ءبىلىم جانە عىلىم ءمينيسترى باقىتجان جۇماعۇلوۆ جۇمىس ساپارىمەن وسكەمەندە بولدى. ول وبلىس اكىمى ب.ساپارباەۆپەن بىرگە بالالارعا ارنالعان ا.ماتروسوۆ اتىنداعى ساۋىقتىرۋ لاگەرىنىڭ اشىلۋىنا قاتىسىپ, بىرقاتار ءبىلىم بەرۋ نىساندارىنىڭ جۇمىسىمەن تانىستى.
بۇدان ەكى جىل بۇرىن ءوڭىر باسشىسى ب.ساپارباەۆ «قازاتومپروم» ۇلتتىق كومپانياسى باسقارماسىنىڭ توراعاسى ۆ.شكولنيكپەن بىرقاتار الەۋمەتتىك عيماراتتاردى سالۋ جانە بالالاردى ساۋىقتىرۋ لاگەرىن قايتا جاراقتاۋ جونىندەگى مەموراندۋمعا قول قويعان بولاتىن. بۇل ەلباسى ن.نازارباەۆتىڭ تاپسىرماسى. اقىرى ابدەن توزىعى جەتكەن ەسكى لاگەردىڭ ورنىنا جاڭا عيماراتتار بوي كوتەردى. ۇلتتىق كومپانيا لاگەر قۇرىلىسىنا 1 ميلليارد 45 ميلليون تەڭگە جۇمسادى. ەكى جىل ىشىندە اتالمىش كاسىپورىن وبلىستا ءبىر جارىم ميلليارد تەڭگەنىڭ جوباسىن جۇزەگە اسىردى.
مينيستر جاز كەزىندە 800-دەن اسا بالانى قابىلدايتىن ساۋىقتىرۋ كەشەنىنىڭ قۇرىلىسىنا ريزاشىلىعىن ءبىلدىردى. بۇل جەردە 19 كوتتەدجدىڭ 13-ءى قايتادان سالىنىپتى. جاڭادان سالىنعان كەڭ دە جارىق اسحانا, سپورت الاڭدارى مەن جازعى تەاتر, باسسەين كوزدىڭ جاۋىن الادى.
ب.جۇماعۇلوۆ كاسىبي مامان ازىرلەيتىن ايماقارالىق ماشينە جاساۋ سالاسى بويىنشا بوي كوتەرەتىن قۇرىلىس الاڭىن ارالاپ كوردى. 700 ورىندىق جاڭا نىسان 2013 جىلى ىسكە قوسىلماق. №45-ءشى ورتا مەكتەپتە بولعان كەزدە مينيستر قالاداعى مەكتەپتەردىڭ ساپاسىنا وڭ باعا بەرىپ, جاڭادان ءبىلىم ورداسىن سالۋ جونىندە ويلارىن ورتاعا سالدى. ءمينيستردىڭ ايتۋىنشا, الداعى بەس جىلدا ەلىمىزدە 522 مەكتەپ سالىناتىن كورىنەدى.
وڭىردەگى ءبىلىم وردالارىنىڭ باسشىلارىمەن, ۇستازدار قاۋىمىمەن كەزدەسۋدە وبلىس اكىمى ب.ساپارباەۆ جىل سوڭىنا دەيىن بالاباقشامەن قامتاماسىز ەتۋدى 85 پايىزعا جەتكىزۋ قاجەتتىگىنە توقتالدى. ال 2015 جىلى بالالاردىڭ بارلىعىن بالاباقشالار قابىلداي الادى, دەدى ءوڭىر باسشىسى. قازىر وبلىستا 751 مەكتەپ بولسا, سونىڭ 286-ى زامان تالابىنان قالىپ قويعان. دەمەك, الداعى ۋاقىتتا ولاردى كۇردەلى جوندەۋدەن وتكىزىپ, جاڭا ءبىلىم وشاقتارىن سالاتىن ۋاقىت جەتتى.
وڭداسىن ەلۋباي,
شىعىس قازاقستان وبلىسى.