراق ولاردى جايىق وزەنىنە ەمەس, كاسپي تەڭىزىنە جىبەرۋ جوسپارلانىپ وتىر.
جولداسبەك شوپەعۇل,
اتىراۋ وبلىسى.